Emɔs 7
7
Wepila aa ɛ tontombɛ wa
1Nemenɛ Korowii ɡelɔ men Emɔs na waane wepila ta. N nao kɛŋɔ waa dɛ boa tontombɛ nyoa, ɡɛ saŋ dɛ ba teŋe kpɔɡa ba kpɔa dɛɛ tɛ kooro jaɡre tonɛ, kpɔɡa pa mun dɛɛ moɡɛ, asɛ nɛra pa mun dɛɛ du konfala. 2Tontombɛ la balɔ, dɛ ba chɔɡ konlwɛɛ te bɛlbwa harɛ la ta, asɛ n ŋɔ, “Nemenɛ Korowii, ɡel kɛ he nɛra! Ɛrɛɛ he nɛra ɛɛ ba wona so nɔ? Ba nɔn ta kao!”
3Anomanta, Korowii ɡelɔ.
Dɛ ŋɔ, “Maa ɡela ba a chiɡ kpa.”
4Nemenɛ Korowii ɡelɔ n na waane wepila ta ja. N nao kɛŋɔ waa kpɔ nii dɛɛ ba ba fuh harɛ la, dɛ́ kpɔ tɛr o nɛra deŋne. Nii la fuoh dɛ hweeh viljena bwa, dɛ fuh dɛɛ ba ba chɔɡ harɛ ɡe. 5Belaa n ŋɔ, “Nemenɛ Korowii, n dɛ soŋe, ɡel! Ɛrɛɛ he nɛra ɛɛ ba wona so nɔ? Ba nɔn ta kao!”
6Anomanta, Nemenɛ Korowii ɡelɔ, dɛ ŋɔ, “Maa ɡela ba a chiɡ kpa.”
7Korowii ɡelɔ men Emɔs na waane wepila ta ja. Dɛ Korowii cheɡɛ danjwɛɛ bɛl baa mao jwɛh, dɛ kpoŋe ŋwɛn baa kpɔa dɛɛ toɡre danjwɛ. 8Korowii bɔɔ mɛ ŋɔ, “Emɔs, bɔkwaa hɛɛ na nɔ?”
Asɛ n chaŋe ŋɔ, “Ŋwɛn baa kpɔa dɛɛ toɡre danjwɛɛ.”
Ate, Korowii ŋɔ, “N kpɔɔ dɛɛ baɡle kɛŋɔ n nɛra do kɛŋɔ danjwɛɛ waa ɡola. Maa ba deŋnetɛraa kpɔ kɛ ba kpa.
9Mɛɛ chɔɡ bɔra Aesek
naanar aa ka
dɛ tomɛ bwaa,
ásɛ Israel harɛ bɔra
aa do ɡoroŋ ɡe chɔɡ,
dɛ́ ka yo Kooro
Jɛroboam dem nɛra laa.”
Emɔs ne sɔfo Amasea
10Belaa sɔfo Amasea waa lɔ Bɛtel la kpɔ kala tɛ Israel Kooro Jɛroboam ŋɔ, “Emɔs dɛ vɔrɔwe he vɔrɔwa Israel harɛ ta bonɔ. O waa waa dɛ bol la ɡwaalɔ to. 11Waa Emɔs aa dɛ bol laanee kɛŋɔ,
‘Baa kpo Kooro Jɛroboam
laa taa,
ásɛ ba lawɛ Israel tena
laa ta kaa,
ba le ba ɡbaɡba harɛ ta
kaa bojaŋ harɛfale ta.’ ”
12Belaa Amasea ŋɔ Emɔs be ŋɔ, “Korowii keame, ir kaa Juda harɛ ta kaa bol Korowii waa la, dɛ́ so bela baa bɔe a kem. 13Bɛ Korowii waa la bol Bɛtel bonɔ kpa, dɛkalkɛ bonɔɔ harɛ nɔ ta nɛra ne kooro bwa ba dɛ baa tomɛ.”
14Emɔs chaŋo ŋɔ, “N ta Korowii keame ɛɛ, kɛɛ dɛ ɛ Korowii keame bie. Dɛ peteɡree men, asɛ n berɛ dɛɛ nyiŋi fiɡ daa ta.#Emɔ 1:1 15Kɛ Korowii ɡelɔ n ɡel peera teɡa, dɛ ŋɔ n be ŋɔ ń ba bol o waa la baɡle o nɛra Israel tena. 16Hé no waa Korowii aa dɛ bol he be. He ŋɔ,
‘Bɛ Korowii waa la bol,
ɡel waa aa dɛ ba Israel
tena nɛɛ bala la waa bola.
Ásɛ dɛ ɡel waa bola
dɛ́ yaɡɛ Aesek dea tena.’
17Anomanta, waa Korowii aa dɛ bol sɔfo Amasea be laanee nɔ.
‘He haah ɛɛ valɛ bwɛjen
nɔ taa dɛɛ bɔ jwamane.
Baa kpoo he bibaala
ne bihaahna laa taa.
Baa lɛ he harɛ peraa,
dɛ́ bɔne tɛ nɛra,
ásɛ he ka sewɛ
voɡtoroma harɛ ta.
Kasinteŋ, baa lawɛ
Israel tena laa taa le
ba ɡbaɡba harɛ ta
kaa bojaŋ harɛfale ta.’ ”
Currently Selected:
Emɔs 7: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
