Aesaya 28
28
Efrem Dea tena wenaale wa
1Israel harɛ bwɛɛlɛ!
O jirima dɛ dime kɛŋɔ
kwaa fee aa lɔ sitɔɔla
baa ɛ sennyɔɔra kooɡbɛrɛre
ta dɛɛ lee la.
Ba nyuune baa ɡɔɔra dɛɛ valɛ
sɔɔh konsɔɔhsoma,
kɛ ba dɛɛrɔ chɔ.
2Hé na, Korowii dɔ nomɛl waa
dɔ jirima o bwara
ɡe do kpeɡri.
O bala bini do kɛŋɔ
dombwea aa dɛ lee la,
kɛɛ dompeu chɔɡe waa taa
dɛɛ chɔɡ kwaa la.
Wɛɛ taɡɛ bwɛɛ laanee
ɡo harɛ,
kɛŋɔ bwaala yon nɛ
kohona, dɛ́ chɔɡ kwaa
dɛ́ pala kaa la.
3Israel sitɔɔla,
baa ɛ sennyɔɔra kooɡbɛrɛre
baa kpɔa
dɛɛ maŋkura ba te la,
baa tiɡraa do harɛ.
4Ba sitɔɔla la jirima
dɛ ba dima,
kɛŋɔ fiɡ daa nɔnloɡle
bɛl aa tɔ sie swɛɛ,
asɛ nɛn kpɔ di warane la.
5Awola tɔpere la,
Nemenɛ Korowiirii
dɛ́ ɛ kooɡbɛrɛ waa wera
dɛ dɔ jirima kohona
tɛ o nɛra baa kaa la.
6Dɛ́ berɛ tɛ nɛra baa bol waa
dɛɛ pa bole la liire,
baa bola kasinteŋ ne,
a berɛ che o nɛɛ nɛra baa lɔ
bwɛjen la doonyoo,
dɛ lɛɛ ba
dɛɛ ta laa ta la dɔ bokpeɡa.
7Hale Korowii keamere ne
sɔfore la dɛ nyɔ sen
dɛɛ yɛɛɡe.
Ba nyɔ seŋkpeɡa dɛɛ kɛŋle
dɛ wili.
Keamere la seŋkpeɡa nyɔe
kohona ɡelɔ waa
Korowii aa ɡela
baa naa chaahna ta la,
baa a bini nae dɛɛ baɡle.
Sɔfore la ɡe wili waa bola
dɛ́ pa bole aŋwɛnɛ ta.
8Chwɛɛra ɡboo ba teeburre
bwa, a bobɛlbwa sese
ta kae dɛ do wer.
9Gɛ nɛra nɔ ɛɛ bol men Aesaya waa ŋɔ,
“Umee o bol Korowii waa
dɛɛ baɡle ɔ?
Umee o pili waa mun
dɛɛ tɛ nɔɔ?
Bechale baa ta elee
a do wer tɛ.
10O webaɡla ta mun dɔe.
O bol waa la sie,
dɛ o bolɔ ba habɔɔ.”
11A wer ɡa, haa a mun no
tenaa, Korowii ɛɛ ɡeloo he
no o waa wobofala ta.
Nɛŋhɔɔhraa wɛɛ ba ɡela
ba bol baɡle heya.#1Kɔ 14:21
12Korowii ŋɔ ba be ŋɔ,
“Ona bɔree la, nomɛlbwa
waa koah la,
ó ba onɛ,” dɛ berɛ ŋɔ,
“Deŋnesɔɔhna bɔree”
kɛ baa no.#Mat 11:28
13Baa wobɛlbwa Korowii aa
dɛ bol ba be mun no.
Ba bol waa la sie,
dɛ ba bolɔ ba habɔɔ
tɔpere bɛlbwa,
asɛ ba le habɔɔ dɛ ka choɡli,
dɛ foɡri, dɛ jo bel ta ba
laɡ ba.
14Anomanta, he sitɔɔla
haa dɛ nyiŋi
Jerusalam tena nɛɛ
he siwi aa wola nɛn tɔɡɛ,
hé no waa
Korowii aa dɛ bol.
