Ɛsekeɛl 31

Peleme daa bɛl waa lɔ Lɛbanɔn harɛ ta wa

1Baa lawɛ yaa laa ta kaa bojaŋ harɛfale ta bene fi dɛ beŋkpoŋ, korobitooro te, tɔpere waa tɔ sie ta la, Korowii bol waa men Ɛsekeɛl be ŋɔ, 2“Nɛwɛnyini bie, ŋɔ Ijipt kooro ne o nɛnlaa be ŋɔ,

‘Umee n kpɔ

he kora kpeɡri maɡɔɔ?

3He do kɛŋɔ peleme daa waa

lɔ Lɛbanɔn harɛ ta,

o kpala ne papooni

do wer dɛ tɔ kɔr.

O pamɔ kaa nyundua

dɛ do jaŋne dɛ kaa

baama ta.

4Nee lɔ bela dɛ́ ɡel o kpeɡ,

a bulo le harɛ bini dɛ ɡel

o kpeɡ dɛ do jaŋne,

dɛ sɔɔh o mun bela

waa cheɡa la.

Dɛ palɛ kaa jo daa aa cheɡɛ

kpɔɡ bini bela la baah ta.

5Gɛɛ a do o kpeɡ kaa nyundua

kohona ɡwaa daa aa cheɡɛ

kpɔɡ bini bwa.

Nee aa lɔ bela kohona nomanta,

o kpala la tɛrɔ

dɛ do kan kaa nyundua.

6Jumbii bwa

baa sɔh a kɔne o ta,

asɛ kpɔɡ bini ola bwa ɡe

ba chɔ o lɔɡa dɛ loɡle.

Harɛre bwa nɛra

baa so o chunchule ta.

7Daa la kpeɡo, dɛ ɛ dajen,

dɛ do wer kohona,

dɛ ta kpala a do jaŋne,

dɛkalkɛ o lune kaa bini

bela nee aa lole kohona.

8Haa won kpɔ peleme daa

aa lɔ Eden bodɛɛɡe

bela men Korowii

aa du daa la maɡɔ.

Haa won kpɔ dakpeɡ bɛlbwa

soo siwi kpala maɡɛ

peleme daa la kpala.

Daa aa lɔ Eden bodɛɛɡe

bela bɛlbwa

toole dɛ do wer kɛ on.

9Menee ɡela o do wer,

dɛ ta kpala kohona.

Men Korowii daa maa dua

Eden bodɛɛɡe

bela fe dɛ nyin a do kɛ on.

10Name kenii men Nemenɛ Korowii ɛɛ bol waa aa dɛ ba daa waa kpeɡa kaa baama ta la pui. Waa do jaŋne kohona nomanta, o mbarafo. 11Anomanta, n kpɔɔ do harɛre nɛra baa ɛ hɔɔhra la kooro nɔn ta, ásɛ o ɛo ɡɛ aa chɛa o nyubinikpeɡ la wa. N vɛoh. 12Nɛŋhɔɔhra ba nyu bini aa kpeɡa teŋo ta dɛ ɡelo. O kpala ne a nyoo aa kuuɡa chɔ bwejena ne fɛlembɔjena bwa ta. Harɛ nɔ ta nɛra ba bwa fa aa soɡe o chunchule ta la, le o mun. 13Jumbii dɛ so daa waa chola la ta, asɛ kpɔɡ bini ola ɡe do o kpala la baah ta. 14Anomanta, le fini dɛɛ kaa, daa waa cheɡɛ bela nee aa lole kohona bɛlbwa aa kpeɡ dɛ́ ka tel baama ta kpa. A chɔ le kɛŋɔ a bwa serewe kɛŋɔ nɛwɛnyina, dɛ kaa lalabwɛ.’ ”

15Nemenɛ Korowii ŋɔ, “Awola tɔpere daa la aa sewa dɛ kaa lalabwɛɛ la, n ɡelɔ harɛ bini neerare aa dɛ bule bɔle o ta, á baɡle kɛŋɔ a wio. N ɡelɔ neerare ɡel pala. Daa la aa sewa la, n ɡelɔ biro ba tɔ Lɛbanɔn bwejena ta, asɛ daa aa lɔ kɔr bini bwa serewe. 16Maa teŋo ta o sewɛ kaa lalabwɛɛ la, n ɡelɔ ɔmee chole harɛre nɛra nɛ, o sii waa sia la wa. Daa aa lɔ Eden bodɛɛɡe, ne dadɛɛɡa aa wera, dɛ do bela nee aa lole kohona Lɛbanɔn harɛ ta, dɛ sewɛ kaa la, o seo la tɛa bolarawa. 17Banɔ la baa soɡe o chunchule ta, dɛ ɛ o chamene tena baa lɔ harɛre ta ne o kaa lalabwɛ, dɛ ka ja nɛra baa kpoo ba keri ne la nɛ.

18A ɡɛ daa laanee Ijipt kooro ne o nɛndamanta la. Daa aa lɔ Eden bodɛɛɡe la bini ume kan ne o wer ne onee ɛ kɛrɛdɛ ɔ? Baa teŋe o ne Eden daa la bwaa ta, o kaa harɛ bini. Taraken, wɛɛ ka ja nɛra baa wola men tomɛ ne banɔ la baa kpoo ba laa ta la nɛɛ. Men Nemenɛ Korowiirii bola.”

Currently Selected:

Ɛsekeɛl 31: mzw

Highlight

Copy

Compare