Aesaya 32
32
Kora o wa aa toɡra kohona
1Hé no! Kooro bɛl ɛɛ bao,
dɛ́ ba di kora
waa aa toɡra ne,
o nomonome ɛɛ kpɔ
kasinteŋii
dɛɛ nyiŋi waa ta.
2Ba bɛlbwa ɛɛ doo kɛŋɔ
bɔr dɛ peu dɛ ta aa,
he chwa ka jo,
dɛ́ berɛ do kɛ bɔr
dɛ bwaala
peu dɛ ba naa,
he chwa ka sɔh.
Ásɛ pua hɛŋle ɡbo harɛ ta ɡe
neerare aa chɔ o ta,
do kɛŋɔ bwetal
waa dɔ chunchule,
dɛ che bela daa
a wola toole.
3Banla baa dɛ na aa ba sie
laa kpɔ kpa,
baa cheɡ deŋne ɡee dɛɛ no.
4Banla ba liire aa wola
bobeŋkpoŋ cheɡɛ la ɛɛ no
waa munii, ásɛ banɔ la
baa dɛ mɛnɛme won waa
bola kɛrɛdɛ a bini chɔ.
5Gɛ saŋ nɛn waa ɛ ɡɛne la
baa on jirima tee yerɛ,
a ba ɛ kɛŋɔ
nɛn waa dɛ neɡre nɛra la,
bá yerɔ kasinteŋ te.
6Dɛkalkɛŋɔ ɡɛne te dɛ bol
ɡɛnewa,
dɛɛ lii wechɔɡa dɛ́ ɛ.
Waa waa dɛ ɛ ne anɔ la waa
dɛ bol bwa
ɛ Korowii bwara wechɔɡe.
O dɛ vɔmɛ nɛn lɔr aa dɛ kpoo
kondikwa,
dɛɛ vɔmɛ nɛn nyɔɡre
aa dɛ kpoo ne.
7Nɛn waa dɛ neɡre
nɛra ɛ nɛnchɔɡe,
wechɔɡa liiree wɛɛ lii,
dɛ che neɡra ta dɛɛ chɔɡ
nyaara ba wa aa suma,
dɛɛ tɔ ba kasinteŋ ŋwɛnɛ.
8Nɛn waa dɔ jirima te, o dɛ
maɡle waa aa dɔ jirima
dɛ́ ɛ, ásɛ a che
a ta wɛɛ do kɛrɛdɛ.
Jerusalam haahna wa
9Haahna haa lɔ bosɔɔhna ta,
hé no n be!
Bitoli haa soɡa kɛrɛdɛ,
hé cheɡ deŋne dɛ́ no n wa!
10Benanyoa ne tɔpere tamaa
bɛl habɔɔ la, he banɔ la
haa soɡe bosɔɔhna ta la
bwara ɛɛ sao,
dɛkalkɛ daa nɔna toole
hé chaa kpa.
11Haahna haa lɔ bosɔɔhna ta
la bwara ɛɛ sao he ɔmɛ.
Hé wur he laala ta,
dɛ́ kpɔ lweyale mile chara.
12Hé kpɔ nɔɔra lɔ bambili
á baɡle kɛ he tea bini
chɔɡɔ,
he harɛpare ondɛɛɡe la wa,
ne daa nɔna
aa chɔɡa la wa.
13Sɔɔhne ne jabalnadaŋɛre
ɡboo n nɛra harɛre.
He wi deremi silɛɛ fa
aa lɔ a ta la,
ne bwɛjen o fa
aa soma la wa.
14Koodem ne bwɛjen nɛra
fa aa su a ta la ɛɛ chɔ pɛɛ.
Deremi ne dekpeɡa
aa tɔ ba nɛɛ la bwa
ɛɛ choɡluu, dɛ́ berɛ
dimɡbia saŋ bɛlbwa,
ásɛ kpɔɡ bini keeɡore
ne peera,
kpɔ bela ɛ a dibɔr.
15Gɛɛ aa ba doe dɛ ka tel kɛŋɔ,
Korowii Doma aa ba so ya
nɛɛ mɔɔ
pua hɛŋle ɡbo harɛ la berɛ
harɛpare ondɛɛɡe,
o ta kwaa do wer,
ásɛ o berɛ do kɛŋɔ kɔr ken.#Joe 2:28
16Kasinteŋ ne waa aa toɡraa
dɛɛ ba harɛ la ta bwa doe.
17Deŋnesɔɔhnaa dɛɛ ba
waa aa toɡra la ta lee,
dɛ́ ɡel bɔr sɔɔh,
ásɛ ɔmee aa lee
do kpa bwa.#Jem 3:18
18Korowii nɛra ɛɛ so
deŋnesɔɔhna taa,
wobɛlbwa aa wola ba nɛɛ
ba ba deremi,
ásɛ ba so kɛrɛdɛ ken.
19Hale dombwea lee kɔr la ta,
bwɛjen la chɔɡ kwaraa
naa, 20hɛɛ na somee,
hɛɛ parɛ neerare nyoo,
he kondɛɛra dɔ kpɔɡdɛɛɡa
dɛɛ di.
Currently Selected:
Aesaya 32: mzw
Highlight
Share
Compare
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
