Aesaya 37
37
Aesaya jae waa ja Kooro Hɛsɛkea
1Kooro Hɛsɛkea aa no waa la, o ɡe laa o yal waa tɔɔ la kɛɛ, dɛ ka kpɔ lweyal tɔ dɛ ka jo Korowii Dea.#2We 32:20#2Ko 19:1-37 2O tomɛ Eliakim waa dɛ nyiŋi koodem waa ta, ne Sɛbna waa ɛ karake, dɛ bela sɔfore nomonome ba ɡe aa tɔ lweyale ŋɔ, bá la Emɔɔs bibaa Korowii keame Aesaya be. 3Waa waa kpɔa tɛ ŋɔ ba ka ŋɔ Aesaya be laanee kɛŋɔ, “Wahala ne deŋnetɛra ne sihiih tɔperee fini. Ya do kɛŋɔ haah loltea aa lɔɔ o ɡwɛɡre waa wola won lolɛ la ken. 4Asiiria koojen tomɛ o laa sitɔɔla nomoa, ó ba chɛɡre Korowii waa lole saŋ bɛlbwa la. N dɛ soŋe Korowii haa dɛ tomɔ kɛ, ó tɛr a ɡɛ nɛra la deŋne a wa. Anomanta, soŋe Korowii tɛ ya nɛra ya taa kaa nɔ.”
5Kooro Hɛsɛkea toroma la aa ba Aesaya be la, 6anee o ŋɔ ba be ŋɔ, “Hé ka ɡel he dɔɔ no kɛŋɔ Korowii ŋɔ, ‘Bɛ Asiiria koojen waa la ɔmɛ kɛŋɔ maa won lɛ heya. 7No, mɛɛ ɡeloo koojen la no waane aa ɛ ɔmewa, ásɛ a ɡel o berɛ kaa o harɛ ta, ásɛ Korowii ɡel bá ka kpoo kere ne.’ ”
8Asiiria laa nomoa la noɔ kɛŋɔ, Asiiria koojen ne o laa tena le Lakes, dɛ kaa yo bwɛjen Lebna tena baa bɛn ba, asɛ o ir la koojen la be bela.
9Belaa Asiiria koojen no kɛŋɔ, Ijipt Kooro Tirhaka waa le Itiopia ne o laa tena dɛ ba ba yoo. Anomanta, o chwerɛ tɔn, dɛ kpɔ tomɛ toroma Juda Kooro Hɛsɛkea be ŋɔ, 10“Bɛ he Korowii haa dɛ tomɔ, dɛ kpɔ he te dawɛ o nɛɛ la neɡre kɛŋɔ, Asiiria koojen la aa won yo lɛ Jerusalam. 11A lole kɛŋɔ he no ɡɛ Asiiria koojen bɛlbwa aa ɛ harɛre nɔ bwa, dɛ chɔɡa kwaraa. He te ɛɛ won le a nyoa aa? 12N naawa yo harɛre nɛra bane baa le Gosan ne Haran ne Rɛsɛf, dɛ chɔɡ ba harɛre, dɛ kpoo Bɛt Eden tena baa soɡe Tɛl Asa, ba voɡare wono lɛɛ ba aa? 13Leperaa bwɛjena Hamat ne Aapad ne Sefavaim dɛ Hena kɛɛ Iva koranar dɔɔ?”
Kooro Hɛsɛkea wesoŋa
14Ate, Kooro Hɛsɛkea lɛ tɔn la dɛ kure, dɛ kpɔ la Korowii Dea, dɛ ka laa paɡri bil Korowii sie. 15Asɛ dɛ soŋe Korowii ŋɔ, 16“N Naa Koranar Bwa Kooro, Israel tena aa dɛ tomɛ, he so kena kwaa Kerobim doa. Korowii bɛlbwa toole ka ja he nɛ dɛɛ nyiŋi harɛre bwa ta. Henee ta nyundua ne harɛ. 17Ir nyu ne, dɛ́ no n wesoŋa nɔ, no waa Koojen Senakerib aa ba a ne, dɛ baa chɛɡre hen Korowii haa lole saŋ bɛlbwa nɔ.
18A ɛ kpela, Korowii, kɛŋɔ Asiiria koojena yo harɛre ɡalɡa nɛra, dɛ chɔɡ ba harɛre a chɔ pɛɛpɛɛ. 19Ba pa ba voɡare do nii ta a fuh, dɛkalkɛ a ɛ daa ne bwea nɛn aa sɛah. 20Korowii yaa dɛ tomɛ, lɛ yaa le Asiiria koojen Senakerib nɔn ta, ásɛ harɛre bwa nɛra jemɛ kɛŋɔ he ɡboo Korowii.”
Kooro Senakerib chola waa chola wa
21Ate, Emɔɔs bibaa Korowii keame Aesaya kpɔ kala tɛ Kooro Hɛsɛkea ŋɔ, “Waa Korowii Israel tena aa dɛ tomɔ aa dɛ bol laanee kɛŋɔ, o no Asiiria koojen Senakerib wesoŋa haa soŋo la, 22Korowii ŋɔ,
‘Jerusalam waa do kɛ
bechatolo,
waa wola baa jemɛ la
hah hen Koojen Senakerib,
dɛɛ nyiŋi he nyubaah.
