Aesaya 1
1
1Baa bɛlee fa lole baa yerɔ Emɔɔs, o bibaa sɔne Aesaya. Korowii pili waane bini kɛŋɔ deera ken baɡle Aesaya, aa ba Juda harɛ ta ne Jerusalam chiɡa. O naa ɡɛ saŋ koranar bane aa di kora teŋɛ dɔŋa nɛɛ Juda harɛ ta, banee Ussia#2We 26:1, 22 ne Jotam#2Ko 15:32 ne Ahas,#2Ko 16:1 dɛ Hɛsɛkea.#2Ko 18:1
Korowii bol o nɛra wechɔɡa wa
2Aesaya ŋɔ, Nɛra haa lɔ
nyundua ne harɛ,
hɛ́ɛ no waa Korowii aa bola!
“N dɛɛ n bii dɛ nyiŋ ba ba
kpeɡ,
kɛ ba kpaŋe n nɛ.
3Nao jemɛ o dɔɔ,
asɛ keeɡo jemɛ kon o dɔɔ
aa kpɔ kondikwaa
do o bini dɛɛ tɛo.
Kɛ n nɛra Israel tena te
aa men jemɛ,
baa waa mun no.”
4Wechɔɡ-ɛɛra ɡbo harɛ,
nɛra ba wechɔɡa
aa ɡwaa ba nɛ,
wechɔɡ-ɛɛra naanar ɡboɡbo,
he vɛh Korowii,
dɛ berɛ habɔɔ kpoo.
He dɛ nyiŋi Israel tena
Nɛŋɡoroŋ la nyubaah.
5Bɔkwa waa he ta do he
kpaŋa nɔ ta nɔɔ?
Deŋnetɛra besoo he ta ɛɛ
nyin jaɔ?
He bwadabii bwa dɛ we heya,
he sie ta harɛ chole.
6Le he nyu ta ba ta harɛ,
he bobɛlbwa toole dɛ do
kpeɡri.
Ŋwɛra ne bela aa darawa
ne chale ɡboo he bwa.
Ba ta an jaɡrɛ,
á ba ɛ kɛŋɔ baa do tɛɛɡa
a taa dɛ́ vɔwa.
7He harɛ berɛ dimɡbia,
nomɛlbwa toole o ta.
Ba kpɔ nii do he bwɛjena
ta a fuh,
hɔɔhra dɛ di he kooni kwa,
he siwi taa baa chɔɡ
a bwa.
8Jerusalam chɔ pɛɛ kɛŋɔ kuku
waa cheɡɛ daa koo ta ken,
kɛŋɔ kuku waa cheɡa pɛɛ
mea koo ta ken,
kɛɛ bwɛɛ baa baro cheme
dɛɛ ba o yoi ken.
9Dɛ Koranar Bwa Kooro fe ta
ya nɛn tamaa bane ɡelaa,
ya bwa fe serewɔ kwaraa
kɛŋɔ Sodom ne Gomoora
tena ken.#Rom 9:29
10Jerusalam tena, he ne he
nomonome baa dɛ nyiŋi
harɛ la ta,
he do kɛŋɔ Sodom
ne Gomoora tena ken.
Hé no waa Korowii aa dɛ bol
he be,
hé cheɡ deŋne dɛ́ no waa
Korowii yaa dɛ tomɔ nɔ
aa dɛ baɡle heya.
11O ŋɔ,
“Bɔkwaa kwaa haa dɛ kpoo
kohona dɛ kpɔ ɛ saraha
dɛɛ tɛ mɛ la ɛɛ baɡleɔ?
Kwaa haa kpoora dɛ fuah
dɛ kpɔ dɛɛ jam mɛ,
pebala, ne ola noorare
pe mɛ,
nae ne pebiiri ne
boohna chale aa men pɛla
dɔ.#1Sa 15:22
12He dɛ ba dɛ́ ba tom mɛ naa,
umee ŋɔa he ba nɔ?
Bɔkwaa dɔ n soŋnibɔr ba
tiɡra ɔ?
13He saraha kwaa bɛlbwa
ta tɔnɔ dɔe n be kpa.
Hé ɡel a ne bala.
N kii konsɔɔhsoma
haa dɛ fuah.
He wechɔɡa bɔle he
korobifala, ne Ona Tɔpera,
ne he chema
haa chema dɛɛ tom mɛ
bwa ta.
14N bambile aa he Korobifala
Tɔpejena dii ne tɔpejena
haa lea cheɡ dɛɛ di kwa
dɛɛ lɛ sie a ta la lawɛ.
Name te n koɔh, a le n mee.
15He ir nɔɔra dɛɛ soŋ mɛ naa,
mɛɛ laa sie kpɔ he nɛ.
Hale he soŋ mɛ ɡɛ bɛlbwa
kwaraa noo, maa no.
Nɛra haa kpoora chal
maa he nɔɔra bwa.
