Aesaya 22
22
Korowii bol bwɛjen Jerusalam chɔɡa wa
1Waa aa chiɡ Chaahna Fɛlembɔjen ta, Korowii bol baɡle Aesaya chaahna ta laanee nɔ.
Bɔkwaa waa bala ɔ?
Ɛrɛɛ bwɛjen nɔ nɛra bwa
ɛɛ lɛ ba sie saldor nɔɔ?
2Akwe! Lɔŋɔre ɡbo bwɛ,
bwɛjen ɡbɔɡa ne silɛɛ
aa sui.
Kere laa ba kpɔ kpoo heya,
laa ta ɡe laa he ka.
3He bwɛjen la nomonome bwa
pɛo chwa,
kɛ ba laɡ ba, dɛ ba ta ban
hɛma tae.
Hale ba dɔma aa lɔ bojaŋ ba
chwa kaa kwaraa la,
ba lawɛ ba bwa.
4A waa n ŋɔ, “Hé ɡel mɛ
n wi n nɛra.
He bɛ n bwara larawe
n nɛra baa serewa nɔ wa.”
5Awola tɔpere la, Korowii,
Koranar Bwa Kooro
ɛɛ ɡeloo o ɛ ɡbɔɡa
ne ɡaeh ne ɔmee tɔpere
Chaahna Fɛlembɔjen la ta.
Ba kuuɡi danjwɛɛ waa bar
bwɛjen la ta awola,
ba wii kaa le bwejena dor.
6Elam laa tena kpoŋe hɛma
ne a tori dɛ che kwaa
aa do kɛ torɔɡore bini,
bane ɡe so jaɡre ta.
Kir laa tena ɡe kpɔ kwaa
baa kpɔa dɛɛ tɔ ba te
ɡbemɡbe laa ta le.
7Gɛɛ a do kwaa aa
do kɛ torɔɡore,
su he fɛlembɔjena
harɛdɛɛɡa la bwa,
asɛ nɛra baa soɡe jaɡre ta
ɡe che Jerusalam
doonyoone.
8Kwaa aa tɔ Juda tena nɛɛ la,
ba laa kpɔ.
A ɡɛ saŋ la, he kpɔ sie dawɛ
dɔmkwaa aa lɔ Kɔr Bini
Koodem#22:8 Kɔr Bini Koodem ɛ bela baa dɛ cheɡ dɔmkwa. la ta.
9He nao kɛŋɔ danjwɛɛ waa bar
Kooro Devid Bwɛjen la
pera aa choɡla,
asɛ he ɡel nee do harɛbɔr
tam la ta warɛ.
10He kure Jerusalam deene,
asɛ dɛ kuuɡi ane dɛ kpɔ
a bwea ma danjwɛɛ la
o do kpeɡri.
11He ma konjen asɛ nee le
tambene la ta dɛ ba jo
o bini,
bwɛɛ la ne danjwɛɛ
waa baro la baah ta.
He ɛ anɔ nɔ bwa, kɛ he ta sie
kpɔe dawɛ Korowii waa
waa maɡla bil wubwa,
dɛ ɛa la ta.
12Korowii,
Koranar Bwa Kooro ŋɔ,
hé dooɡe lɔŋɔre dɛ́ wi,
dɛ́ fonɛ he nyuune dɛ́ kpɔ
lweyale tɔ awola tɔpere,
á baɡle kɛŋɔ he ɛ wechɔɡa.
13Kɛ he kpoo nae ne peera
dɛɛ di kwa, dɛ nyɔ sene
dɛɛ hɛlɛ dɛɛ lɛ he sie.
Hé ŋɔ, “Hé ɡel ya di kwaa
dɛ nyɔ sen.
Kere ɡbo dɛ ya serewɔ.”#1Kɔ 15:32
14Koranar Bwa Kooro ɡbaɡba bol n be ŋɔ, “Maa ɡɛ wechɔɡa nɔɔ kpɔ kɛ ba bwa ka tel ba seo tɔpere. Men Korowii, Koranar Bwa Kooroo bola.”
15Korowii, Koranar Bwa Kooro tomɛ men Aesaya ŋɔ,
“La Sɛbna waa chɔ koodem
bela tomare nyoa be
ka ŋɔ,#2Ko 18:18
16‘Henee umeo? Umee tɛɛ
ŋwɛnɛ ŋɔ hé pɛɡre bwe,
dɛ́ kpɔ bela ɛ he lalbɔɔ,
asɛ hɛɛ ɛo bodɛɛɡe
dɛ́ kpɔ bela
ɛ he chɔɔbɔr nɔɔ?
17Na, he ne he nɛnjen ɛɛ bwa,
men Korowii dɛ́ ba he
ɡɔɔra viɡri bonɔ.
18Wɛɛ keerii kɛŋɔ bɔɔl ken,
dɛ́ kpɔe ta harɛ
waa paɡa ta.
Belaa hɛɛ ba sewa,
belaa he laa torɔɡore
haa dɛ che a bini,
dɛ kpɔ dɛɛ nyin sɔn la ɛɛ
ba kae.
Sihiih ɛɛ kpo he nomoa
he waa.
19Men Korowii ɛɛ le
he ne nomombɔr
bela he fa aa lole wubwa
laanee,
dɛ́ ba he ne harɛ.’
20Mɛɛ yerɛ Hilkia bie Eliakim waa ɛ n bonɔɔnee. 21Mɛɛ doo he nomombatakaarejaŋ laanee, dɛ́ vɔwɔ he kiriso la dɛ́ kpɔ he nomonome la do o nɔn ta. Wɛɛ ɛ nɛra baa lɔ Jerusalam ne Juda dea tena bwa mɛɛ. 22O nɔn taa mɛɛ ba Kooro Devid dem safoa kpɔe do ó di kpeɡri, dɛ o pili komɛl aa, nomɛlbwa aa won tɔɔ, dɛ o tɔ komɛl ɡe aa, nomɛlbwa aa won pilu.#Wep 3:7 23Mɛɛ ɡeloo o che kiŋkiŋ, kɛŋɔ baa kpaa tɛnte baŋra daa do harɛ o che kiŋkiŋ la, ásɛ o nomonome dii dɔ jirima o dem. 24O dem nɛra wobɛlbwa ɛɛ dawɛ o nɛɛ, o naanar ne ba ɡe bii bwa saɡre o nɛɛ kɛŋɔ numoli ne loŋa aa saɡre daa ta la.
25Awola tɔpere la, tɛnte baŋra daa maa kpaara do harɛ o pa kiŋkiŋ la ɛɛ pamɔɔ le dɛ́ chole, ásɛ laala aa saɡɛ o ta la bwa chɔɡ. Men Korowiirii bola.”
Currently Selected:
Aesaya 22: mzw
Highlight
Share
Compare
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