23Koojen Senakerib,
umee hɛɛ lii he nyu bini
kɛ onee hɛɛ chɛɡre
dɛɛ ɛo nɛnhɛla nɔɔ?
Men Israel Nɛŋɡoroŋ
laanee hɛɛ ɛ sisawaa la.
24He tomɛ he toroma
ba ɛ mbarafo baɡ mɛ ŋɔ,
he wono kpɔ torɔɡore teeh
kaa bwejena aa lɔ
Lɛbanɔn dor.
He ŋɔ belaa he teŋni
peleme daa
aa jaŋa kohona,
ne dadɛɛɡa bwa soo siwi,
dɛ jo kaa kɔr la baah
tenten.
25He ɛ mbarafo ŋɔ,
he kwi buli harɛfala ta,
dɛ nyɔ a bini nee bela.
Dɛ ŋɔ he laa tena nakpale
ɡbo ɡelɔ Ijipt Nael Moo
hweeh.
26He ta noɛ kɛ saŋ la bwaa
n le vɔrɔwa bil kɛɛ?
N tɛɛ kpeɡri he ɡel bwɛɛre
danjwɛkpeɡa
aa bara kuuɡi,
dɛ berɛ dimɡbeeni.
27N ɡelɔ a nɛra bwa ɡwɛɡre,
ba bwara yɔr ba di sihiih.
Ba ɛo kɛŋɔ kpɔɡa aa lɔ
koo ta,
kɛɛ kpɔɡa aa lɔ lɔɡ doa,
asɛ wee leebɔr peu chɔɡe
yon ta a sewɛ la ken.
28N jemɛ he wobɛlbwa bini,
he laŋa ne he bala bwa,
ne he deŋnekpeɡ we-ɛɛla
haa dɛ ɛɛ mɛ.
29N no he deŋnekpeɡ we-ɛɛla,
ne he mbarafo haa dɛ ɛ,
a chole n deŋna ta.
Mɛɛ kpɔ ɡoŋaa do he mee ta,
dɛ́ kpɔ kabaɡrare
do he nyoa,
dɛ́ berɛ kpɔe kpɔ ŋwɛnɛ
haa kpɔ o ta ba la ta kaa.’ ”
30Ate, Aesaya ŋɔ Kooro Hɛsɛkea be ŋɔ,
“Waa aa che a ta,
n naa Kooro Hɛsɛkea,
he jemɛ laanee nɔ.
Koo kwaa
baa koma bena nɔ la,
ane ɛɛ le a buɡ taa,
ásɛ he dia,
ásɛ benanyoa chemaa,
hé di a tenten.
A bentooro te la,
hé du mea dɛ́ koma,
dɛ́ parɛ daa kooni,
dɛ́ di a nɔna.
31Nɛra baa ka, dɛ́ le Juda
dea la ɛɛ doo kɛŋɔ,
daa waa ta lune kaa bini,
dɛ won nɔna la ken.
32Bane ɛɛ kao dɛ́ do Jerusalam
Saayɔn Bwejen ta.
Nemenɛ Korowii ɛɛ do siee,
dɛ́ ɛ anɔ bwa.”
33Asiiria koojen waa Korowii aa bola laanee nɔ.
“Waa bwɛjen nɔ taa dɔ jo,
á ba ɛ kɛŋɔ wɛɛ ta hɛm
bonɔɔ.
Waa konee kpɔ tɔ o te
ɡbemɡbe
dɛ́ ba o doonyoa,
kɛɛ dɛ́ ma kon waa che
o ta teeh jo o bini dɛ́ yo.
34Ŋwɛnɛ waa kpɔ o ta ba la,
wɛɛ berɔɔ kpɔ o ta kaa
waa wola won jo bwɛjen
nɔ ta.
Men Korowiirii bola.
35Mɛɛ tɔ bwɛɛ nɔ ɡbemɡbee
dɛ́ lɛo,
n jirima ne nyoa maa baɡɛ
n bonɔɔ Devid nomanta!”
36Ate, awola jwaana, Korowii nyundua torome la bela Asiiria laa tena aa lole la, dɛ ka kpoo ba bini kaɡboŋa lafa fifraanuatoro dɛ banue. Nɛra iro chɔɔ, dɛ ba na ɡɛ nɛra la aa serewa chɔ bobɛlbwa. 37Aa ba ɡɛ la, Asiiria koojen Senakerib ɡel laa la yoi, dɛ ir ka so Asiiria bwɛjen Niniwe. Dɛ belaa ɛ koojen soŋnibɔr.
38Awola bɛl, o ka dɛ tu voɡa o voɡ Nesrɔk dea, asɛ o bibaala banɛ, Adramɛlɛk ne Saresa ka kpoo kere ne, dɛ chwa kaa Ararat harɛ ta. Asɛ o bibaa Esaahadon chiɡ o naa ta, dɛ di kora.#Ɛsr 4:2
Currently Selected:
Aesaya 37: mzw
Highlight
Share
Compare
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