16Hé sɔ he wechɔɡa ta
dɛ́ laa doŋa bɛlbwa
kpɔ he nɛ.
Hé laa he wechɔɡwe-ɛɛla
la kpɔ le n sie!
Hé ɡel a ɛɛ,
17dɛ́ do sie wedɛɛɡa ɛɛ ta!
Hɛ́ɛ teŋɛ kasinteŋ ŋwɛnɛ ta,
dɛɛ cha nɛra baa dɛ ɛɛ ba
hɔhɔrɔwa.
Hɛ́ɛ bol bilalbii ne
luhaahna waa dɛɛ tɛɛ ba.#Kaa 22:22
18Men Korowii ŋɔ he be ŋɔ,
Hé ba ya pɛ kpɔ liire.
Dɛ he wechɔɡa kan dɛ chɔɡ
heyaa kɛŋɔ kombiŋere
yon chɔɡ kompoŋ la aa,
mɛɛ ɡeloo he to kpelkpel
kɛŋɔ yabi ken.
Hale dɛ a biro kpirkpir kɛŋɔ
sibire kwaraa naa,
mɛɛ ɡeloo he to
kɛŋɔ pepoŋ pona ken.
19Dɛ he ɛ deŋnepwɛr
dɛ no n be te naa,
hɛɛ dɔ harɛ la ta
kondɛɛɡaa di.
20Kɛ dɛ he vɛoh dɛ ta do he
kpaŋa la ta te naa,
laa nyoa hɛɛ ba kae.
Men Korowiirii bola.”
21Bwɛɛ kasinteŋ diile fa
aa lɔ o ta,
taraken ba do kɛŋɔ
haah waa le o jaa habɔɔ
dɛɛ nyin baala ken.
Nɛndɛɛɡa ɡboo fa o bwa,
kɛ taraken nɛŋkpoa
su o bwa.
22Bwɛɛ he fa aa do kɛŋɔ
suuɡapoŋ la,
taraken haa were kpa.
He fa do kɛŋɔ sendɛɛɡa,
kɛ taraken he do kɛŋɔ
baa pule nee a ta ken.
23He nomonome kpaŋe n nɛ,
dɛ berɛ ka kpɔ ŋwɛɛra
ɛ ba chamene tena.
Ba dɛ nyin kɛ nɛra ɛɛ
yaɡ ba sen,
dɛ berɛ dɛɛ teŋɛ koŋkɛɛla
ɡbo ta.
Baa bilalbii waa bolɛ
dɛɛ tɛɛ ba kɛrɛdɛ,
ɡɛɛ baa wola sie do
luhaahna waa ta.
24Anomanta, Korowii,
Koranar Bwa Kooro,
Israel Kpeɡnɛn la ŋɔ,
“Namete he berɛ n dɔma
n bwaawee ir he nɛ.
Mɛɛ tɛr he deŋnee bɔ kem
ásɛ n baah sɔɔh mɛ.
25Mɛɛ tɛr he deŋnee kohona,
dɛ ɛ heyaa kɛŋɔ ba yon kpɔ
suuɡaswɛm do nii ta dɛ laa
o doŋa kpɔ o ta la ken.
26Mɛɛ berɔ ɡel he dɔ nɛra
baa bol he waa dɛɛ pa
bole,
ne nɛra baa dɛɛ ja heyaa
kɛŋɔ he fa aa dɔɔ
ba wubwa la.
Ásɛ mɔɔ bá berɛ yerɛ heyaa
Kasinteŋ Diile bwɛ,
Nɛndɛɛɡa bwɛ.”
27Waa bola dɛ́ pa bole
kasinteŋ ne taa
Korowii ɛɛ ba cheɡa
dɛ́ lɛ Saayɔn tena.
Nɛra baa charɛ ba liire
dɛɛ ɛ waa aa toɡra la,
wɛɛ lɛɛ baa.
28Nɛra baa kpaŋe o nɛ,
ne wechɔɡ-ɛɛra la,
wɛɛ pɛo chɔɡ ba bwa.
Asɛ nɛra ba ɡe aa vɛoh la,
ó kpoo ba ɡe.
29“Sihiih ɛɛ kpo heyaa daa haa
dua dɛɛ toma la waa.
Hɛɛ di nchoo bela
haa du kwaa
dɛɛ tomɛ voɡa a baah ta la
waa.
30Hɛɛ ɛo kɛŋɔ dajen o papooni
aa jwala dɛɛ chure ken,
dɛ́ do kɛŋɔ daa baa dua
baa wola nee a mune
do ken.
31Bokpeɡa tena ɛɛ ɛo kɛŋɔ
daa aa hola ken,
asɛ ba toma baa toma ɡe
do kɛŋɔ nii ken.
Kombele anɛ nɔ bwa ɛɛ pɛo
dɛɛ fuh nomɛlbwa
aa wola won dima.”
Currently Selected:
Aesaya 1: mzw
Highlight
Share
Compare
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
