Aesaya 10
10
1Nɛra baa dɛ do mmarare
aa wola aŋwɛnɛ ta ɛɛ,
ne mmarakpeɡa dɛ́ fiiɡi
nɛra la, ba bwɛɛlɛ.
2Ba laa nyaara waa sie
dɛɛ berɛ,
dɛ laa nɛra baa lɔ
wahala ta waa dɛɛ ɡole,
dɛ lɛ luhaahna kwaa
dɛɛ le ba be,
dɛ berɛ dɛɛ kah bilalbii
ɡe kwa.
3Ɛrɛɛ hɛɛ ba ɛɛ awola Korowii
aa dɛ ba he deŋne tɛra,
ne wenaale aa le bojaŋ
ba he nɛɛ laɔ?
Umee hɛɛ ba chwae ka
marɔɔ?
Leperaa hɛɛ ba he kondɔɔh
la ɡela ɔ?
4Wobɛlbwa toole hé ɛ kpa,
nemenɛ hé ja nɛra baa
laɡ ba laa ta,
kɛɛ banɔ la
baa ka kpoo la nɛ.
Anɔ nɔ bwa habɔɔ,
o baah aa sɔɔh,
o nɔn waa ira dɛ́ tɛr ba
deŋne la ɡe ta cheɡɛ ɡɛ.
Asiiria tena bole pae
5Korowii ŋɔ,
“Asiiria tena bwɛɛlɛ!
Mɛɛ kpɔ baa ɛ kɛŋɔ n ɡuli
maa kpɔ dɛɛ tɛr nɛra
n baah aa di ba nɛɛ deŋne.
6Nɛra baa wola men tomɛ
la bee mɛɛ ba Asiiria tena
toma,
nɛra baa dɛ ɛ n bandiwaa
la bee mɛɛ ba
ba doe bá ka yoo ba,
dɛ́ pa ba laala
dɛ́ kah ba kondɔɔh,
ásɛ dɛ tiɡri ba nɛɛ
kɛŋɔ kpechɛɡre
aa lɔ fɔɡbaahna ken.
7Kɛ Asiiria koojen te fe
aa an ɡɛ nyin,
dɛ o liire laa.
O waa bwaa kɛŋɔ o fee den
chɔɡ harɛre ɡalɡa bwa
kwara.
8O dɛ maŋkura o te ŋɔ, ‘N laa
sitɔɔla bwa ɛ koranar!
9Gɛ maa chɔɡ bwɛjena Kaakɛmes
ne Kalno ne Aapad ne
Hamat dɛ Damaskɔs la,
ɡɛɛ n chɔɡ Samaria ɡe.
10Gɛ maa wona tɛr harɛre a
voɡare aa wara dɛ ɡwaa
bwɛjena Jerusalam ne
Samaria voɡare deŋne la,
11maa won ɛ Jerusalam harɛ
ne o voɡare ɡe ɡɛ maa ɛ
Samaria harɛ ne o voɡare
la kɛɛ?’ ”
12Dɛ Korowii baa tonɛ ɡɛ waa ɛ nɛra baa lɔ Saayɔn Bwejen doa ne Jerusalam bwa naa, wɛɛ ŋɔɔ, “Mɛɛ ba tɛr Asiiria koojen deŋnee o mbarafo ne nyiŋa waa nyiŋi nɛn dɛɛ vah la wa. 13Dɛkalkɛ o dɛ bol ŋɔ,
‘N ɡbabir bokpeɡa ne n
wejemaa n kpɔ ɛ waa nɔ
bwa.
N chɔɡ harɛre jwɛhre dɛ yoo
ba dɛ pa ba kondɔɔh.
Banyoo tentenee men.
N ir koranar ba kora ta.
14N pa ba kondɔɔh kɛŋɔ
jumbie kɔr ne hala ken.
Gɛ nɛn yon ka pu kwaa hala
kɛŋɔ a chɔ pɛɛpɛɛ
o yon pa la,
ɡɛɛ n kpɔ harɛre la bwa.
Bɛlbwa ta parawe kɛɛ
dɛ si.’ ”
15Kpanfɛ ɛɛ won ŋɔ o ɡwaa
nɛn waa kpɔɔ
dɛɛ teŋe daa aa,
kɛɛ saradaa ɛɛ won ŋɔ o
ɡwaa naate waa dɛ ɛ
o ne toma aa?
Guli ɛɛ won ɡɔɔ o te
dɛ nɛn laa kpɔɔ waa?
Kɛɛ da ɛɛ won ɡɔɔ nɛn aa?
16Anomanta, Korowii,
Koranar Bwa Kooro
ɛɛ kpɔ ɡwaŋa weelaa ta
Asiiria koojen laa tena baa
kpeɡa kohona nɛ,
ásɛ dɛ chɔɡ o jirima kɛŋɔ
nii yon fuh kon tonɛ la.
