Aesaya 30
30
Nyopɛo fɔo waa wola tɔnɔ dɔe
1Korowii berɔ ŋɔ,
“Deŋnekpeɡ tena baa dɛ
di kora Juda harɛ ta
la, ba bwɛɛlɛ!
Ba dɛ teŋɛ ba ɡbaɡba liire
aa wola n be leɛ ta,
dɛɛ fɔwɛ nyopɛo fɔo n Doma
aa wola ba nɛɛ jae,
dɛ ɛ wechɔɡa dɛɛ ja
wechɔɡa ta.
2Ba ta men bɔɔrɛ no dɛ chiɡ
ŋwɛnɛ ta dɛ la Ijipt harɛ ta,
dɛ ka marɛ Ijipt kooro
ó tɔ ba nɛ, dɛ́ lee ba le ba
dɔma nɔn ta.
3Mara baa ŋɔa ba kaa
marɛ kooro la ɛɛ ɛ pɛɛpɛɛ.
Ijipt harɛ ta baa ŋɔa ba dɔ
sɔɔhbɔr la, ba di ncho.
4A lole kɛŋɔ Juda tena toroma
lɔ Ijipt bwɛjena Soan
ne Hanes,
5kɛ sihiih ne nchoo
Juda tena ɛɛ ba dii,
kpɔe baa kpɔ ba te ka
dawɛ nɛra
baa wola won cha ba nɛ,
baa wola ba tɔnɔɔ dɔ la.”
6Waa Korowii aa bera kpɔ baɡle Aesaya chaahna ta, a ɛ kpɔɡ bini olchɔɡa waa Nɛɡɛv pua hɛŋle ɡbo harɛ taa nɔ.
“Juda tena toroma la vɔrɔwe
ba laala dawɛ keeɡore ta,
dɛ vɔrɔwe ba kondɔɔh
dawɛ nyoɡmare ta,
dɛ kpɔ wekpeɡa
ne siswɛm harɛ,
nyujentena ne domkpule
ne harɛkwaare
aa dɛ jah aa lole,
dɛɛ kaa harɛ la tɔnɔ
bɛlbwa aa wola toole
o ta la ta.
7Chae bɛlbwa toole Ijipt
harɛ ta, a ɛ wepuu.
A waa mɛɛ yerɔ Harɛkpeɡ
Waa Wola Kpeɡri Dɔe.”#30:7 Bane dɛ baɡle waa nɔ mun kɛŋɔ Oljen Waa Wola Kpeɡri Dɔe.
8Korowii ŋɔ men Aesaya be ŋɔ,
“Namete kaa, dɛ́ ka chwerɛ
n nɛra waa maa bol he be
nɔ dawɛ bwepɛla ta tɛɛ ba,
chwera do tɔn ta,
ásɛ a chɔ le kerekere
dɛ́ ɛ danseɛ saŋ te
bɛlbwa dɛɛ la.
9Ba ɛ nɛra baa dɛ lɛ ɡaeh
ne nyosonteŋna.
Ba ɛ nɛra baa vɛh Korowii
waa noe.
10Ba ŋɔ Korowii keamere baa
dɛ na waa chaahna ta be
ŋɔ,
‘He bɛ chaahna
waa bol ya be kpa.
He bɛ kasinteŋ waa aa chɛ
kɛ ya ɛ dɛɛ bol kpa.
Hɛ́ɛ bol waa aa dɛ lɛ sie,
dɛ ɛ wesoma ya be.
11Hé ɡel ɡɛ haa dɛ ɛ la.
He bɛ Israel Nɛŋɡoroŋ la
waa bol ya be kpa.’ ”
12Anomanta, Israel Nɛŋɡoroŋ la ŋɔ,
“Haa vɛh waa nɔ,
dɛ kpɔ he ɡbaɡba ŋwɛnɛ
dɛɛ di kpeɡri nɛra nɛɛ dɛɛ
neɡ ba nomanta,
13he wechɔɡa ɛɛ ɛ heyaa kɛŋɔ
danjwɛɛ waa pera
dɛɛ ba chola,
asɛ dɛ piɡri chole buɡ ta la.
14Wɛɛ paɡroo kɛŋɔ vimamaa
vii yon paɡre, dɛ́ peɡri
burbur la ken,
o kaŋli aa wola kanee do
kɛ ba kpɔ buh nii,
kɛɛ ba kpɔ ɛ nee la.”
15Waa Nemenɛ Korowii, Israel Nɛŋɡoroŋ aa bol nɛra la bee nɔ.
“Hé berɛ ba n be, dɛ́ kpɔ
he hwɛɡa dawɛ n nɛ,
ásɛ n lɛ heya, dɛ́ kpɔ nɔn tɔ
he nɛ.
Kɛ he vɛoh, he ta balɛ.
16He dɛ bol ŋɔ, ‘Akai, yaa so
jaɡre taa dɛ chwa kaa.’
A wer ɡa.
Hé so jaɡre ta chwa.
He dɛ lii kɛŋɔ he jaɡre
ɡbaŋre,
kɛ nɛra baa ti heyaa la
kwaa ɡbaŋre ɡwaa he kwa.
17He nɛra kaɡboŋ ɛɛ na he
dɔm beŋkpoŋii dɛ ɔmɔ
dɛ́ chwa,
he dɔma banue ɛɛ ɡeloo
he bwa chwa,
a ka he laa fraŋkaa ɡbo
pa deŋɡare ta.”
