Aesaya 31
31
Korowii ɛɛ kpɔ nɔnee tɔ Jerusalam tena nɛ
1Banɔ la baa la Ijipt harɛ ta
dɛ́ kaa nyin kɛŋɔ ba cha
ba la, bá bwɛɛlɛ!
Ba kpɔ hwɛɡa do torɔɡore
aa wara,
baa vɔwa pɛl jaɡre
dɛɛ che a bini,
ne bokpeɡa tena
baa so jaɡre ta nɛ,
dɛ laa sie kpɔ Korowii Israel
Nɛŋɡoroŋ la nɛ.
Baa o bɔr nyin ó cha ba.
2Kɛ onee wejereme, onee dɛ́
won ba bɔr chɔɡa ne.
Waa nentane tae dɛɛ ta
harɛ,
dɛ berɛ dɛɛ kpɛla.
Wɛɛ iruu che wechɔɡ-ɛɛra,
ne banɔ la baa dɛ cha
wechɔɡa la nɛ.
3Nɛraa Ijipt tena,
Korowii laa ban,
asɛ ba jaɡre ɡe ɛ ola,
a ta kwaa aa bea yaa
wola an na ɛɛ.
Dɛ Korowii baa ir o nɔn
dɛ́ tɛr nɛra deŋne aa,
nomɛlbwa waa
dɛ cha nɛra ɛɛ keeruu,
ásɛ nɛra baa
dɛ cha ba la ɡe choɡli,
ásɛ ba nɛmbele banɛ la
bwa pɛ dɛ́ chɔɡ.
4Waa Korowii aa bol men Aesaya be laanee nɔ.
“Gɛ nyujente
onjen yon lawɛ ol
dɛ́ kpoo dɛɛ ŋoo,
ásɛ ba yerɛ peteɡra warɛ ŋɔ,
bá doŋu,
waa wola aahra baa
dɛ aahro la ɔmɛ,
waa wola ba
ɡbɔɡa chaŋe la,
ɡɛ tentenee men
Koranar Bwa Kooro
ɛɛ ba bala bá ɛ
Saayɔn Bwejen ta,
dɛ́ ba yo Jerusalam dɔma
nomɛlbwa aa wola won
kah mɛ.
5Gɛ jumbii yon ɡah dɛɛ bar
a bii nɛɛ a kɔne ta
dɛɛ tɔa ɡbemɡbe la,
ɡɛɛ men
Koranar Bwa Kooro
ɛɛ ba Jerusalam tena
daahna.
Mɛɛ daah baa, mɛɛ nyiŋi
ba nɛɛ dɛ́ yo lɛɛ ba.”
6Korowii berɔ ŋɔ, “Israel tena, he berɛ ba men he siwi aa sa mɛ, dɛ berɛ habɔɔ kpo mɛ la be. 7Awola tɔpere la, he bɛlbwa ɛɛ vɛh voɡa haa kpɔ suuɡapoŋa ne suuɡaswɛm ɛa, dɛ che a ta ɛ wechɔɡa laanee.
8Asiiria tena ɛɛ serewoo
dɛ ba ne nɛra laa yoa,
kere waa wola nɛn kon ɛɛ
dɛɛ ba ba kpoora.
Baa chwa laa taa,
ásɛ ba lawɛ ba bini
bonɔɔna yoma.
9Ba koojen ɛɛ ɔmɔɔ dɛ́ chwa,
ásɛ ba nomonome baa chɔ
laa nyoa la kpɔ ɔmee
dɛ́ chwa ɡel ba laa
fraŋkaa.”
Korowiirii bola.
O nii waa kpɔa
dɛ fuh saraha kwaa la lɔ
Jerusalam Saayɔn
Bwejen ta.
Currently Selected:
Aesaya 31: mzw
Highlight
Share
Compare
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
