Ɛsekeɛl 32
32
Ijipt kooro wiile
1Baa lawɛ yaa laa ta kaa bojaŋ harɛfale ta bene fi dɛ anɛ, korobie fi dɛ anɛ, tɔpere waa tɔ sie ta la, Korowii bol waa men Ɛsekeɛl be ŋɔ, 2“Nɛwɛnyini bie, kpɔ wiile ŋɔ Ijipt kooro be ŋɔ,
‘He do kɛŋɔ nyujente harɛre
ta nɛra baah ta,
he do kɛŋɔ lɛŋɔ
waa lɔ moo ta.
He dɛ jo nenabɔɔne ta
dɛ́ pora a chɔɡ.
3Anomanta, mɛɛ ta asawii lawɛ,
ásɛ dɛ ɡel nɛra warɛ,
dɛ́ tɛɡre ba ta baŋ.
4Mɛɛ kpɔe ta harɛ la ta,
dɛ́ ɡel jumbii ne kpɔɡ bini
olchɔɡa ba kah he ola.
5Mɛɛ ɡeloo he ola perɛ
bwejena dor,
dɛ́ berɛ su
fɛlembɔjena bini.
6Mɛɛ ɡeloo he chal palɛ
dɛ́ pweh harɛ kaa
bwejena la dor,
dɛ́ ka su fɛlembɔjena la ta.
7Maa ba chɔɡe tonɛ la,
mɛɛ tɔ nyundua,
ásɛ weweela nyoɡre,
dɛ́ kpɔ baama tɔ wee ta,
ásɛ korobie ɡel chaahna.
8Mɛɛ dime kwaa aa lɔ
nyundua dɛɛ chaah bwaa,
mɛɛ ɡeloo bɔr bir ta he nɛ,
he harɛ ta.
Men Nemenɛ Korowiirii bola.
9Mɛɛ ɡeloo a ha harɛre ta
nɛra, maa ba chɔɡe
le ba baah ta la,
harɛre haa wola an jemɛ la.
10Mɛɛ ɡeloo harɛre ta nɛra
bwara yɔr he wa
maa ba tɛr n kere le ba nɛɛ
dɛ́ kpɔ aah ba la,
ɔmee ɛɛ chole
ba koranar nɛɛ.
He chɔɡa tɔpere wee la,
bɛlbwa ɛɛ ɔmɔɔ
o bwara ɛɛ sa,
a do kɛŋɔ o dɛ ba sewa.’ ”
11Anomanta, Nemenɛ Korowii ŋɔ Ijipt kooro be ŋɔ,
“Babelɔn kooro ɛɛ kpɔ
o keree dɛ́ ba yoi.
12Mɛɛ ɡeloo harɛre a laa tena
nyu bini aa kpeɡa
ɡwaa harɛre bwa
kpɔ ba keri ba kpoo
he nɛra bwa.
Baa chɔɡ he nɛndamanta
ne he kondɔɔh
haa dɛ ɛ mbarafo a
waa la bwaa.
13Mɛɛ ɡeloo ba kpoo nae
aa lɔ nejena nyoo bwaa.
Nɛra kɛɛ nae aa lee do
dɛ́ jo a ta dɛ́ pora kpa.
14Mɛɛ berɔɔ ɡel Ijipt neerare
la chole a sie do wer,
dɛ́ ɡel aa palɛ kɛrɛdɛ.
Men Nemenɛ Korowiirii bola.
15Maa ba ɡel Ijipt harɛ chɔ pɛɛ
dɛ́ chɔɡ komɛlbwa
aa lɔ o ta,
dɛ́ kpoo o nɛra bwa la,
anee baa ba jema
kɛŋɔ menee Korowii.
16A ɡɛ waa nɔɔ baa ba kpɔe dɛɛ wiu. Harɛre ta haahna bwaa dɛ́ taa ɡɛ wiile la tɛ Ijipt harɛ ne o nɛra bwa. Men Nemenɛ Korowiirii bola.”
