Ɛsekeɛl 19
19
Suna dii yel
1Korowii ŋɔ men Ɛsekeɛl be ŋɔ, “Go suna dii yel nɔ tɛ Israel koranar banɛ 2dɛ ŋɔ,
‘Na ɡɛ he nya aa do kɛŋɔ
nyujente nee!
O dɛɛ o bii nyujentena
ambala aa do ɔma baah.
3O dɛɛ bii la bɛl o kpeɡ,
dɛ baɡlo kpaahna,
o lawɛ nɛra dɛɛ chwe.
4Harɛre ta nɛra no o wa,
dɛ harɔ bel a bɔɔ bini
dɛ lawɔ.
Ba doo kwaa kɛŋɔ ɡoŋa
dɛ tɛɡro kaa Ijipt harɛ ta.
5O nya la nyiŋu ŋwɛnɛ,
o hwɛɡa bwa tonɛ.
Ate, o berɛ dɛɛ bii la bɛl ja
o kpeɡ dɛ do ɔma.
6Waa baa kpeɡ la,
o pu o bala o ne aa valɛ
dɛ hweli kpaahna,
dɛ ɡe lawɛ nɛra dɛɛ chwe.
7O kuuɡi ba dekpeɡa
dɛ chɔɡ ba bwɛɛre.
O sio waa, dɛ ɔmee kohona
chole harɛ la ta nɛra nɛ.
8Belaa harɛre nɛra pɛ
dɛ ba yoo.
Nɛra le bobɛlbwa dɛ ta
ba asauri baro dɛ lawɔ.
9Ba kpɔ ɡoŋa lawɔ,
dɛ doo buo bini
ka tɛ Babelɔn kooro.
Ba doo dea, baa o sii no
Israel deŋɡarere ta kpa.
10He nya fa do kɛŋɔ ɡrepo daa
dɛ che nee nyoa.
Nee aa lɔ bela kohona
nomanta,
o dɔ papooni kɛrɛdɛ
dɛ won nɔna ɡe.
11O kpala kpeɡri dɛ do wer kɛ
bá kpɔ ɛ kooro daŋɡbala.
O kpeɡo tɛr kaa nyundua
baama bini,
nɛra na ɡɛ waa kpeɡa
dɛ dɔ papooni kohona.
12Ba baah di o nɛɛ kohona,
dɛ huɡru ɡo.
Wee leebɔr peuwɔb tao dɛ ɡel
o kpala la ne o nɔna la hol,
nii fuh a bwa.
13Taraken, pua hɛŋle
ɡbo harɛ taa ba ka chɔɔro,
harɛ waa hola nee
aa wola toole o ta.
14Nii le o kpale la bɛl ta
dɛ fuh o ne o nɔna la bwa.
Daa la kpale bɛlbwa toole
dɛ do kpeɡri
bá kpɔ ɛ koodaŋɡbala kpa.’
Wii aa chɛ kɛŋɔ bá wi laanee la.”
Currently Selected:
Ɛsekeɛl 19: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
