Aesaya 38
38
Kooro Hɛsɛkea weela wa
1Aa ba dɛ la sie la, weela lɔ Kooro Hɛsɛkea wɛɛ ba sewa. Asɛ Emɔɔs bibaa Korowii keame Aesaya la o be dɛ ka ŋɔ, “Waa Korowii aa dɛ bol laanee kɛŋɔ, ɛ he dem ne he wobɛlbwa kɛrɛdɛ, dɛkalkɛŋɔ haa he weela nɔ taa ir, hɛɛ chɔ he banɔn taa!”#2Ko 20:1-6
2Ate, Kooro Hɛsɛkea berɛ o sie chaɡɛ danjwɛ, dɛ soŋe Korowii ŋɔ, 3“N Naa Korowii, n poori, lii ɡɛ maa ta tea bwa tɛɛ, dɛ tomɛ kasinteŋ ne, dɛ ɛ waa haa dɛ nyin.” Dɛ wi lokua ne kohona.
4Anee Korowii berɛ ŋɔ Aesaya be ŋɔ, 5ó berɛ, dɛ́ ka ŋɔ Kooro Hɛsɛkea be kɛŋɔ, “Men Korowii he nabaa Devid fa aa tomɔ la, n no he wesoŋa, dɛ na siniire aa dɛ yɔɔre. Mɛɛ kpɔ bene fi dɛ anuee ja he mkpa ta. 6Mɛɛ lɛ he ne bwɛjen Jerusalam tenaa, ásɛ Asiiria koojen bɛ won pɔ he nɛ. Mɛɛ kpɔ nɔnee tɔ bwɛɛ nɔ ta.”
7Aesaya ŋɔ, “Korowii ɛɛ ɛ waanee á baɡle kɛŋɔ wɛɛ ɛ waa waa baɡɛ nyoa laanee.#2Ko 20:9-11 8Wɛɛ ɡeloo wee chunchule kaa mun ta, ásɛ chunchule ka dawɛ kon Kooro Ahas aa mao dɛ che o ta teeh dɛɛ jo dea la naɡale fi kon la ta.” Waa bol ɡɛ la, wee berɔ kaa mun ta, chunchule la ka dawɛ naɡale fi kon la ta.
9Juda harɛ ta Kooro Hɛsɛkea aa ɡbaŋra habɔɔ la, o chwerɛ jam yel.
10“N liiro kɛŋɔ n ta n saŋ tele,
dɛɛ ba sewa.
N cheɡɛ lalabwɛɛ doonyoa,
dɛ n fe aa lii kɛŋɔ
mɛɛ dɔ mkpaa.”
11N ŋɔ, “Maa Korowii na
harɛ nɔ ta kpa, kɛɛ
dɛ́ na nɛra ba soɡe
harɛ nɔ ta.
12Ba lɛ me mkpa le harɛ nɔ ta,
kɛŋɔ baa boŋi tɛnte dea
baa baŋro.
Gɛ yasɔɔh yon sɔh yal tonɛ
dɛ́ laa teŋe la,
ɡɛɛ n ɡe ɛɛ ba teŋa sewɛ.
N liiro ŋɔ Korowii fe
lɛ me mkpa tonɛ.
13Jwaana bwaa n kpɔ
weweele bini dɛ wi,
a do kɛ nyujente aa dɛ
paɡre n hoɡa ken.
N liiro ŋɔ Korowii fe lɛ me
mkpa tonɛ.
14N wio n taa do jeɡaa kɛŋɔ
kweah aa dɛ si ken.
N ha sie nyiŋi nyundua
dɛ ba koh.
N Naa Korowii, ba lɛɛ mɛ
le n wenaale bwa
maa dɛ na nɔ ta.
15Ń bol ameo?
Korowiirii bol a waa n be,
dɛ ɡbaɡba berɛ ɛa.
Suna aa lɔ n bambile bini
nomanta,
maa won dom chɔ.
16N Naa Korowii, anɔ bwa taa
nɛwɛnyina mkpa do,
a taa n ɡe mkpa do.
Gel n ɡbaŋre, ásɛ dɛ dɔ n nyu.
17N weweele ɛɛ ber mɛ
deŋnesɔɔhnaa.
He cheɡɛ he nyina ta,
dɛ lɛɛ mɛ le wekpeɡa
a fe aa dɛ ba n nɛɛ bala ta,
dɛ kpɔ n wechɔɡa
bwa kɛ mɛ.
18Nɛra baa lɔ lalabwɛɛ
aa won kpɛɛre,
serewe aa won ɡo yel
kpɛɛre.
Nɛra baa lɔ lalabwɛɛ aa won
hwɛɡɛ he waa aa dɔ
kasinteŋ la ta.
19Weeraa dɛɛ kpɛɛre
ɡɛ maa dɛ kpɛɛre fini nɔ.
Eehnanar dɛ bol he kasinteŋ
waa ba bii be.
20Korowii ɛɛ lɛɛ mɛɛ,
ásɛ ya lɔ janjela dɛɛ ɡo yela
o Dea, ya soɡa bini bwa.”
21Aesaya bol Kooro Hɛsɛkea be wubwa ŋɔ, bá ka toɡri fiɡ nɔna dɛ́ nama dɛ́ kpɔ dɛɛ marɛ Kooro Hɛsɛkea ɔr la ta, ásɛ o ɡbaŋre.#2Ko 20:7
22Kooro Hɛsɛkea bɔɔrɔ ŋɔ, “Bɔkwa waa dɛ́ baɡle kɛ mɛɛ la Korowii Dea nyundua belaa yɔ?”
Currently Selected:
Aesaya 38: mzw
Highlight
Share
Compare
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