17Baa lawɛ yaa laa ta kaa bojaŋ harɛfale ta bene fi dɛ anɛ, tɔpera fi dɛ anue ta la, Korowii bol waa men Ɛsekeɛl be ŋɔ, 18“Nɛwɛnyini bie, wi tɛ Ijipt harɛ ta nɛndamanta bwa, kpɔ ba ka ja harɛre nɛra baa kpeɡa dɛ serewe kaa lalabwɛɛ la nɛ. 19Bɔɔ ba ŋɔ, ‘He dɛ lii kɛŋɔ he wer kohona ɡwaa nɛra bwa kɛɛ? Hɛɛ kaa lalabwɛɛ, dɛ́ ka ja nɛra baa wola men Korowii tomɛ dɛ serewe kaa la nɛ.’ 20Ijipt tena bwa ne banɔ la baa kpoo ba keri ne la dɛ́ ba pɛɛ serewe. N pamɛ n kere dɛɛ ba ba bwa kpoora. 21Banyoola tenten ne nɛra baa yoa tɛ Ijipt tena dɛ serewe la ɛɛ ŋɔ Ijipt tena baa serewa kaa lalabwɛɛ la bee, dɛ kpɔ takpeɡ ŋɔ, ‘Nɛra baa wola men Korowii tomɛ dɛ serewe la ba bonɔ ba chɔ.’
22Asiiria ne o laa tena ŋwama lɔ bela. Laa taa ba kpoo ba bwa. 23Asiiria harɛ ta nɛra ŋwama lɔ lalabwɛɛ bela, asɛ o laa tena chɔ baro harɛ bini bela. Banɔ la ba fa aa kpɔ ɔmee kohona ta harɛre ta nɛra nɛɛ la, ba kpoo ba keri ne.
24Elam harɛ ta nɛra chɔ bela, o laa tena baa kpoo ba laa ta la ŋwama chɔ baro. Banɔ la ba fa aa kpɔ ɔmee kohona ta harɛre nɛra nɛɛ ba ta men Korowii tomɛ dɛ sewɛ kaa lalabwɛɛ la. Ba ne banɔ la baa chɔ harɛ bini la di sihiih. 25Elam harɛ ta nɛra ja nɛra baa kpoo ba laa ta la nɛ, o laa tena ŋwama baro cheme. Ba bwa ɛ nɛra baa wola men Korowii tomɛ, ba kpoo ba laa ta. Ba fa aa soɡe le la, ba kpɔ ɔmee ta nɛra nɛ. Ba serewɔ, ba ne banɔ la baa kpoo ba laa ta la di sihiih.
26Mɛsɛk ne Tubal bwa lɔ bela, ba laa tena ŋwama bar ba cheme. Ba bwa fa aa men Korowii tomɛ, asɛ ba kpoo ba laa ta. Ba fa aa soɡe le la, ba kpɔ ɔmee kohona ta nɛra nɛ. 27Ba ta ba te nomonhuɡa huɡe ɡɛ ba yon dɛɛ huɡe saŋ la banyoola dɛ kpɔ ba nyuune dɛɛ dawɛ ba keri ta lalabwɛ, dɛ kpɔ ba dɔmkwaa dɛɛ dawɛ ba nɛɛ la. Banyoola nɔ fa aa soɡe le dɛ do kpeɡri la, ba kpɔ ɔmee kohona ta nɛra nɛ.
28Gɛɛ mɛɛ ba ɡela ba kpo Ijipt kooro. Mɛɛ chɔɡoo ásɛ o sewɛ chɔ nɛra baa wola men Korowii tomɛ ba kpoo ba laa ta la baah.
29Edom tena ne ba koranar ne ba nomonjena bwa chɔ bela. Dɛ ba laa tena fa kpeɡri taeh, kɛ ane a bwa, ba ɡarɔ kpoo ba laa ta. Ba chɔ nɛra ba fa aa wola men Korowii tomɛ la baah ta lalabwɛ.
30Koranar baa le weekaŋle nyunduabɔr, ne Sidon tena bwa chɔ bela. Kɛ ba kpoo ba ba di sihiih, ba kpeɡri ba fa aa dɔa dɛ kpɔ ɔmee kohona ta nɛra nɛɛ la habɔɔ. Ba chɔ nɛra ba fa aa wola men tomɛ la baah ta lalabwɛ.
31Gɛɛ aa ba ɛɛ Ijipt kooro ne o laa tena na nɛndamanta baa kpoo ba laa ta la, dɛ́ kpɔ larawe bwara. Men Nemenɛ Korowiirii bola. 32N ɡelɔ Ijipt kooro kpɔ ɔmee ta nɛra nɛɛ harɛ nɔ ta te, kɛ mɛɛ ɡeloo ba kpo o ne o laa tena damanta bwa ba ka chɔ nɛra baa wola men tomɛ ba kpoo ba laa ta la baah ta. Men Nemenɛ Korowiirii bola.”
Currently Selected:
Ɛsekeɛl 32: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
