Ɛsekeɛl 43

Korowii jirima berɔ ba o Dea

1Baa la kpɔ men Ɛsekeɛl ba Korowii Dea wee leebɔr doonyoa la ta, 2asɛ n na Korowii Israel tena aa dɛ tomɔ la jirima o le wee leebɔr dɛɛ ba. O taa do kɛŋɔ chuubu sii ken, asɛ o jirima chaah kohona harɛ la ta bwa. 3Wepila la do kɛŋɔ anɔ la Korowii aa baa chɔɡ bwɛjen Jerusalam, ne Keba Moo nyoa kwaa maa naa la, asɛ n ba harɛ dɛ kpɔ sie pi harɛ. 4Korowii jirima la cheɡɛ wee leebɔr doonyoa la ta, dɛ ba su o Dea la bini. 5Belaa Korowii Doma la kpɔ mɛ ir, dɛ ba n ne bini dembaah la ta, asɛ Korowii jirima su o Dea bela.#1Ko 8:10-11

6Dɛ baa la cheɡɛ n jwɛh, asɛ n no nomɛl taa Korowii Dea la bini wɛɛ bol waa n be. 7O ŋɔ, “Nɛwɛnyini bie, n kookara chebɔree bonɔ. Bonɔɔ mɛɛ ba soɡa saŋ bɛlbwa dɛɛ la, dɛɛ nyiŋi n nɛra Israel tena nɛ. Israel tena aa ba koranar baa serewaa ɛ kɛŋɔ voɡa aa wola mkpa dɔe, dɛɛ toma dɛɛ ɛ jwamanwa bonɔ, dɛ́ kpɔ doŋa kah n sɔn waa do ɡoroŋ la kpa. 8Koranar la kpɔ ba doonyoo ne a daa ba kpaɡɛ n Dea doonyoo kwaa la, asɛ danjwɛɛ teŋe n ne ba baah ta. Ba ɛ waa maa kia, dɛ kpɔ doŋa kah n sɔn waa do ɡoroŋ la, asɛ n baah di n kpoo ba. 9Bá ɡel jwamane la, dɛ́ pa ba voɡare ne ba koranar voɡare mkpa aa wola toole a ta la ta, ásɛ n ba so ba baah ta saŋ bɛlbwa dɛɛ la.”

10Korowii berɔ ŋɔ n be ŋɔ, “Nɛwɛnyini bie, baɡle ɡɛ n Dea la wa aa doa Israel tena be, ásɛ sihiih kpo ba ba wechɔɡa baa ɛa la wa. Gel ba nyiŋi o mar, 11dɛ sihiih kpo ba ba wechɔɡa baa ɛa la wa aa, baɡ ba ɡɛ n Dea la mar aa doa. Gɛ o bini mar ne o doonyoo baa cheɡɛ a ta jo dɛɛ le, dɛ́ baɡ ba o waa bwa. Chwerɛ waa nɔ bwa bil ba, ásɛ ba won na ɡɛ Dea la wobɛlbwa aa doa, ásɛ ba jemɛ dɛ́ won dɛɛ teŋɛ mmarare la bwa ta.

12Mmara waa chɔ le dɛ tɛ Korowii Dea laanee teŋa nɔ. Bwejen la doa ne bɔr waa baro bwa chɛ kɛŋɔ ó do ɡoroŋ kohona.

