Ɛsekeɛl 18

Nɛn waa ɛ wechɔɡa laanee dɛ́ sewɛ

1Korowii ŋɔ men Ɛsekeɛl be ŋɔ, 2“Ɛrɛɛ hɛɛ lii sɛɡla haa dɛ sɛɡle Israel harɛ ta ŋɔ,

‘Nya ne mɛɛ di ɡrepo

nɔnnyɛɡa,

asɛ ba bii nyena nyɛɡ

nɔɔ?’ ”

3Nemenɛ Korowii ŋɔ, “N ŋwɛɛrɔ kɛŋɔ n taa lole nɔ, haa ɡɛ sɛɡla nɔɔ sɛɡle Israel harɛ ta kpa. 4Nɛwɛnyina bwa nyu lɔ n nɔn ta, mɛɛ kɛɛ bie bwa nyu lɔ n nɔn ta. Naate waa ɛ wechɔɡa la, naatee dɛ́ sewɛ.

5Dɛ nomɛl we-ɛɛla toɡrɔ

wɛɛ ɛ waa aa dɔ kasinteŋ

o waa do wer,

6waa kwaa Israel tena

aa kpoora

dɛɛ tɛ ba voɡa bwejena

dor la di,

waa ba voɡa ɡe tomɛ,

kɛɛ waa o dɔŋ haah lawɛ

dɛɛ chɔ,

waa haah waa le dahara

nyin,

7waa nomɛlbwa fiiɡi,

o berɛ nomɛlbwa kon

waa lɛa cheɡ mɔɔ

dɛ kemɔ suuɡa la dɛɛ tɛo.

Waa ŋwɛ, lɔr dɛ kpo nɛn aa,

o dɛ tɛo kwaa wɛɛ di,

nomɛlbwa waa wola

yal dɔe la, o dɛ tɛo.

8Waa suuɡa kemɛ dɛɛ lɛ

a nee dɛɛ ja.

Waa wechɔɡa ɛ,

o dɛ bol kasinteŋ nɛn

ne o dɔŋ baah waa ta.

9Nɛn waa do ɡɛ nɔɔ dɛɛ teŋɛ

me Mmarare ta kɛrɛdɛ.

O waa toɡrɔ, wɛɛ dɔ

o nyuu kɛrɛdɛ.

Men Nemenɛ Korowiirii bola.

10Dɛ nɛn o wa aa toɡra dɔ bichɔɡe wɛɛ kpoo nɛra, kɛɛ wɛɛ ɛ a ɡɛ waa nɔ bini bɛlbwa 11o mɛɛ aa wola ane ɛɛ ka,

kɛ o te ɛɛ di kwaa baa kpoora

voɡare ta bwejena dor,

dɛ lawɛ o bala haahna dɛɛ chɔ,

12dɛɛ faah nyaara, dɛɛ ŋwɛ.

O kemɛ nɛn suuɡa

dɛ lɛ kon cheɡ naate

ta kem la ba bɔe yaa.

Waa naate kon kpɔe dɛɛ tɛo.

O dɛ tomɛ voɡa maa kia la.

13O kemɛ o dɔŋ suuɡa aa,

o dɛ lɛ a nee aa ɡwaa.

A chɛ kɛ a ɡɛ nɛn nɔ so harɛ nɔ ta naa? Akai! O dɛ ɛ waa baa kia nɔ bwa, a chɛ kɛŋɔ á ɡure o nyu ta, bá kpoo.

14Dɛ a ɡɛ nɛnchɔɡe nɔ dɔ bie, o na wechɔɡa o mɛɛ aa dɛ ɛ bwa, dɛ ɔmɛ o ta ɡɛ ɛɛ.

15Waa kwaa Israel tena aa dɛ

kpoora

dɛɛ tɛ ba voɡa bwejena dor

la di, kɛɛ dɛɛ tomɛ voɡa.

Waa o dɔŋ haah lawɛ dɛɛ chɔ,

16kɛɛ waa nomɛlbwa fiiɡi,

o kemɛ nɛn suuɡa aa waa

kon lɛɛ dɛɛ cheɡ o buɡ ta.

Waa ŋwɛ, o dɛ tɛ nɛn lɔr

aa dɛ kpoo kondikwa,

dɛɛ tɔ nɛn

waa wola yal dɔe yal.

17Waa wechɔɡa ɛ, o kemɛ nɛn

suuɡa aa, waa a nee lɛ.

O dɛ teŋɛ

me Mmarare bwa ta.

