Aesaya 11
11
Kora deŋnesɔɔhna aa lɔ o ta
1Kooro bɛl ɛɛ le Jese bie
Devid luɡe taa dɛ́ ba,
kɛŋɔ daa yon pamɛ le o
muŋkpul ta,
dɛ dɔ kpala dɛ nɔnɛ la.#Weɛ 13:22-23#Jer 23:5-6
2Korowii Doma ɛɛ so o nɛɛ,
dɛ́ ɡel o dɔ wejema ne waa
mun noe,
dɛ́ jemɛ nɛra jae
dɛ́ dɔ kpeɡri,
dɛ́ berɛ ɡel ó jemɛ Korowii
waa bini dɛɛ duuru.#Mat 3:16
3Korowii duuraa dɛ́ lɛ o sie.
Waa nɛra siebɔree nyiŋi
dɛ́ pa bole,
waa nɛra wobol taa teŋɛ
dɛ́ pa bole.
4Ŋwɛnɛ waa toɡra taa wɛɛ ba
cheɡa,
dɛɛ bol nɛra aa hiah ba wa,
dɛ́ pa bole,
kasinteŋii wɛɛ ba kpɔe
dɛ́ bol harɛ nɔ ta nyaara
waa tɛɛ ba.#2Te 2:8
O nyoa wobolee wɛɛ ba kpɔe
tɛr nɛn deŋne,
waa waa bol la ɛɛ kpoo
wechɔɡ-ɛɛraa.
5Waa aa toɡra ne kasinteŋii
wɛɛ ba kpɔe ɛ kiriso,
dɛ́ kpɔ vɔwɛ o chara.
6Gɛ saŋ, ɡbolo ne pebie ɛɛ pɛ
bobeŋkpoŋii,
noniete ne booh pɛ chɔ.
Nao bie ne puadɔɔ ɡe pɛ
bobeŋkpoŋ dɛɛ di,
bechala ɛɛ teɡa.#Hos 2:18
7Nao ne sisire ɛɛ pɛo
dɛɛ di bobeŋkpoŋ,
a bii ɡe pɛ dɛɛ chɔ,
puadɔɔ chwe kpɔɡa
kɛŋɔ nao ken.
8Bechala ɛɛ huuhnuu ka hɛlɛ
bɔɔ biro aa lɔ o bini nyoa,
bechala ka kpɔ nɔn do
domkpule bɔɔ bini waa on
wobɛlbwaa ɛ.
9Nɛra aa ba dɔŋaa kpo kɛɛ
dɛ chɔɡ komɛlbwa kpa,
Korowii Bwejen waa do
ɡoroŋ la ta.
Nɛra ɛɛ jemɛ Korowii harɛ la
bwa taa,
kɛŋɔ mpo aa yɛɛra la ken.#Hab 2:14
10Awola tɔpere la, Jese naa waa dɛ ba bala la ɛɛ cheo tɛ harɛre nɛra bwa kɛŋɔ fraŋkaa, ba bwa ɛɛ ba cheme o siee bela waa lole la, dɛ́ kpɔ jirima tɛo.#Rom 15:12 11Awola tɔpere la, Korowii ɛɛ berɔ che o kpeɡri ta lɛ o nɛra baa kaa dɛ le Asiiria ne Ijipt ne Patrus, ne Itiopia ne Elam ne Babelɔn, dɛ Hamat harɛre bwa, dɛ banɔ la bwa baa lɔ bojaŋa harɛre ta.
12Wɛɛ ir fraŋkaa harɛre nɛra nɔ
bwa na,
dɛ́ boa Israel tena
baa laɡ ba
ka so harɛre ta la nyoa,
dɛ́ ɡel Juda tena baa peɡra
kaa harɛ nɔ ta
bobɛlbwa la bwa ba cheme.
13Israel tena sie aa Juda tenaa
beɡre kpa,
Gɛɛ Juda tena ɡe aa wola
Israel tenaa dɔm kpa.
14Baa pɛo dɛ́ lɔ ka tɔ
Filisti tena
baa lɔ wee cholibɔr nɛɛ
dɛ́ yoo ba,
dɛ́ ka kah banɔ la
baa lɔ wee leebɔr la
ɡe laala kɛ laa ta kwa,
dɛ́ kpɔ nɔn dawɛ Edom ne
Moab tena nɛ,
Amɔn tena berɛ ba bechale
dɛɛ tom ba.
15Korowii ɛɛ ɡeloo Ijipt mpo
kpale la hweeh kwaraa,
ásɛ dɛ berɛ ir nɔn pa
Yufretis Moo la ta,
peuwɔb bɛl ta kpɔ o ta,
ásɛ o peɡri nenabɔɔne
anuanɛ,
nɛra won do naŋɡawa
dɛ́ jo dɛɛ le o baŋ.
16Ŋwɛnɛjen ɛɛ chɔɔ tɛ o nɛra
baa kaa,
dɛ́ le Asiiria harɛ la ta,
ɡɛ ŋwɛnɛ fa aa chɔa tɛ
Israel tena
ɡɛ saŋ baa le Ijipt harɛ ta
dɛɛ kaa la.
Currently Selected:
Aesaya 11: mzw
Highlight
Share
Compare
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
