Aesaya 23
23
Korowii bol bwɛjen Taaya chɔɡa wa
1Waa aa chiɡ Taaya Korowii bol baɡle Aesaya chaahna ta laanee nɔ.
Nɛra haa dɛ ɛ toma stiimaere
aa le Taases la, hé wi!
Taaya paɡrɔ.
Deene kɛɛ stiimae chebɔr
toole kpa.
Saepros harɛ taa ɡɛ waa nɔ
le ba he be.#Emɔ 1:9-10
2Nɛra haa soɡe mpo nyoa la,
hé wi!
He ne bonadiire baa le
Sidon
dɛɛ ɛ toma stiimae bini
dɛ dɛɡ la, hé wi.
3He tomɛ baala ba la mpo
baŋ, dɛ ka yawɛ mea
le Ijipt harɛ,
dɛ ba yoɡ dɛɛ tɛ
harɛre nɛra.
Bela baa ɛ bona dibɔr
harɛre ɡalɡa ta.
4Bwɛjen Sidon tena, a chɛ kɛ
sihiih kpo heya.
Mpo haa kpɔ he te dawɛ
o nɛɛ la taɡɛ heyaa ta
dɛ ŋɔ, “N do kɛ hambara,
n ta bibaala dɛɛrɛ bwa,
n baa bol bihaahna wa.”
5Dɛ Ijipt tena noɔ kɛŋɔ
bwɛjen Taaya paɡraa,
ba bwara ɛɛ yɔroo
ba wi tɛɛ ba.
6He nɛra haa soɡe mpo nyoa
la, hé wi dɛ́ ir kaa Taases.#23:6 Taases sɔn bɛl ɡee Speen.
7He bwɛsom Taaya
laanee nɔ naa?
Bwɛbenebene o nɛra aa joa
ka so bojaŋ harɛre ta
laanee nɔ naa?
8Umee ɡela ɡɛ waa nɔ chiɡ
Taaya ɔ?
Kondɛɛɡa bwɛɛ o bonadiire
aa beɡre koobii dɛ dɔ
nyanyini harɛ nɔ ta bwa
laanee nɔ naa?
9Koranar Bwa Kooroo
ɡela a chiɡ.
O ɛ ɡɛ ásɛ ba jirima
baa dɔa
dɛɛ ɡɔɔ ba te la tonɛ,
dɛ́ ba banɔ la baa dɔ
nyanyini harɛ nɔ ta la
ne harɛ.
10Taases tena, he ta stiimae
chuɡribɔr dɔe kpa.
Anomanta, hé ka parɛ ɡɛ
baa dɛ parɛ Nael Moo
nyoa harɛ ta la.
11Korowii tɛr o nɔn pa mpo ta,
o ir mpo nyoa koranar
ɡalɡa.
O bol Keenan harɛ nɛra baa
soɡe mpo nyoa la wa,
dɛ chɔɡ ba dekpeɡa.
12Korowii berɔ ŋɔ, “Bwɛjen
Sidon haa wera kɛŋɔ bitolo
waa wola baa jemɛ,
taraken he chɔɡɔ!
Silɛɛ aa lɔ he ta la bwa
toole kpa.
Ir dɛ́ kaa Saepros harɛ ta,
hale bela ɡba
haa ona dɔe ba.”
13Nyiŋi Babelɔn tena harɛ na,
ɡɛ nɛra nɔ fa toole
wobɛlbwa bini.
Asiiria tena ɡelɔ o berɛ
pua hɛŋle ɡbo harɛ
ola sobɔr.
Ba ma konjaŋa dɛ pɛl
danjwɛɛre
aa bar bwɛɛre la ta, dɛ che
a ta jo, dɛ kuuɡi dekpeɡa
bela bwa berɛ dimɡbia.
14Nɛra haa dɛ ɛ toma
Taases stiimaere bini la,
hé wi!
Bwɛjen haa kpɔ sie dawɛ o
ta la paɡrɔ!
15Saŋ bɛl dɛ ba, ba soh Taaya waa bene fifraanuanɛ, aa doo kɛŋɔ kooro bene waa di harɛ nɔ ta. A ɡɛ bene nɔ habɔɔ la, aa chiɡ Taayaa ɡɛ baa bola hanjwamane yel nɔ ta la.
16“Hanjwamane te,
ba soh he wa.
Kpɔ he janjela
dɛ́ lɔ kohona valɛ
bwɛɛ bini.
Go yela kohona
ásɛ baala lii he wa.”
17Bene fifraanuanɛ habɔɔ la, Korowii ɛɛ ɡeloo Taaya tena berɛ kpɔ ba toma ja. Gɛ hanjwamane yon dɛɛ nyin suuɡa baala be la, ɡɛɛ baa ba harɛ nɔ ta harɛre ta laŋa ka di bona. 18Ba tɔnɔ baa dɔ ne ba suuɡa baa dɔa la, baa a taa tɔ. Baa kwaaraa cheɡ á ɛ Korowii kwa, ásɛ nɛra baa dɛ tomɔ la kpɔ yawɛ kondikwaa kohona dɛ́ di dɛ́ yawɛ ba bwara laaladɛɛɡa baa dɛ nyin bwa.
Currently Selected:
Aesaya 23: mzw
Highlight
Share
Compare
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