Kon baa dɛ ɛ saraha o ta

13Naɡale baa kpɔa maɡɛ Korowii Dea la, ɡɛ tentenee ba maɡɛ saraha kon la ɡe. Saraha kon la lɔɡa dɛ bar la, bɔɔ bɛl lɔ bela. O paɡri lɔ naɡale beŋkpoŋ ne tama, o luŋri ɡe tel natuune ta, asɛ o nyoo dɛ bar bare ɛ nɔmpaa del. Saraha kon la daŋaa nɔ, 14le o lɔɡa bɔɔ la ta, dɛ́ ba o keŋkeŋ bela waa wola kanɛ la lɔ naɡale atoro, o paɡri ɡe lɔ naɡale beŋkpoŋ ne tama. Le o lɔɡa bela aa wola kanɛ dɛ́ ba o doa waa kana ɡe lɔ naɡale anumɛl, asɛ o paɡri ɡe naɡale beŋkpoŋ ne tama. 15Saraha kon la nyundua bela baa kpo kwaa dɛɛ fuah la lɔ naɡale anumɛl, asɛ kwaane aa do kɛŋɔ nyeɡlare anaarɛ paaɡe o loŋkoni ta. 16Kon baa dɛ ɛ sarahare o ta la ɛ fɔɔskwɛɛ. O jaŋne lɔ naɡale fi dɛ anuatoro, asɛ o paɡri ɡe do ɡɛ. 17O nyundua bela waa kana ɛ fɔɔskwɛɛ. O jaŋne lɔ naɡale fifraanɛ dɛ beŋkpoŋ, o paɡri ɡe do ɡɛ, asɛ kon waa bar o nyoa la ka tama o tel naɡale beŋkpoŋ. Saraha kon la bɔɔ luŋri lɔ naɡale beŋkpoŋ ne tama. Kon baa cheɡɛ o ta dɛɛ teeh ɡe do o wee leebɔr pera.”

18Nemenɛ Korowii berɔ ŋɔ n be ŋɔ, “Nɛwɛnyini bie, dɛ ba ɛ saraha kon la tonaa, ŋwɛnɛre baa che a ta dɛɛ fuh saraha kwaa dɛ́ kpɔ a chale dɛɛ merɛ o ta laanee teŋa nɔ. 19A chɛ kɛ he lawɛ nabale ɛ wechɔɡa kpɔe dɛ kɛ saraha tɛ Lewi dea tena baa ɛ sɔfore dɛ ɛ Sadɔk naanar. Banee dɛɛ ba n sie dɛ baa tom mɛ. Men Nemenɛ Korowiirii bola. 20Kpɔ o chal la ane ɛ kwaa anaarɛ aa do kɛŋɔ nyeɡlare dɛ paaɡe saraha kon la loŋkoni ta la ta, dɛ́ kpɔ ane ɛ o doa bela waa kana la, ne kon waa bar o nyoo ta bwa bar. Gɛɛ hɛɛ ba ɛɛ dɛ́ laa doŋa bɛlbwa kpɔ saraha kon la ta, ó do ɡoroŋ. 21Kpɔ nabale la ɛ wechɔɡa kpɔe dɛ kɛ saraha, dɛ́ fuuh bela baa lea cheɡ Korowii Dea la dahara bela.

22Tɔɔ perɔ aa, a chɛ kɛ he lawɛ bombal waa wola kirihiah bɛlbwa dii, ba ɛ wechɔɡa kpɔe dɛ kɛ saraha, ásɛ dɛ kpɔ o chal laa doŋa kpɔ saraha kon la ta, ɡɛ haa kpɔ nabale la ɛ la. 23Haa laa doŋa bɛlbwa kpɔ saraha kon la ta tonɛ la, kpɔ nabale ne pebal a bɛlbwa aa wola kirihiah dii le he kondɛɛra bini ba tɛ mɛ. 24Kpɔa ba n sie, ásɛ sɔfore la ɛ yar merɛ a ta, dɛ́ kpɔ ɛ saraha baa fuah tɛ mɛ.

25Berɛ lawɛ bombal ne nabale dɛ pebal, a bɛlbwa aa wola kirihiah dii, le he kondɛɛra bini ba ɛ wechɔɡa kpɔe dɛ kɛ saraha tɔpere bɛlbwa tɔpera anuanɛ tɛ mɛ. 26Tɔpera anuanɛɛ sɔfore la kpɔ soŋe men Korowii, dɛ́ laa doŋa bɛlbwa aa lɔ saraha kon la ta kpɔ tɛ mɛ, dɛ́ kpɔ do n nɔn ta dɛ́ pilu. 27Tɔpera anuanɛ nɔ ba a jaɡa aa, tɔpenuatoro wee la, sɔfore la chɛ kɛŋɔ bá kpɔ saraha kwaa haa fuah, ne deŋnesɔɔhna sarahare la ba saraha kon la ta, ásɛ n lɛ heyaa do. Men Nemenɛ Korowiirii bola.”

Currently Selected:

Ɛsekeɛl 43: mzw

Highlight

Copy

Compare