17Korowii waa do kɛ kandea
dɛɛ chaah Israel tena,
wɛɛ berɛ niinii
dɛɛ chɔɡ kwa.
Korowii Waa Do Goroŋ
Israel tena ɛɛ tomɔ la,
ɛɛ berɛ ninlawee,
dɛ́ fuh komɛlbwa
tɔpebeŋkpoŋ,
hale sɔɔhne ne
jabalnadaŋɛ bwa.
18Wɛɛ fuh kɔne aa wera,
ne harɛdɛɛɡa bwaa kwara,
komɛlbwa ɛɛ chɔɡoo.
Aa ɛo kɛŋɔ serewe weela aa
lɔ nɛn nɛɛ la.
19Daa aa ka o kɔr la bini la,
tamaa kenii dɛɛ ba kae,
ásɛ bechajeɡa
kwaraa won kura.
Israel tena baa kaa wa
20Gɛ saŋ la, Israel tena
baa kaa la
aa hwɛɡaa dɔ Asiiria
koojen waa lɔ ba harɛ la
nɛɛ kpa.
Korowii Israel Nɛŋɡoroŋ la
nɛɛ baa ba ba kpɔ
ba te dawɛ
kasinteŋ ne.
21Ba bini tama ɛɛ berɔɔ ba
Nemenɛ Korowii be.
22Israel tena, dɛ he warɔ kɛŋɔ
mpo nyoa hɛŋle
kwaraa naa,
he tamaa dɛɛ ba kae
dɛ́ berɛ ba.
Chɔɡa chɔ le dɛɛ kpa heya.
Gɛ Korowii aa cheɡ
heyaa la, he chɛ ɡɛ.#Rom 9:27-28
23Korowii, Koranar Bwa
Kooro dɛɛ ba
chɔɡa waa vɔrɔwa cheɡ la
ne bala ba ta harɛ la
bwa ta.
24A ɡɛ nomanta, Korowii, Koranar Bwa Kooro dɛ bol ŋɔ,
“N nɛra haa lɔ Saayɔn,
hale dɛ Asiiria tena kpɔ
daa dɛɛ lɔɔ heyaa
ɡɛ Ijipt tena fa aa
ɛ heyaa la aa,
hé bɛ ban ɔmɛ.#2Ko 19:35
25A ka tamaa ken dɛ n baah
sɔɔhnɔ,
maa hé deŋnee tɛr kpa,
ásɛ dɛ berɛ n bandia ta
Asiiria tena ɡe nɛɛ
dɛ́ chɔɡ ba.”
26Koranar Bwa Kooro ɛɛ
lɔɔ baa chweema nee,
ɡɛ waa ɛ Midian tena dɛ
kpoo ba Oreb bwe ta la.
Wɛɛ ir o daŋɡbalaa pa nee ta,
ɡɛ waa ɛ Ijipt tena ba ka
nee ta la.#Sit 7:25
27Mɛɛ laa wahala baa dɛ
ɛ heyaa a berɛ heyaa bone
laanee kpɔ he nɛ,
ásɛ wobɛlbwa le he baŋa a
ɡɛ saŋ.
28Hé na! Laa tena jo bwɛjen
Aiyat,#10:28 Aiyat sɔna ane ɡee Ai ne Aija.
dɛ kpɔ Meɡrɔn dɛɛ ba,
dɛ ka kpɔ bone ka cheɡ
Mikmas.
29Ba le ŋwɛnɛ waa chɔa kaa
Geba baŋ,
dɛ ŋɔ, “Yaa ka chɔ Gebaa
jwaana la bwaa.”
Ɔmee lawɛ Rama tena ba
bwara ɛɛ sa,
Kooro Sɔɔl bwɛɛ Gebea
tena ir chwa.
30Galim tena, hé do lɔŋɔre!
Nɛra haa lɔ Laisa ɡe,
hé no.
Anatɔt tena, hé waa sum.
31Madmena tena dɛ chwaaɡe,
ásɛ Gebim tena ɡee ir ba
buɡ ta dɛ́ kaa nyin ba nyu.
32Fini tɔpere nɔ, baa bao
dɛ́ ba che Nɔb.
Baa nyiŋi Jerusalam
Saayɔn Bwejen la taa,
dɛ́ ume nɔɔra
pa ba nɛɛ dɛɛ aah ba.
33Hé no! Korowii,
Koranar Bwa Kooro
ɛɛ ba ba ne harɛɛ,
kɛŋɔ baa choo daa
dɛɛ ta la ken.
Dajaŋa la, wɛɛ teŋaa ɡo,
dajena ɡe bwa choɡli.
34Wɛɛ teŋ baa ta,
kɛŋɔ baa kpɔ kpanfɛ teŋni
kɔr baah daa dɛɛ ta la ken.
Ba kpeɡri kɛŋɔ Lɛbanɔn daa
kwara naa, wɛɛ teŋ baa ta.
Currently Selected:
Aesaya 10: mzw
Highlight
Share
Compare
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
