Roma 15

Mlakíku isu ya aŋu u, boŋu i mleku banima aŋu

1Blɔ banama gi kulɛ gagla ní kuziŋaa mɛ ɛ, lilɛ si kuplɛ litɔ kese ki banama gi báma ɛgagla ní kuziŋaa mɛ ɛ, tɔ betu ba adɔtu la. Líma si kuku isu ya aŋu u. 2Boŋu i, lilɛ si blɔ pɔ́ kuku blɔ benemi ba aŋu ki ba tutɔ ba kupɛ̀pɛ ɛ, tɔ kuki tɔ betsi ní ba kuziŋaa mɛ. 3Lɛ Kristo kyɛ ɛ, óku isu ya aŋu u. Boŋu i, ŋwisi kiliɛ gi liboe le lipani si i, “Bekpinia ʋa gi bekpini mlo e, bɛdɔ ní mɛ aʋa.” 4Kidɔ kakaa gi bɛŋwlimi zanɔ ɛ, bɛŋwlimi kɛ tɔ bibasɛ blɔ bidɔ, tɔ kwiamɔ kudeonudidi gani litɔplɛplɛkese ni ɔna kuvuvu liɔ gi Aya liboe le lizɛɛki blɔ mɛ ɛ.

5Atɔ Aya gi yɛ kɔ litɔplɛplɛkese ni kigagla kpɛkpɛ kizɛɛdɔ ɛ, ɔki mlɔ kugyodi tule gi mlakɔze ni Kristo Yesu yɛ liŋwitsɛ lɛ kude e, 6atɔ mlɔ petee mlaakpɛ likpɔ nì ole tole tɔ mlakpɔ̀ Aya, blɔ Ɔkaɛ Yesu Kristo yɛ Ɔka.

Liboe Gbã nɛ ki banama gi bénu Yudanɛ ɛ

7Lɛ loso mlaazi mlɔ ahanuglɔ ba, ki Aya yɛ kusudraa, ŋwisi kiliɛ gi Kristo azɛ mlɔ kinɛ ɛ. 8Lɛ mɛɛsi mlɔ si Kristo yɛ ligbã́ nɛ mɛ axwɛwawa la ɛ, eze ki Yudanɛ ma tɔ libasɛ si Aya onu anukwarɛ onete, gi izɛɛki si yɛ kakaplɛa a, gi aka aplɛ aki ba bakatsi ba ɛ, kizɛɛba ka mɛ ɛ. 9Lɛ bizɛɛki si banama gi bénu Yudanɛ fɛ ɛ, bamɔ kudeonu tɔ bakpɔ̀ Aya kɔkpɛ yɛ asigaga la loso o. Kiliɛ gi liboe le lipani si i,

“Lɛ loso maakpɔ wɔ ní Banama gi bénu Yudanɛ ma kusi i;

Maaza kukpɔ̀kpɔ̀ idzi ki wɔ.”

10Lɛ lipani dzɛ si i,

“Mlamɔ isami, mlɔ banama gi mlénu Yudanɛ ɛ;

mlamɔ isami mlɔ banama gi mlenu Yadanɛ nì Aya yɛ banima a!”

11Lɛ dzɛ ɛ,

“Mlakpɔ Ɔkaɛ, mlɔ Banama petee gi mlénu Yudanɛ ɛ;

mlakpɔ̀ yɛ, mlɔ banima petee!”

12Lɛ dzɛ ɛ, Yesaya apani si,

“Yese yɛ osobi aaŋwi;

yɛ aaba lɛ aaŋa banama gi bénu Yudanɛ ɛ aʋa,

lɛ biakɔ ba kudeonudidi yo trɔ ní yɛ aʋa.”

13Atɔ Aya, gi onu kudeonudidi yo ɔdɔklɔ ɛ, ɔki tɔ mleyi nì isami, ni kusuyɔ gani mlɔ kuziŋa ní yɛ mɛ ɛ, tɔ mlɔ kudeonudidi yo kutrɛ ní kɔ aʋa tɔ kutsi gani Aya yɛ Ɔfuɛfuɛ nɔ kigagla ɛ mɛ.

Paulo ebu isu unu kidiliɛ loso gi aŋwlimi keplekpaa lia lifumose e.

14Mɛ benemi ba: Mɛ ɔtutɔ maka ní lɛ aʋa si mlete eboe gbã, lɛ kuboete kakaa kulɛ ní mlɔ awla, lɛ mlɛɛtani mlɔ ahanuglɔ ba bidɔ kubasɛ ɛ. 15Pɔ̀ ní keplekpaa lia ya mɛ ɛ, medu aŋu ní eboe atɔ su gi la aʋa maplɛ aŋu aki mlɔ ɛ. Medu aŋu na kɔkpɛ kudeo liɔ onu gi Aya aki mɛ ɛ loso, 16gi menu Kristo Yesu yɛ ɔnɔsumu i, tɔ miwa axwɛ na aki banama gi bénu Yudanɛ ɛ. Mizeesumu ŋwisi kusumu ɔka kinɛ ɛ, ní kiliɛ gi mizɛɛpani liboe Gbã nɛ ɛ, gi lidɔ ní Aya kɔ ɔ, tɔ banama gi bénu Yudanɛ fɛ ɛ, biaaze bidɔkɔkɔ gi Aya yɛ Ɔfuɛfuɛ nɔ ebu lidze e, xe biaku Aya aŋu i. 17Gi malɛ likpɔkpɛkpɛ mɛ ni Kristo Yesu loso e, maatani isu kudɔ ní mɛ kusumu yo ki Aya su u. 18Maapani tètè aŋu mɛ modi ni kidiliɛ gi Kristo abitɛ gani mɛ aʋa a, gi meze ni ɔtɔ ɔ, aki banama gi bénu Yudanɛ ɛ, tɔ benu kutu aki Aya. Abitɛ lɛ nite gani eboe, ni kiboebitɛ mɛ, 19gani enugutseboe ni eboe mamɔ edi ni gani Aya yɛ Ɔfuɛfuɛ nɔ kigaglaɛ mɛ ɛ. Lɛ loso ní mɛ kudegagaa dɔni Yerusalem kɔtsini Iliriko kesea mɛ ke e, mebu liboe gbã nɛ ní Kristo su abasɛ mɔmɔɔmɔ. 20Mɛ kupɛpɛɔ kwize lipoe kakaa si mibu liboe gbã nɛ onu ní ikɔɛ lɛ klɔ gi bénu Kristo onu ʋidi i, tɔ mikíwa ɛtrɔ ní ɔxɔ gi ɔnutɔ akpɛ aʋa a. 21Ŋwisi kiliɛ gi bɛŋwlimi kpɛ ní Aya yɛ liboe le me si,

“Banama gi básɛ liboeboe ni yɛ su i biaamɔ,

lɛ banama gi bénu i biaanu le ese.”

Paulo atrɔ si yɛ atrɛ ní Roma

22Axwɛ ana la etsi kudeonu iiki mɛ lipoe glegle si mikiba mlɔ klɔ. 23Pɔ̀ abla gi meblo ni mɛ axwɛ na ní besi ba ya ɛ, lɛ gi mazɛɛpɛ ní agɔ glegle mