Roma 16

Mɛ ɔtutɔ mɛ Kunɔpanɔɔ

1Meebu blɔ onemidzɛɛ Foibe, gi izeesumu ni Kenkrea baʋaziŋa ba ɔha lɔ mɛ ɛ, basɛ mlɔ. 2Meeʋi si mlazi yɛ ní Ɔkaɛ linyi ne me, ŋwisi kiliɛ gi Aya yɛ banima biazɛ yɛ ɛ, tɔ mlaki yɛ kupɔnɔ kakaa gi aazia dɔni mlɔ klɔ ɛ; lɛ ese linu si, yɛ ɔtutɔ ɛ, apɔni banɔ glegle kɔpɔni mɛ fɛ.

3Mlapani Priskila ni Akwila gi benu mɛ baxwɛwaglɔnɛ ní Kristo Yesu axwɛ na mɛ ɛ, aki mɛ; 4bɛkpɛ ba ligbã́ nɛ ní kuxixa mɛ ní mɛ litukpo. Medo ba ɖase, aní mɛ tete, pɔ̀ isɔlihaɛ lɛ petee gi ínu Yudanɛ kyɛ ɛ. 5Mlapani baʋaziŋa ba ɔha lɔ klɔ gi izɛɛtsa ní ba kepea mɛ ɛ. Mapani mɛ ɔʋia vevee Apaineto, gi yɛ eze ɔnɔ tɔpu yɛ ní Asia kesea aʋa gi azɛ Kristo aʋa aŋa ɛ.

6Mlapani Maria, gi yɛ awa axwɛ gagla ni mlɔ kusi i.

7Mlapani Androniko ni Yunio gi benu Yudanɛ ŋwisi mɛ kinɛ ɛ, xe beze ní ligba pɔni mɛ ɛ; benu banɔ tètè ní banɔxwaxwa ba kusi, lɛ bedzi baʋaziŋa kpɛ ɔtɔ ɛki mɛ ɛ.

8Mlapani Ampliatus, gi madimɛnɔ ní Ɔkaɛ linyi ne me e.

9Mlapani Urbano fɛ, blɔ ɔhanɛ ɔxwɛwa ní Kristo ɔha lɔ mɛ, ani Staxis mɛ ɔʋia vevee.

10Mlapani Apeles, ɔniliɛ gi yɛ isu kukɔ ki Kristo e, kwimɔ si kúʋikyi i. Mlapani banama petee gi benu Aristobulo yɛ baŋanɛ ba ɛ.

11Mlapani Herodion gi yɛ fɛ onu Yudanɛ kɔpɔni mɛ ɛ, ani baʋaziŋa ba ní Narkiso yɛ okú no me, gi benu baʋaziŋa ni Ɔkaɛ mɛ ɛ.

12Mlapani Trifena ni Trifosa, badzɛ gi bɛɛwa Ɔkaɛ axwɛ na ɛ, ani ɔdzɛɛ Persis mɛ ɔʋia vevee, gi awa axwɛ glegle aki Ɔkaɛ ɛ.

13Mlapani Rufo, gi Aya akya si yɛ axwɛwawa la ɛki Ɔkaɛ ɛ, ɛdzi aŋu mɛ, ani yene gi akɔ mɛ ŋwisi yebinyime kinɛ ɛ.

14Mlapani Asinkrito, Flego, Herme, Patroba, Herma, ni baʋaziŋa dzedze ba gi bɛpɔni ba ɛ.

15Mlapani Filologo ni Yulia, kupaniɔ kwitrɛ ki Nerea ni yenemidzɛ, ki Olimpa ani ki Aya yɛ banima gi balɛ pɔni ba ɛ.

16Mlakɔ ɔna dradra akpɛ mlɔ ahanuglɔ ba wolaa tɔ mlapani ba, isɔli ha lɛ petee ni Kristo me e, ipani mlɔ.

