Ɛsekeɛl 10

Korowii jirima le o Dea la ta

1Men Ɛsekeɛl nyiŋi kon waa bɔle Kerobim la doa, dɛ na komɛl kɛŋɔ kookara baa kpɔ bwedɛɛɡa ane aa ɛ burum baa yera safaaya ɛo. 2Belaa Korowii ŋɔ baa la waa tɔ yapoŋ la be ŋɔ, “La saaker nakpale aa lɔ Kerobim la lɔɡa la baah ta. Pa ninhɔla he nɔɔra su, dɛ́ kpɔ merɛ bwɛjen la ta.” N taa cheɡa dɛɛ nyiŋu la, o kaa jo.

3Dɛ Kerobim la cheɡɛ Korowii Dea la weekaŋle harɛbɔr, asɛ baa la ka jo bela. Belaa bam ba tɔ Korowii Dea dembaah bela bwa. 4Korowii jirima le Kerobim la ta, dɛ ba kaa Korowii Dea la doonyoa bela. Bam baa tɔ dembaah bela, asɛ Korowii jirima chaah bela bwa. 5Kerobim la kena dɛ si, dɛ nɛn lɔ dembaah la baŋ kwaraa naa, o dɛ no sii la. A sii la do kɛŋɔ Korowii Waa Ɛ Kpeɡri Bwa Dɔɔ la taa ken.

6Korowii aa do baa la aa tɔ yapoŋ la ŋɔ, ó ka pa ninhɔla le saaker nakpale aa lɔ Kerobim la lɔɡa baah ta la, o kaa jo dɛ che saaker nakpale la bɛl jwɛh.#Ɛse 1:5-21 7Belaa Kerobim la bɛl tɛr nɔn, dɛ kpɔ nii aa lɔ a baah ta la ane do baa la aa tɔ yapoŋ la nɔn ta, asɛ o lɛ dɛ kpɔ le kaa. 8Kerobim la bɛlbwa kena lɔɡre la, kwaane do kɛŋɔ nɛn nɔɔra ken.

9Men Ɛsekeɛl berɔ nyiŋi dɛ na saaker nakpale anaarɛ. Beŋkpoŋ bɛlbwa cheɡɛ Kerobim la jwɛh, dɛɛ nyɛɡle kɛŋɔ bwedɛɛɡa ane baa dɛ yera kresolet ken. 10He nyiŋi saaker nakpale la aa, anaarɛ la bwa le dɔŋa. A do kɛŋɔ bɛlbwa berɔ su o dɔŋ ta ken. 11Kerobim la dɛ kaa laa, a won baŋne anaarɛ a siebɔra la aa chaɡa la bɛlbwa kaala. Saaker nakpale la aa sie berɛ. 12Kerobim la bwara bwa, a habɔɔ ne nɔɔra dɛ a kena ta bwa dɔ sibie, ɡɛɛ a saaker nakpale anaarɛ la ɡe dɔ sibie. 13N no taa bɛl wɛɛ yerɛ ŋɔ, “Saaker nakpale aa dɛ kile kɛŋɔ kawulewule.” 14Kerobim la bɛlbwa dɔ siebɔra anaarɛ. Onla waa tɔ sie do kɛŋɔ nabal siebɔr, nɛɛte do kɛŋɔ nɛn siebɔr, toorote do kɛŋɔ nyujente siebɔr, naarɛte la ɡe do kɛŋɔ kee siebɔr.

15Belaa Kerobim la ir kaa nyundua. Anee hweera kwaa n fa aa naa Keba Moo la bɔr la. 16Kerobim la dɛ kaa laa, a ne saaker nakpale laanee dɛɛ kaa. A paɡri kena dɛɛ ba ira aa, a dɛ marɛ a nɛɛ a ne aa kaa. 17Kerobim la cheɡɛ bobeŋkpoŋ aa, dɛ saaker nakpale la ɡe cheɡɔ, Kerobim la iro dɛɛ kaa nyundua aa, a ne anee dɛɛ ir, dɛkalkɛ hweera kwaa la doma lɔ a nakpale la ta.

18Ate, Korowii jirima le o Dea doonyoa bela dɛ ba che Kerobim la nyundua. 19Maa nyiŋa la, n nao kɛ Kerobim la paɡri kena dɛ ir kaa nyundua, a ne saaker nakpale la. A kaa che Korowii Dea wee leebɔr doonyoa la ta, asɛ Korowii Israel tena aa dɛ tomɔ la jirima tɔ a nɛ.

20A ɡɛ hweera kwaa nɔɔ n fa na Korowii Israel tena aa dɛ tomɔ jirima tɔ a nɛɛ Keba Moo la bɔr la. Anee ɡela n jemɛ kɛŋɔ a ɛ Kerobim. 21Bɛlbwa dɔ siebɔra anaarɛ ne kena anaarɛ. A kena la bɛlbwa do kɛŋɔ nɛn nɔn aa lɔ o lɔɡa ken. 22A siebɔra do kɛŋɔ anɔ la n fa aa naa Keba Moo la bɔr la. Bɛlbwa pa sie dɛɛ kaa, aa a te berɛ.

Currently Selected:

Ɛsekeɛl 10: mzw

Highlight

Copy

Compare