Aesaya 27
27
Korowii ɛɛ lɛ Israel tenaa
1Awola tɔpere la, Korowii ɛɛ kpɔ
o kerejen waa nyɛɡa laanee
tɛr oljen waa dɛ tuuɡi harɛ,
dɛ ɛ harɛkon,
dɛ ɡoɡli dɛɛ kaa sɔrr la
deŋne.
Onee mpo bini oljen
Lɛvayatan#27:1 Mpo bini oljen nɔ sɔne Lɛvayatan. la.
2Awola tɔpere la, Korowii ɛɛ bol o daa koo bɛl waa wera waa ŋɔ,
3“Men Korowiirii dɛɛ nyiŋi o ta,
menee dɛɛ do nee o ta
tɔpere bɛlbwa,
chɔɔ ne jwaana bwaa
mɛɛ daahno,
ásɛ nomɛlbwa bɛ
on ba chɔɡ.
4N baah ta daa koo nɔ
waa cheɡa tɛ n nɛra la nɛɛ
dii, kɛ dɛ jabalnadaŋɛre
ne sɔɔhne
aa cheɡa tɛ ba dɔma,
leɔ dɛ tɔ ba nɛɛ tenaa,
mɛɛ jo ba binii dɛ́ chɔɡ ba.
5Kɛ dɛ n nɛra dɔma dɛ nyin
kɛ n kpɔ nɔn tɔ ba nɛ aa,
n ne ba baah ɛɛ do werii.”
6Tɔpere bɛl ɛɛ bao
Jekɔb naanar
baa ɛ Israel tena la dɔ lune
dɛ́ le kɛŋɔ daa ken,
dɛ́ moɡɛ
dɛ́ fe, ásɛ dɛ nɔnɛ perɛ
harɛ ta bobɛlbwa.
7Korowii ta Israel tena deŋne
tɛrɛ kohona, dɛ kpoo ba
kɛŋɔ waa kpoo ba dɔma la.
8Laalee o kpɔ tɛr Israel tena
deŋne,
dɛ doŋ ba le ba harɛ ta
kpeɡri ne kaa harɛfale ta,
kɛŋɔ peuchɔɡe aa taa le
wee leebɔr,
dɛ kpɔ kwaa dɛɛ kaa la.
9Dɛ Korowii ɛɛ kpɔ Israel tena
wechɔɡaa kɛ ba aa,
atane baa kuuɡi kwaa
baa kpoo kwaa a ta
ɛ saraha dɛɛ tɛ ba voɡare la
buruburu kɛŋɔ fula ken,
dɛ́ teŋni ba voɡhaah Asera
dajaŋa, ne bwea
baa paaɡa dɛ fuh daawiile
dɛɛ tɛo a ta la bwa ta.
10Bwɛjen baa ma danjwɛkpeɡ
baro la paɡrɔ,
Nomɛlbwa toole o ta,
o chɔ pɛɛpɛɛ kɛŋɔ
pua hɛŋle ɡbo harɛ,
dɛ berɛ nae dibɔr.
Belaa a chɔ dɛɛ onɛ,
dɛ́ pɛɡre daa kpala bwa ta.
11Dɛ a holaa, a kuuɡo dɛɛ lee,
ásɛ haahna yon ba paa
kaa mar.
Israel tena aa waa mun no.
Anomanta, Korowii tea
aa ba nɛɛ domɛ.
Onee ta ba, kɛ waa
ba sum na.
12Awola tɔpere la, Korowii ɛɛ boa o nɛra nyoa le Yufretis Moo, dɛ kaa Ijipt harɛ jwɛh ta, dɛ lɔɔ ba kɛŋɔ mea ken, dɛ́ tɔɔ Israel tena beŋkpoŋa beŋkpoŋa pɛ. 13Awola bɛla ɛɛ siu kohona, dɛ́ yerɛ Israel tena baa laɡ ba laa ta, ba kaa Asiiria ne Ijipt harɛ ta ka so biɡri la, ásɛ ba bwa berɛ ba tomɛ Korowii Jerusalam, Saayɔn Bwejen waa do ɡoroŋ la ta.#Mat 24:31
Currently Selected:
Aesaya 27: mzw
Highlight
Share
Compare
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
