Aesaya 2
2
Korowii Bwejen waa lɔ Saayɔn
1Waa Korowii aa kpɔa baɡle Emɔɔs bibaa Aesaya, a ɛ Juda harɛ ne Jerusalam harɛ ta waa nɔ.
2Tɔpere bɛl dɛ ba
ásɛ bwe Korowii Dea
aa chɔŋɛ o ta
Jerusalam la waa
ba hiah ɡwaa bwea bwa,
ásɛ o sɔn le bwea bwa bini,
ásɛ harɛre nɛra warɛ
dɛ́ ba o ta.#Sek 2:11#Mae 4:1-3
3Nɛra ɛɛ warɔɔ dɛ́ ka ŋɔ,
“Hé ba ya kaa Korowii
Saayɔn Bwejen la doa
Jerusalam,
Korowii Jekɔb
aa tomɔ la Dea.
Wɛɛ baɡle yaa o ŋwɛnɛree,
ásɛ yaa valɛ o webaɡla ta.”
Saayɔn Bwejen taa o
Mmarare ɛɛ ba lee,
bá bol baɡle o nɛra
Jerusalam bela.
4Wɛɛ bol harɛre nɛra
waa dɛ́ pa bole,
dɛ́ kwaa ba baah.
Baa beɡre ba kerii a ɛ para,
dɛ́ beɡre ba lampeare ɡe
ɡoori.
Harɛre nɛra aa dɔŋaa yo,
a ba ɛ kɛŋɔ baa hweli laa
waa kpa.
5Jekɔb naanar, hé ɡel
yaa valɛ Korowii waa aa
chaahna o kpɔ
dɛɛ tɛ yaa la ta.#Ɛfe 5:8
Korowii Tɔpere waa lea cheɡ
6N Naa Korowii, he vɛh
he nɛra Jekɔb naanar.
Ba lɔ wee leebɔr tena
wepuu ta,
dɛ berɛ voɡra
kɛŋɔ Filisti tena,
dɛ jo nɛra baa wola hen
tomɛ we-ɛɛla ta.
7Suuɡapoŋa ne suuɡaswɛm
ɡboo a ɡɛ nɛra la
harɛ bwa,
ba kondɔɔh a yoɡ aa kpeɡa
ta nyoa dɔe.
Jaɡre ɡboo ba harɛ bwa,
asɛ kwaa aa do kɛ torɔɡore
ba kpɔ dɛɛ la laa ɡe
ta nyoa dɔe.
8Voɡa ɡboo ba harɛ la ta bwa.
Kwaa ba ɡbabir aa ɛa
laanee baa tomɛ.
Ba dɛ ɡuŋi kwaa ba ɡbaɡba
aa kpɔ nɔɔra ɛa.
9Anomanta, hen Korowii ɛɛ ba
ba bɛlbwa ne harɛɛ,
ásɛ ba di sihiih.
N Naa Korowii,
bɛ ba wechɔɡa kpɔ kɛ ba.
10Hé bwa chwa ka jo bwebɔɔne
bini,
hé takapɔ dɛ́ kwi bɔɔne
dɛ́ jo a bini,
dɛ́ le Korowii bandia
ne o kpeɡri
dɛ o jirima kohona la ta.#2Te 1:9
11Nɛn nyanyini ɛɛ tonɔɔ ɡɛ saŋ,
ásɛ maŋkurae nɛwɛnyini aa
dɛ maŋkura o te la ba harɛ,
Korowii ɡbo sɔnee dɛɛ ba lee
ɡɛ saŋ.
12Nemenɛ Korowii le tɔpere bɛl
cheɡ, dɛ tɛ nɛra
baa dɛ ɛ mbarafo
ne sɔnnyin,
ne nɛra baa dɛ ɡɔɔ ba te,
dɛ́ ba ba ne harɛ.
13Wɛɛ chɔɡ Lɛbanɔn peleme
dajaŋa ne Basan dajena
ɡe bwaa,
14ne bwejaŋa ne deŋɡarejena
bwa,
15ne dejaŋa dɛ danjwɛɛre baa
maa bar bwɛɛre
a do kpeɡri bwa.
16Hale stiimaere bonadiire aa
dɛ so a bini,
ne stiimajena andɛɛɡa bwa
ɛɛ chɔɡoo.
17Nɛn nyanyini ɛɛ ba harɛɛ
ɡɛ saŋ,
ásɛ maŋkurae nɛwɛnyini
aa dɛ maŋkura
o te la tonɛ.
Korowii ɡbo sɔnee
dɛɛ ba lee awola tɔpere,
18ásɛ voɡa ɡe bwa nyoɡre kwaraa.
19Nɛra ɛɛ ɔmɔɔ kohona,
dɛ́ chwa ka jo bwebɔɔne,
dɛ́ kwi bɔɔne dɛ́ jo a bini,
dɛ́ le Korowii bandia ne
o kpeɡri,
ne o jirima kohona la nyoa,
ɡɛ saŋ waa ba jiɡri
harɛ la.#Wep 6:15-17
20Nɛra ɛɛ pa ba voɡa baa kpɔ
suuɡapoŋa
ne suuɡaswɛm ɛa,
dɛɛ toma laanee ta a wola
tɔpere,
ásɛ a berɛ daŋɡboŋre
ne jereme kwa.
21Baa kpɔ ɔmee chwa
ka jo bwebɔɔne,
ne bwejena aa peɡra la
baah,
dɛ́ le Korowii bandia
ne o kpeɡri,
ne o jirima kohona la nyoa,
ɡɛ saŋ waa ba jiɡri harɛ la.
22He bɛ hwɛɡa kpɔ do
nɛwɛnyini nɛɛ kpa.
Waa sewaa?
Bɔkwaa nɛwɛnyini ɡeɔ?
Currently Selected:
Aesaya 2: mzw
Highlight
Share
Compare
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