15He dɛ ta nyoa ŋɔ,
“Ya ne seo fɔwɛ fɔo,
ya ne lalabwɛɛ nyoa pɛ.
Dɛ harɛchɔɡ peu dɛ ba naa,
waa yaa dɔ,
dɛkalkɛŋɔ ya kpɔ ya te do
nyosone ne neɡra ta,
kɛŋɔ aa tɔ ya nɛ dɛ́ lɛ yaa.”
16Waa Nemenɛ Korowii aa dɛ bolee nɔ.
“Na, n pɛne Bwedɛɛɡe
o wa aa hiah,
dɛ kpɔ pa n Dea mun
Saayɔn,
o lawɔ kpoŋe kiŋkiŋ.#Rom 9:33; 1Pi 2:6
17Kasinteŋii mɛɛ ba kpɔe berɛ
ŋwɛn ba kpɔ dɛɛ maɡɛ kon,
dɛ́ kpɔ waa aa toɡra berɛ
kon demamaala aa kpɔa
dɛɛ toɡre dea.
Dompeu ne nee dɛɛ ba
a palɛ nyosone haa kpɔa tɔ
he te la kaa.
18Fɔo he ne seo aa fɔwa la
ɛɛ chɔɡoo,
nyopɛo he ne lalabwɛ aa
dɔa la ɡe aa lee do kpa.
Dɛ harɛchɔɡ peu baa ta aa,
wɛɛ dɔ heyaa,
dɛ́ lɔ heyaa bil harɛ.
19Chɔɔ ne jwaana bwaa
wɛɛ ba tae,
saŋ te bɛlbwa waa ta la,
wɛɛ kaa he nee.”
Dɛ he no waa nɔ mun aa,
ɔmee ɛɛ lawɛ heyaa
kohonaa taeh.
20Aa ɛo kɛŋɔ sɛɡla baa ŋɔa,
mpa waa wola jaŋɛ nɛn chɔ
o ta dɛ́ tɛɡre o te,
bombo waa wola kanɛ
dɛ́ telu ken.
21Korowii ɛɛ iruu,
dɛ́ ɛ ɡɛ o fa aa ɛa
Pɛrasem Bwejen ta la,
dɛ ɛ ɡɛ tenten
Gebeɔn Fɛlembɔjen ta,
ásɛ dɛ ɛ o toma aa ɛ wefala
yaa wola a dɔŋa nae bwa,
dɛ́ ɛ nyokpowa.
22He bɛ jae maa dɛ ja heyaa nɔ
mamɛ,
ásɛ he wahala haa
dɛ́ ba nae la
bɛ he nɛɛ ba ɡwaa
kohona.
Korowii,
Koranar Bwa Kooro
bol n be,
maɡla waa maɡla bil
kɛŋɔ wɛɛ chɔɡ
harɛ bwaa la.
23Hé cheɡ deŋne dɛ́ no n be!
Hé no waa maa dɛ bol nɔ
kɛrɛdɛ.
24Saŋ bɛlbwa laa paa teŋɛ
dɛɛ parɛ,
kɛɛ dɛɛ buɡli koo.
25Waa kwaa harɛ la tonɛ la,
wɛɛ merɛ anɔ la waa
merɛɛ,
dɛ́ du anɔ la ɡe waa du
a bwa ne a bɔra.
26O jemɛ o toma.
Korowiirii baɡlo anɔ la
aa wera.
27Waa kontɔɡ kpɔe dɛɛ lɔ
konjeɡre kɛŋɔ jule.
Daa waa maɡraa o kpɔ
dɛɛ lɔa, ásɛ a bɛ peɡri.
28Namaa wɛɛ namɛ mea,
dɛ́ kpɔ ɛ paanoo.
Lɔe laa wɛɛ lɔa.
Saŋ bɛlbwa laa o teŋɛ
dɛɛ lɔ mea.
Lɔe wɛɛ lɔa, ásɛ a bie le.
Nama laa wɛɛ nama.
29Gɛ liire nɔ bwa,
Koranar Bwa Kooro
bee a le.
Baɡla waa baɡle nɛra
waa dɔ nyokpoa,
o wejema ta jaɡa dɔe.
Currently Selected:
Aesaya 28: mzw
Highlight
Share
Compare
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
