1 Korinto 1
1
1Keplekpaa lia kɛdɔ ní mɛ Paulo, gi bɛxwa a, gani Aya yɛ kupɛ́pɛ onu si mize Yesu Kristo yɛ ɔnɔ kpɛkpɛ ani dɔni blɔ onemi ye Sostenes klɔ. 2Mɛɛŋwlimi ka ɛki Aya yɛ ɔsɔli ha lɔ ní Korinto, ki mlɔ banama su gi Kristo adra a, gi ba Aya axwa si beze Aya yɛ banɔ dradra ba ɛ. Aki si mlɔsu ɛdra gani Yesu Kristo aʋa ŋwisi kiliɛ gi abitɛ aki banima ní ɔkɔ kakaa kinɛ ɛ, banama gi bizɛxwa blɔ ɔkaɛ Yesu Kristo yɛ linyi ne e. Yɛ onu blɔ ani ba ɔkaɛ. 3Tɔ Aya blɔ Ɔka ni Ɔkaɛ Yesu Kristo baki mlɔ lipomepɛpɛ ni kusuyɔ.
Paulo edo Aya ɖase
4Mizeedo Aya ɖase lipoe kakaa ní mlɔ litukpo kɔkpɛ lipomepɛpɛ nɛ gi aki mlɔ ɔ, gani Kristo Yesu aʋa ɛ. 5Ní yɛ mɛ ɛ, Aya aki mlɔ ɔha lɔ exo glegle ní kude kakaa elu onu gi ɛɛki si mlɛzeebu liboe kakaa ese mumɔ, lɛ mlɔ kuboeteo kwina a. 6Aya atrɔ likla lɛ aʋa aki mlɔ si, liboe lɛ gi kwisi mlɔ ní Kristo su i, linu anukwarɛ. 7Lɛ klɔ ʋa loso e, Ɔfuɛfuɛ nɔ mɛ kidɔkɔkɔ kakaa ɛ liɛ gi mlɛzia ɛ, kiliɛ ní mlɔ awla, gi mlɛkɔ epe lipoe lɛ ɛ, gi Aya aabu blɔ Ɔkaɛ Yesu Kristo basɛ ɛ. 8Yɛ aakpɛ mlɔ kigagla zɛkɔna ni ni ɔgù klɔ ɔ, gi ɔnɔnɔ ɔ́trabu mlɔ lipɔ ɔ liwe lɛ gi blɔ Ɔkaɛ Yesu Kristo aadzi ba ɛ. 9Aya gi onu anukwarɛ onete e, yɛ axwa mlɔ si mleze likpɔ nì Yebi ye Yesu Kristo blɔ Ɔkaɛ.
Kulɛlɛ ní ɔsɔli ha lɔ mɛ
10Meeʋi idɔni mlɔ klɔ mɛ benemi ba gani blɔ Ɔkaɛ Yesu Kristo linyi ne me si, mlenu mlɔ ahanuglɔ ba ese e. Mlakíki si kulɛlɛ kuba mlɔ kusi i. Boŋu i, mlakpɛ likpɔ nì kugyodi tule, mleze likpɔ ní kugyodi tule ní kutrɔtrɔ tule me. 11Lɛ ese linu si, mɛ benemi ba, banɔatɔ gi bɛdɔ Kloe yɛ Kepea mɛ ɛ, bɛsi mɛ si eboe hehe alɛ ní mlɔ kusi. 12Liboe lɛ gi mɛɛpani i, lɛ linu si mlɔ mɛ ɔnutɔ ɛɛpani si; “Mɛ malɛ ni Paulo kude,” ɔtɔ fɛ si, “Malɛ ni Apolo kude,” loo si, “Malɛ ni Petro kude,” lɛ ɔtɔ kyɛ si ì, “Malɛ ni Kristo tètè kude.”
13Miʋí mlo si, kilɛ Kristo alɛ yɛ isu ya akpɛ ní paso paso ʋa mɛ na? Lɛ mɛ Paulo e mɛ metse ní ose lo su aki mlɔ na? Bɛkpɛ kuni ki mlɔ mɛ ɔtɔ ni Paulo yɛ linyi ne me na a? 14Medo Aya ɖase si mákpɛ kuni iiki mlɔ mɛ ɔtɔtɔ sani Krispo ani Gayo ko o. 15Ɔnɔnɔ ɔ́tratani kupani si, bɛkpɛ kuni iiki ba ní mɛ linyi ne me e. 16Oo, ma plɛ aŋu si, makpɛ kuni akí Stefana nì yɛ kepea, pɔ máplɛ aŋu xe makpɛ kuni aki ɔnɔ dzedze ɔtɔtɔ tɔ ɔ. 17Lɛ ese linu si Kristo ɔ́tsisi mɛ si tɔ mizɛɛkpɛ kuni ɔki banɔ ɔ, boŋu i tɔ mizɛɛpani yɛ liboe Gbã nɛ. Lɛ aní ni ɔnɔ gbagbee yɛ kuboete onu atɔ gani lɛ mɛ ɛ, osetsase lo aalila lɔ kigagla ɛ.
Kristo yɛ onu Aya yɛ kuboeteo ni yɛ kigaglaɛ
18Lɛ ese linu si osetsase lo su liboe le e, linu ligaboe kí banama gi bɛɛlila ɛ; pɔ kí blɔ banama gi beebu i, lɛ linu Aya yɛ kigaglaɛ. 19Lɛ ese linu si bɛŋwlimi nɛ ɛplɛ si,
“Maazizi beboete ba ba kuboete o
lɛ maabu basɛ si beplekpate ba ba kuboesenu yo kúnu kididɔ.”
20Kɔ nifɔ oboete ye ɔlɛ ɛ? Lɛ nifɔ oplekpate ye ɔlɛ ɛ? Lɛ nifɔ ɔniliɛ gi izeehe eboe la ní omono kelea mɛ ɔlɛ ɛ? Aya abasɛ si kelea lia ya mɛ kuboeteo e kunu linukpaboe! 21Lɛ Aya ní yɛ kuboeteo me e, abitɛ lɛ si banima bakíte ye gani batutɔ ba kuboeteo me, boŋu i, liku yɛ liŋu si gani anukpaboe ala gi kwipani mɛ ɛ, yɛ aabu banama gi bɛziŋa ɛ. 22Yudanɛ ma bɛɛpɛ enugutseboe lɛ Helanɛ ma kɔ ɛ bɛɛpɛ kelea mɛ kuboeteo. 23Pɔ̀ kwipani ní Kristo gi bɛkla ní ose lo su u: linu liboe gi liitu Yudanɛ ma ina nɛ, lɛ linu linukpaboe ki banama gi bénu Yudanɛ ma ɛ. 24Pɔ ki banama gi Aya axwa ɛ, ki Yudanɛ ma ni Helanɛ ma ɛ, liboe lɛ ya linu Kristo, gi yɛ onu Aya yɛ kigaglaɛ ni Aya yɛ kuboeteo. 25Lɛ ese linu si kidiliɛ gi kinu linukpaboe kí Aya ɛ, kinu kuboete gluglu i sani ɔnɔ gbagbe yɛ kuboeteo, lɛ niklɔ gi Aya ebotso e, niklɔ ɔlɛ gagla sani ɔnɔ gbagbe yɛ kigaglaɛ.
26Benemi ba, mlaplɛ aŋu kiliɛ gi mleeze e, xe Aya axwa mlɔ ɛ. Ní banima kugyodi yo onu i, mlɔ me banɔ glegle mlɔ aŋu ádra, lɛ ozekɔ óze ní mlɔ mɛ beglegle ba awla a, lɛ mládɔ kupe ʋidi me kyɛ. 27Pɔ̀ Aya akya kelea lia mɛ banama gi báma liboeboe me e, tɔ yikɔ ba kpɛ beboete ba kuye, lɛ akya kela lia mɛ bidɔ bɛklɔ gi kigagla kima bɛ awla ɛ, si yikɔ bɛ ɛkpɛ banama gi bebu si bali gagla ɛ, kuye e. 28Akya kidiliɛ gi kelea mɛ kébu si kinu kididɔ ɛ, bɛ klɔ gi bɛkpɛ kakpaa ɛ, tɔ yikɔ bɛ zizi kidiliɛ gi kelea mɛ kebu si kiliɛ veve e. 29Atɔ ɔnɔnɔ ɔkitani isu kudɔ ní Aya aŋu mɛ. 30Kɔkpɛ yɛ loso mlalɛ ní Kristo Yesu me, gi yɛ edzì kuboeteo aki blɔ dɔni Aya klɔ ɔ. Yɛ onu blɔ kude gyɔgyɔɔ, blɔ kusudraa, ani blɔ kubúbú yo. 31Lɛ loso kiliɛ gi bɛŋwlimi nɛ ɛplɛ ɛ, “Ɔniliɛ gi apɛ si yidɔ isu i, ɔdɔ isu ya ní Ɔkaɛ yɛ mɛ ɛ.”
Currently Selected:
1 Korinto 1: avn
Highlight
Share
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