18Ane a bwa, Korowii tea dɛ
domɔ he waa wɛɛ kpa
kɛ he ba o be.
O na he sum, dɛkalkɛ
o waa dɔ kasinteŋ.
Banɔ la bwa baa kpɔ ba te
dawɛ o nɛɛ la, ba na som.
19Saayɔn tena, nɛra haa soɡe Jerusalam, haa wi kpa. Korowii dɛ na he sum. He wio noo waa, buɡ la ta, wɛɛ no he bee. 20Korowii ɛɛ ɡeloo wekpeɡa ne hɔhɔrɔwa ba he nɛ, kɛ waa o webaɡlaa kpɔ sɔh heya. Wɛɛ kpɔ o tenee baɡle heyaa hé nao. 21He kono kpɔ diɡ oo, ɡal oo, hɛɛ no taa bɛl he habɔɔ, o ŋɔ, “Ŋwɛnɛ laanee la, hé kpɔ o ta.” 22Haa he voɡa haa kpɔ suuɡapoŋ ne suuɡaswɛm ɛ a bwara, laanee kpɔ ɛ wobɛlbwa kpa, dɛ́ kpɔa ka ta kɛŋɔ yakwara aa wola were ken, dɛ́ ŋɔ a be ŋɔ, “Hé le ya sie.”
23Korowii ɛɛ nɛ bwaalaa do kwaa haa dua ta, ásɛ a do wer dɛ́ ɛ kɛrɛdɛ. He kondɛɛra ɛɛ dɔ bɔr waa kanaa dɛɛ di. 24Nae ne keeɡore haa kpɔa dɛɛ parɛ he kooni la, ɛɛ di mea baa pala kɛrɛdɛ pɛɡaa. 25Awola Korowii aa ba kpoo he dɔma kohona dɛ́ kuuɡi ba dejaŋa ta la, nee ɛɛ palɔɔ le bwejaŋa ne deŋɡarere aa kaa nyundua bwa ta. 26Korobie ɛɛ lɔɔ dɛ chaah bɔr kɛŋɔ wee ken, ásɛ wee chaah bɔr kohona kɛŋɔ baa lɔ tɔpera anuanɛ wee bɔr chaahna pɛ ken. A ɡɛ saŋ Korowii ɛɛ vɔrɔwe bola waa do o nɛra laanee, dɛ́ chaah ba.
27Hé no! Korowii sɔn ɔma,
o le bojaŋ dɛɛ ba.
O baah diu kɛŋɔ nii aa dɛ
hɔ ken, chuu ɛɛ le kohona.
Bandia ɡboo o wobol bwa,
aa fuh o dɔmaa
kɛŋɔ nii aa dɛ fuh kwaa
ken.
28O hweera do
kɛŋɔ nee waa dɛ palɛ
dɛ su tel baŋa ta la.
O dɛ ɡboo harɛre nɛra kɛŋɔ
baa dɛ ɡboo kwaa la ken,
dɛ́ chɔɡ ba.
Gɛ baa kpɔ kabaɡrare
do jaaɡɔ nyoa
dɛɛ beɡro la, ɡɛɛ wɛɛ
ba harɛre nɛra beɡra
le waa baa maɡla bil la ta.
29Korowii nɛra sie ɛɛ lɛo
baa ɡo yela kɛŋɔ,
baa dɛ di tɔpejena
dɛɛ ɡo yela jwaana la.
He baah ɛɛ sɔɔh heyaa kɛŋɔ
nɛra aa hoh kalipere dɛɛ
kaa Korowii Dea.
Korowiirii do kɛ Israel tena
Bwetal waa dɛ lɛɛ ba.
30Korowii ɛɛ ɡeloo nɛra no o
taa, dɛ́ jemɛ ɡɛ waa do
kan, dɛ́ ɡel ba na
o bandia waa
dɛ́ ba o ne,
dɛ́ ba tɛr ba deŋne.
Bandichɔɡe ne nii
aa dɛ chɔɡ kwa,
ne bwaalachɔɡe ne peu,
ne bwaala kɔɡra dɛ
dombwea
nee wɛɛ ba bala.
31Korowii taa la ɛɛ ɡeloo
Asiiria tena bwara hɛlɛ,
wɛɛ kpɔ o koodaŋɡbalaa
lɔ ba bil.
32Korowii aa ir o daŋɡbala
dɛ́ kpɔ dɛɛ tɛr ba deŋne la,
lɔe bɛlbwa waa lɔ ba la,
dɛ Israel tena ɡe dɛ
yiiɡi kwaa
kɛŋɔ loŋa ken,
dɛɛ lɔ janjela
dɛɛ ɡo yela.
Korowii ɡbaɡbaa
dɛɛ ba ba yoi.
33Korowii kwaa bobɛl cheɡ tɛ
Asiiria koojen saŋ bɛl biɡri,
dɛ́ fuuh.
O ɛ nimar bɔr o do luŋri
dɛ do paɡri,
ba pa damara bil
a daŋɛ chɔ.
Korowii hweera ɛɛ ɛo kɛŋɔ
nii ne jebɔrɔwe ken,
dɛ́ ba jo daa la ta a fuh.
Currently Selected:
Aesaya 30: mzw
Highlight
Share
Compare
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
