Aesaya 21
21
Korowii bol Babelɔn harɛ chɔɡa wa
1Waa aa chiɡ Babelɔn harɛ#21:1 Babelɔn harɛ nɔ ɛ pua hɛŋle ɡbo harɛ waa chɔ mpo nyoa. ta Korowii bol baɡle Aesaya chaahna ta laanee nɔ.
Gɛ kawulewule aa taa
dɛɛ kpɔ
pua hɛŋle ɡbo harɛ ta la,
ɡɛɛ wekpeɡa ɛɛ ba
a le harɛ waa do ɔma ta ba.
2N na waane kɛŋɔ chaahna ken
a ɛ lokua kohona.
Bane le dɔŋa dɛɛ tɛ,
bane ɡee chɔɡ kwaa
kohona.
Elam tena, hé ka lɔ tɔ ba nɛɛ
dɛ́ yoo ba!
Midia tena, hé bar
ba bwɛjena cheme,
dɛ́ tɔ ba do!
Korowii ɛɛ ɡeloo wahala
Babelɔn aa ba a ne la teŋe.
3A ɡɛ waa maa naa la ɡelɔ n
bwadabii wee mɛ
chweeh ken,
kɛŋɔ loltea aa lɔ haah ken.
Waa maa noa la ɡelɔ maa
won ɛ wobɛlbwa,
n ɛo chinchaŋ waa maa
naa la wa.
4A ɡelɔ n bambile lɔ
paupau ken,
ɔmee kohona ɡelɔ n
bwadabii bwa serewe.
Kpae maa dɛ kpa kɛŋɔ
jɔmɔra ɛɛ ba silɛɛ nee la
berɛ ɔmee kohona tɛ mɛ.
5Chaahna la bini la, n nao
kɛŋɔ baa kpɔ kondikwaa
cheɡ tiɡ ta,
dɛ pa yale pa harɛ dɛ so
a ta, dɛɛ di kwaa
dɛɛ nyɔ sen!
Buɡ la ta, taa den le ŋɔ,
“Laa sitɔɔla, hé ir!
Hé ka kpɔ dɔmkwaa
haa kpɔa dɛɛ tɔ he te
ɡbemɡbe laa ta la!”
6Korowii berɔ ŋɔ n be ŋɔ,
“Kpɔ nɛn ó kaa daah,
ásɛ wobɛlbwa waa na la
ó ba bol.
7Dɛ o baa na kwaa aa do kɛŋɔ
torɔɡore
ne jaɡre ne keeɡore dɛ
nyoɡmare laa tena so
a ta naa,
ó nyiŋ ba kɛrɛdɛ.”
8Belaa nɛn waa dɛ daah la kpɔ
takpeɡ ŋɔ,
“Nomoa, chɔɔ ne jwaana
bwaa n che dejaŋ doa
dɛɛ daah.”
9Na, baa bɛl waa cheɡɛ kon
waa do kɛ torɔɡo bini
ne jaɡre dɛ ba.
Asɛ nɛn waa dɛ daah la ŋɔ,
“Bwɛjen Babelɔn paɡrɔ!
O paɡrɔ!
Voɡare aa lɔ o ta bwa,
ba paɡre a bwa burbur ken
bil harɛ.”#Wep 14:8; 18:2
10Aesaya ŋɔ, “N nɛra, ba ɛ
heyaa kɛŋɔ baa lɔ mea ken,
waa maa noa le Koranar Bwa
Kooro, Israel tena aa dɛ
tomɔ be laanee n bol la.”
Korowii bol Edom harɛ chɔɡa wa
11Waa aa chiɡ Edom#21:11 Edom mun bɛl ɡee bɔr hela. Ba berɔ dɛɛ yerɔ Duma kɛɛ Sɛɛ. harɛ ta Korowii bol baɡle Aesaya chaahna ta laanee nɔ.
Nomɛl lɔ Edom dɛ pɛɛ ŋɔ,
“Nɛn haa dɛ daah,
aa biɡruu mɔɔ bɔr chaah
naa?”
12Anee o chaŋe ŋɔ,
“Tɔɔ dɛ ba pera,
kɛ bɔr ɛɛ berɔɔ jo ja.
Dɛ he dɛ nyin dɛ́ jemaa,
ba dɛ́ berɛ ba bɔɔ ja.”
Korowii bol Arab harɛ chɔɡa wa
13Waa aa chiɡ Arab harɛ ta, Korowii bol baɡle Aesaya chaahna ta laanee nɔ.
Dedan tena haa lɔ Arab
harɛ ta dɛ valɛ dɛɛ ɡaaɡe,
pua hɛŋle ɡbo harɛ taa
hɛɛ ba he tɛnte deene
baŋra dɛɛ chɔ jwaana.
14Tema tena, hé kpɔ kondikwaa
ne nee ba cheme banɔ la
baa chwaa le laa ta la.
15Ba chwao dɛɛ le keri,
ne hɛma baa hara
dɛɛ ba ba tae,
dɛ wekpeɡa aa lɔ laa ta
la nyoa.
16Korowii berɔ ŋɔ n be ŋɔ, “Gɛ paadii yon jemɛ kɛŋɔ benanyoa wɛɛ ba o toma tona la, ɡɛɛ Keda tena jirima bwa ɛɛ ba tona benanyoa. 17Keda laa tena baa jemɛ hɛma tae kɛrɛdɛ la aa kanee do kpa. Men Korowii Israel tena aa dɛ tom mɛ laanee bola.”
Currently Selected:
Aesaya 21: mzw
Highlight
Share
Compare
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
