Ɛsekeɛl 44

Kooro ne Lewi dea tena dɛ sɔfore

1Belaa baa la lawɛ men Ɛsekeɛl ba Korowii Dea la wee leebɔr doonyoa la ta, dɛ o tɔɔ. 2Ate, Korowii ŋɔ n be ŋɔ, “Den ɡel doonyoa nɔ tɔ ɡɛ. Bɛ on pili, nomɛlbwa ɡe bɛ o ta kpɔ, dɛkalkɛ men Korowii Israel tena aa dɛ tom mɛ la, n kpɔ o ta. 3Kooro ɡboo dɔ ŋwɛnɛ dɛ́ jo ka di kondikwaa aa do ɡoroŋ n sie bela. Bela baa cheɡa dɛɛ jo laanee chɛ kɛ o che jo, dɛ́ berɛ che o ta le.”

4Baa la kpɔ mɛ kpɔ weekaŋle nyunduabɔr doonyoa ta, dɛ ba n ne Korowii Dea la sie. Asɛ n na kɛŋɔ Korowii jirima baa su o Dea la bini bwa, asɛ n ba harɛ dɛ kpɔ sie pi harɛ.

5Korowii ŋɔ n be ŋɔ, “Nɛwɛnyini bie, cheɡ deŋne kɛrɛdɛ, dɛ́ no n mmarare ne waa bwa aa chɔ le tɛ n Dea la. Do sie dɛɛ nyiŋi doonyoo ne bɔra baa cheɡɛ a ta jo dɛɛ le a ta bwa. 6Ŋɔ Israel lwɛmkpeɡ tena la be ŋɔ men Nemenɛ Korowii dɛ bol kɛŋɔ, ‘Israel tena, waa maa kia hɛɛ ɛ la maɡre ɡɛ. 7A bwa habɔɔ, he ɡelɔ nɛŋhɔɔhra baa wola ba pena teŋe, baa wola men duu, ba jo n Dea la ta, dɛ kpɔ doŋa kaoh, ɡɛ saŋ haa kpɔ kondikwaa ne ola noorare, dɛ a chale ba ɛ saraha dɛɛ tɛ mɛ. A cheɡɛ a ta he chɔɡ n ne he fɔo la. 8Heyaa chɛ kɛ he nyiŋi n waa aa do ɡoroŋ ta n Dea bela, kɛ he berɔ kpɔ do nɛŋhɔɔhra nɔn ta. 9Anomanta, men Nemenɛ Korowii ŋɔ nɛŋhɔɔhra baa wola ba pena teŋe, baa wola men duu, ta chɛ kɛŋɔ bá jo n Dea la bini, hale nɛŋhɔɔhra baa soɡe he Israel tena bini.’ ”

10Korowii ŋɔ n be ŋɔ, “Mɛɛ tɛr Lewi dea tena ba ne Israel tena aa le n habɔɔ dɛ kaa tomɛ voɡa la deŋnee. 11Ba ken ɛɛ dɔ bɔree dɛɛ daah n Dea doonyoo la, dɛɛ ɛ toma bela. Baa kpo saraha kwaa baa fuah, ne nɛra la kwaa baa kpoora, dɛɛ cha ba. 12Baa tomɛ voɡa dɛ ɡel Israel tena ɛ wechɔɡa nomanta, n ir nɔn dɛ ŋwɛɛ kɛŋɔ a chɛ kɛ ba dɔ deŋnetɛra ba wechɔɡa la wa. Men Nemenɛ Korowiirii bola. 13Ba bɛ n sie ba, dɛ́ ba tom mɛ kɛŋɔ sɔfore, kɛɛ dɛ́ ŋɔ baa tuuhnu tel kwaa aa do ɡoroŋ, ne saraha aa do ɡoroŋ kohona la bɛlbwa. A chɛ kɛ sihiih kpo ba, baa dɔ deŋnetɛraa waa maa kia ba ɛ la wa. 14Kɛ ane a bwa, mɛɛ kpɔ tomkpeɡa aa chɛ kɛ baa ɛ n Dea bela la bwaa do ba nɔn ta.