Batrɔtrɔ gɔgɔ ʋa

17Mɛ benemi ba mɛɛgba mlɔ; tɔ mlevu aŋu ní banama gi bizɛɛmani kulɛlɛ ɛ, xe bizɛɛpisa banima kuziŋaa a, xe bizɛɛyɔ kedu ní kudɔbasɛ uliɔ gi kwibasɛ mlɔ su i. Mladzi kede ní ba su! 18Lɛ ese linu si banɔ baklɔ gi bizɛɛbitɛ eboa la elu i, aní Kristo blɔ Ɔkaɛ beesumu, pɔ̀ batutɔ ba epò la beesumu u. Bizɛɛkɔ ba eboe panipani la ni kinemi gyigyi emeni banama gi béte liboeboe e. 19Ɔnɔ kakaa enu mlɔ kutununu yo kí liboe le onu. Lɛ kɔkpɛ liboe lɛ ya loso e, mamɔ isami ni mlɔ. Mapɛ si mlete liboe ní kidiliɛ gi kipɛɛ su u, pɔ̀ mápɛ si mlɔ aŋu adra ní kuzimizi su u.

20Lɛ Aya gi yɛ onu blɔ kusuyɔ ɔdɔklɔ ɛ, aakpɛ Satana ní mlɔ kukliseo tɔ mlaaŋa yɛ aʋa kpekpemi.

Blɔ Ɔkaɛ Yesu Kristo yɛ lipomepɛpɛ nɛ lize ni mlo.

21Timoteo, gi onu mɛ ɔxwɛwa hanuglɔ ɛ, apani mlɔ; nite ke Lukio, Yason ani Sosipatro blɔ akɔanɛ Yudanɛ ma kyɛ bɛpani mlɔ. 22Mɛ Tertio ɔniliɛ gi aŋwlimi keplekpaa lia kyɛ ɛ, mapani mlɔ ní Ɔkaɛ linyi ne me. 23Gayo, ɔniliɛ klɔ gi maya ɛ, gi yɛ kepea mɛ baʋaziŋa ba bizɛɛtsa ɛ, atsisi mlɔ yɛ kunɔpaniɔ; Erasto, gi yɛ eedi ɔma ʋidi ɔlɔ ya lɔ kibɔɛ aʋa a, ani blɔ onemi ye Kuarto fɛ bɛtsisi mlɔ ba kunɔpaniɔ. 24Blɔ Ɔkaɛ Yesu Kristo yɛ lipomepɛpɛ nɛ lize ni mlɔ petee! Atɔ liba lɛ mɛ.

25Abla ɛ, mlaki tɔ kukɔ kukpɔ̀kpɔ̀ aki Aya! Aatani kukɔ si mlalɛɛ gagla ní mlɔ kuziŋaa mɛ, kɔkpɛ liboe gbã nɛ gi mapani aki mlɔ ní Yesu Kristo su i, kɔkpɛ eboe kpokpo la gi Aya ebu abasɛ ɛ, eboa la gi bɛkɔ ekpo lipoe gblamadza a, gi liza ɛ. 26Abla kɔ ɛ, anukwarɛɛ edo oŋwe no gani bidɔ mɛ gi beboedoplɛ ba bɛŋwlimi plɛ ɛ mɛ; lɛ gani batrɔtrɔ ʋa gi Aya a, gi oʋítse e, akpɛ ní mɛ ɛ. Aya ebu le abasɛ amade na petee, tɔ ɔnɔ kakaa aaziŋa tɔ aabitɛ ní lɛ aʋa a. 27Mlaki tɔ kukpɔ̀ Aya tolee, gi yɛ tètè ko ete liboe kakaa ɛ, mlakɔ kusudra aki yɛ gani Yesu Kristo aʋa kɔtsinɔ kanɔmɛ anɔmɛ! Atɔ liba lɛ mɛ.

Currently Selected:

Roma 16: avn

Highlight

Copy