O mɛɛ wechɔɡa la aa won ɡel o dɔ seo, wɛɛ dɔ o nyuu kɛrɛdɛ. 18O mɛɛ te, o ɛɡre o bala dɛ lɛ ba kwa, dɛ ɛ o nɛra wechɔɡa, wɛɛ sewɔɔ.

19He dɛ bɔɔ ŋɔ, ‘Ɛrɛɛ aa wola chɛɛ kɛŋɔ bie dɔ deŋnetɛra o mɛɛ wechɔɡa waɔ?’ Bie la waa toɡrɔ dɛ do wer, o teŋɛ me Mmarare la ta kɛrɛdɛ ken, anomanta, wɛɛ dɔ o nyuu kɛrɛdɛ. 20Naate waa dɛ ɛ wechɔɡa laanee dɛɛ sewɛ. Bie ta chɛ kɛ ó na wa o mɛɛ wechɔɡa wa, mɛɛ ɡe ta chɛ kɛ ó na wa o bie wechɔɡa wa. Nomɛlbwa o waa aa toɡra wɛɛ ɛ wedɛɛɡa dɛ́ dɔ andɛɛɡa, nomɛlbwa waa dɛ ɛ wechɔɡa ɡe, wechɔɡaa dɛɛ teŋɛ o nɛ.

21Kɛ dɛ wechɔɡ-ɛɛ ɡel wechɔɡa waa ɛa, dɛɛ teŋɛ me Mmarare bwa ta, dɛɛ ɛ anɔ la aa toɡra dɛ do wer aa, wɛɛ dɔ o nyuu kɛrɛdɛ, waa sewɛ. 22Mɛɛ kpɔ naate wechɔɡa bwaa kɛo, maa an lii kpa, dɛkalkɛ o waa toɡrɔ. Wɛɛ so lee, waa sewa ba. 23He dɛ lii kɛ n sie dɛ lɛ wechɔɡ-ɛɛ seo ta kɛɛ? Akai, n sie aa a ta lɛ. Ó le o wechɔɡa ta, dɛ́ dɔ o nyuu mɛɛ nyin.#Ɛse 33:11; 2Pi 3:9

24Dɛ nɛn o wa aa toɡra le o wedɛɛɡa ɛɛ ta, dɛ ka ɛ wechɔɡa ne waa maa kia wechɔɡ-ɛɛra ɛɛ ɛa la aa, wɛɛ dɔ o nyuu yaa? Maa o wedɛɛɡa waa ɛa wubwa la bɛlbwaa lii. O kasinteŋ bɛ dɔe ne wechɔɡa waa ɛa la taa wɛɛ ba sewa.

25Kɛ he dɛ bol ŋɔ, men Korowii waa ta toɡrɛ. Israel tena, hé no, he dɛ lii kɛŋɔ men Korowii n waa ta toɡrɛ kɛɛ? He waa laa wola toɡraa? 26Dɛ nɛn o wa aa toɡra le wedɛɛɡa ɛɛ ta dɛ ka ɛ wechɔɡa aa, wɛɛ sewɔɔ. O wechɔɡa waa ɛa la waa wɛɛ ba sewa. 27Kɛ dɛ wechɔɡ-ɛɛ charɛ o liire le wechɔɡa waa ɛa ta, dɛɛ ɛ anɔ la aa wera dɛ toɡre aa, wɛɛ dɔ o nyuu. 28O na wechɔɡa waa ɛa dɛ le a ta, wɛɛ dɔ o nyuu kɛrɛdɛ, waa wola sewɛ. 29Kɛ he Israel tena dɛ bol ŋɔ, ‘Men Korowii ŋwɛnɛ ta toɡrɛ.’ He ŋwɛnɛree wola toɡrɛ.

30Anomanta, he Israel tena, mɛɛ bol he waa beŋkpoŋa beŋkpoŋaa ɡɛ haa ɛa. Hé charɛ he liire le he wechɔɡa bwa ta, dɛ bɛ naa a ta lɔ.#Hos 14:1 Men Nemenɛ Korowiirii bola. 31Hé laa he te kpɔ wechɔɡa bɛlbwa ta, dɛ́ dɔ bambidɛɛɡe ne liifala dɛɛ teŋɛ n waa ta. Israel tena, ɛrɛɛ hɛɛ nyin kɛ he serewe nɔɔ? 32N sie aa lɛ kɛ nomɛlbwa sewɛ. Hé charɛ he liire, ásɛ dɛ dɔ he nyu! Men Nemenɛ Korowiirii bola.”

Currently Selected:

Ɛsekeɛl 18: mzw

Highlight

Copy

Compare