Hosia 2
2
1Korowii ŋɔ Hosia yerɛ o bala Israel tena la ‘Korowii nɛra’ ne ‘Korowii nɛnnyina.’
Korowii tɛr Israel tena deŋne dɛ berɛ lɛɛ ba
2Korowii ŋɔ Israel tena be ŋɔ,
“N bii, hé soŋe he bala
baa do kɛŋɔ haah
o jwamane nomanta,
n haah naa wola on ɛɛ,
o ɡe jaa laa men la,
ó ɡel o bannyin la,
dɛ́ ɡel jwamanwaa la.
3Dɛ ɡɛ laa, mɛɛ wuruu
o che muŋɡbal kɛŋɔ
awola baa lolɔ la ken.
Mɛɛ ɡeloo ó do
kɛŋɔ pua hɛŋle ɡbo harɛ,
dɛ́ do kɛŋɔ harɛ waa hola,
ásɛ nyɔɡre kpoo ó sewɛ.
4Maa o bii waa nyin,
dɛkalkɛ sɛmbiirii ban.
5Ba nya le n habɔɔ,
dɛ ka di sɛm lolɛ sihihbii.
O ŋɔ, ‘Mɛɛ teŋɛ banfala nɛɛ
dɛ́ kpɔ n te tɛɛ ba,
ásɛ ba tɛ mɛ
kondikwaa ne ne,
ne pee pona yale
ne yapondɛɛɡa,
ne ɔleve noo dɛ sen.’
6Anomanta, mɛɛ kpɔ sɔɔhnee
tɔɔ ŋwɛnɛ.
Mɛɛ tɔɔ do
waa wola won dɔ bɔr le.
7Wɛɛ ti baala laanee,
kɛ waa ban pu,
wɛɛ nyin ba bɔree,
kɛ waa ban na.
Ásɛ dɛ ŋɔ,
‘Mɛɛ berɔɔ kaa
n jaloɡle be,
belaa wera tɛ mɛ ɡwaa
taraken.’
8O ɡbabir ta liire kɛŋɔ
menee tɛo kwaa kɛŋɔ mea,
senfala ne ɔleve no,
ne suuɡapoŋa dɛ suuɡaswɛm
kohona,
o kpɔ kaa tomɛ voɡ Baal la.
9Anomanta, mea koma telaa,
mɛɛ ba lɛa,
dɛ́ ba lɛ n sen senfala saŋ.
Dɛ ba lɛ n pee pona yale,
ne yapondɛɛɡa
maa kpɔa tɛo
o tɔ o mumɡbal ta la.
10Mɛɛ wuruu ó che
mumɡbal o sɛnanar la sie,
nomɛlbwa aa wola won lɛo
le n nɔn ta.
11Mɛɛ ɡeloo o tɔpejena
dii ba a jaɡa.
Benanyoa ne Korobifala
Tɔpejena,
ne Ona Tɔpera dii
dɛ tɔpejena
waa lea cheɡ bwa.
12Mɛɛ chɔɡ o ɡrepo
ne fiɡ daa
waa ŋɔa o sɛnanar la
kpɔɔ bɔɔ kem la.
Mɛɛ ɡeloo o daa kooni baah
moɡɛ kohona,
ásɛ kpɔɡ bini ola
ba di a nɔna.
13Mɛɛ tɛr o deŋnee,
tɔpera waa fuh daawiile a
sɔɔh aa soma tɛ
voɡa Baalre la,
ne suuɡaswɛm nɔnloɡa,
ne baŋa kwa dɛ noniseɡa
waa doa dɛ teŋɛ
o sɛnanar nɛɛ
dɛ soh n waa la wa.
Men Nemenɛ Korowiirii bola.
14Anomanta, mɛɛ lawɔɔ,
dɛ́ kpɔɔ kaa pua hɛŋle
ɡbo harɛ ta, dɛ́ ka kpɔ
sɛmwobol ɡbɛɡbɛo.
15Mɛɛ berɛ o daa kooni
laanee tɛo, ásɛ dɛ berɛ
Akɔ#2:15 Hibru tena wobol ta, Akɔ munii wahala. Fɛlembɔjen
la bela hwɛɡa aa lole.
Belaa wɛɛ ba yela ɡoe silɛɛ
ne kɛŋɔ o toli saŋ,
ne ɡɛ awola tɔpere waa
le Ijipt harɛ ta la ken.
16Awola tɔpere la,
wɛɛ yer mɛ ‘n jaa’,
waa men ‘n dɔɔ’ yerɛ kpa.
17Maa ɡel ó yerɛ voɡa Baalre
sɔna, waa a waa bol kpa.
18Awola tɔpere la,
n ne kpɔɡ bini ola
ne jumbii,
ne kwaa aa dɛ tuuɡi tea ta
dɛ anɔ la aa dɛ huuh
ɛɛ fɔwɛ fɔwee,
ásɛ a bɛ
n nɛra wobɛlbwa ɛ.
Mɛɛ le laa ne dɔmkwaa kɛŋɔ,
to ne hɛma dɛ tokobie
bwa nee harɛ la taa,
ásɛ bɛlbwa dɔ deŋnesɔɔhna
harɛ la ta.#Aes 11:6
19Mɛɛ kpɔ hen Israelee ɛ
kɛŋɔ n haah
saŋ bɛlbwa dɛɛ la,
mɛɛ di kasinteŋii,
maa he habɔɔ le.
N nyina aa wola jaɡa dɔe
he nɛɛ aa tona ba bwa,
mɛɛ dɔ tedomaa tɛɛ,
ásɛ he ɛ n haah
saŋ bɛlbwa.
20Mɛɛ teŋɛ n nyobaɡa taa,
dɛ́ kpɔe ɛ n haah,
ásɛ he jemɛ kɛrɛdɛ
kɛ menee Korowii.
21Awola tɔpere la, mɛɛ no n
nɛra Israel tena wesoŋaa,
ásɛ dɛ ɡel bwaala
nɛ harɛ la ta,
22ásɛ mea ne ɡrepo ne ɔleve
do wer
Jesreel#2:22 Hibru tena wobol ta Jesreel munii Korowiirii dɛɛ du. Fɛlembɔjen bini.
23Mɛɛ kpɔ n nɛra Israel tenaa,
ásɛ ba ba so harɛ la ta,
nɛra n fa aa ŋɔa
‘Maa ban nyin la,’
ń berɛ nyin ba wa.
Nɛra maa ŋɔa
‘Ba ta n nɛra ɛɛ la’,
ń berɛ ŋɔ ‘Hé ɛ n nɛra’,
ásɛ ba ŋɔ, ‘Henee Korowii
yaa dɛ tomɛ la.’ ”#1Pi 2:9
Currently Selected:
Hosia 2: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
