Ɛsekeɛl 9

Voɡtoroma kpoora wa

1A habɔɔ la, Korowii kpɔ takpeɡ ŋɔ men Ɛsekeɛl be ŋɔ, “Kpɔ nɛra baa dɛ daah bwɛjen nɔ ba bonɔ, bɛlbwa kpɔ o dɔmkon kpoŋe.” 2Belaa n na baala banumɛl ba le Korowii Dea doonyoa o sie aa chaɡɛ weekaŋle nyunduabɔr dɛɛ ba, bɛlbwa kpoŋe dɔmkon. Dɛ baa bɛl jao dɛ tɔ yapoŋ,#Dan 10:5 asɛ kwaa waa kpɔa dɛɛ chwerɛ do o be. Ba bwa baa jo Dea la bini dɛ ba che saraha kon baa kpɔ ayaawa ɛo jwɛh.

3Belaa Korowii Israel tena aa dɛ tomɔ la jirima le Kerobim la ta, bela o fa aa lole la, dɛ kaa Dea la doonyoa. Korowii ŋɔ baa la waa tɔ yapoŋ asɛ kwaa waa kpɔ chwerɛ do o be la be ŋɔ, 4“Gaaɡe Jerusalam fɔɡbaahna, dɛ́ do nɛra baa na waa maa kia, asɛ baa wi dɛɛ di suna a waa la nso ba tili ta.”

5N taa dɛ no Korowii be la, o berɔ ŋɔ baala la ɡe be ŋɔ, “Hé teŋɛ o nɛɛ jo bwɛjen la bini, dɛ́ ka kpoo nɛra la. He bɛ bɛlbwa ɡel, he bɛ tedoma dɔ tɛ bɛlbwa. 6Hé kpoo banjeni, bonɔɔna ne toli, haahna ne bechale. Kɛ he bɛ banɔ la baa do ba nso la te kpoo. Hé pa mun le n Dea bonɔ.” Anomanta, ba pa mun le nomonome baa lɔ Korowii Dea la sie nɛ.

7Korowii ŋɔ ba be ŋɔ, “Hé pa nɛra haa kpoo ba la ba su n dembaah bela, dɛ́ kpɔ doŋa kah n Dea la. Hé kaa.” Anomanta, ba jo bwɛjen la bini, dɛ pa mun dɛɛ kpoo nɛra la. 8Ba lɔ nɛŋkpoa la ta, asɛ a ka n ɡbo che. Belaa n kpɔ sie pi harɛ dɛ do lɔŋɔre ŋɔ, “Oo! Nemenɛ Korowii, amɔ he dɛ ba Israel tena baa kaa nɔ bwa kpoora, dii he baah aa dia Jerusalam tena nɛɛ kohona nɔ wa aa?”

9Korowii chaŋ mɛ ŋɔ, “Israel ne Juda tena wechɔɡa ɡwaalɔ kohona, nɛŋkpoa ɡboo harɛ la bwa, kasinteŋ toole Jerusalam kpa. Ba dɛ bol ŋɔ, ‘Korowii vɛh ya harɛ nɔ, waa yaa na.’ 10Anomanta, maa ba nɛɛ sune, maa ba bwaraa kpɔ kɛ ba, mɛɛ ɛɛ ba ɡɛ baa ɛ bane la.”

11Belaa baa la waa tɔ yapoŋ asɛ kwaa baa dɛ chwerɛ ane do o be la berɛ la ka ŋɔ Korowii be ŋɔ, “N kaa ɛ waa haa do mɛ a ta la tonɛ.”

Currently Selected:

Ɛsekeɛl 9: mzw

Highlight

Copy

Compare