15Kɛ Sadɔk naanar baa ɛ Lewi dea sɔfore dɛ kpɔ kasinteŋ ba tom mɛ n Dea bela, ɡɛ saŋ Israel tena aa le n habɔɔ la, banee ba n sie bela dɛ ba tom mɛ. Kɛ taraken, bá ba che n sie dɛ́ kpɔ ola noorare ne a chale ɛ sarahare dɛɛ tɛ mɛ. Men Nemenɛ Korowiirii bola. 16Ba ɡboo dɔ ŋwɛnɛ dɛ́ jo n Dea la ta, banee dɛ́ suuh tel n saraha kon la, dɛ́ɛ ɛ n Dea bela toma bwa.

17Ba cheɡɛ dembaah doonyoo la ta jo n Dea la bini naa, a chɛ kɛ bá do yapondɛɛɡa laala. A ta chɛ kɛ bá do komɛlbwa baa kpɔ olpona ɛo ba jo bini dembaah kɛɛ n Dea bela, dɛ́ ɛ toma. 18Bá kpɔ yapondɛɛɡa baa vɔwa nyuune ne a yapebori. A ta chɛ kɛ bá do komɛlbwa aa ɡel bɔwɔb laɡ ba. 19Mɔɔ ba le ka jo habɔɔ dembaah la ta bela nɛra aa lole la, bá foo laala baa doa ɛ toma la bil deene aa do ɡoroŋ la bini. Bá kpɔ laala pɛɛne do, ásɛ a bɛ waa kpɔ ba ta nɛra la nɛ.

20Sɔfore bɛ ba nyumpona paa ta, ba bɛ ɡel a moɡɛ kohona ɡe. Bá fona a ba harɛ. 21Sɔfo bɛlbwa dɛ ba Dea la bini dembaah la ta joe yaa, o bɛ sen nyɔ. 22Sɔfo ta chɛ kɛ ó mo luhaah kɛɛ haah o jaa aa vɛoh. Wɛɛ won mo Israel bihaah waa wola baa jemɛ, kɛɛ luhaah sɔfo aa sewa ɡelo. 23A chɛ kɛ sɔfore la chaɡle n nɛra wa, dɛ́ ɡel ba jemɛ kwaa aa do ɡoroŋ ne kwaa aa wola ɡoroŋ doe, dɛ́ pere kwaa doŋa aa lɔ a ta le kwaa doŋa aa wola toole a ta.

24Nomɛl ne o dɔŋ dɔ waane aa, sɔfore laanee dɛ́ nyiŋi a ta, dɛ́ bola, ɡɛ aa lɔ me Mmarare ta la. A chɛ kɛ baa teŋɛ me Mmarare ne n waa maa kpɔa tɛɛ ba bwa ta, n tɔpejena maa lea cheɡ bwa, ásɛ dɛɛ di n Ona Tɔpera la, dɛ́ ɡel a do ɡoroŋ.

25Sɔfo bɛlbwa ta chɛ kɛ o leɡe nɛn waa sewa dɛ́ kah doŋa, nemenɛ o nya ne mɛɛ, bibaa kɛɛ bihaah, o nime kɛɛ dɔɔ kɛɛ nimambie waa wola yalɛ mɔɔ. 26Dɛ o kah doŋa ba sɔɔ taa, ó so tɔpera anuanɛ. 27Awola waa ba jo Korowii Dea, o bini dembaah la ta bela dɛ́ ba ɛ toma la, ó ɛ wechɔɡa kpɔe dɛ́ kɛ saraha tɛ o te. Men Nemenɛ Korowiirii bola.

28Menee dɛ́ tɛ sɔfore la komɛlbwa baa dɛ nyin. He bɛ ban Israel harɛ la pera tɛ. Menee ba kondɔɔh.#Kur 18:20 29Banee dɛ́ di mea sarahare, ne wechɔɡa kpɔe dɛ́ kɛ sarahare, ne bolchɔɡe dii sarahare, dɛ komɛlbwa Israel tena aa kpɔa baa tɛ mɛ la. A bwa ɛ ba kwa. 30He koo kondikonloɡla aa wera, ne komɛlbwa haa kpɔa baa tɛ mɛ la ɛɛ ɛ sɔfore la kwaa. He kpɔ menloɡla ba tɛɛ ba, ásɛ n swee andɛɛɡa tɛ heyaa he deremi.#Kaa 23:19 31Sɔfore ta chɛ kɛ ba di jumbie kɛɛ ol bɛlbwa waa sewa ta baŋa, kɛɛ onɔ la kpɔɡ bini olchɔɡa aa kpoo.”

Currently Selected:

Ɛsekeɛl 44: mzw

Highlight

Copy

Compare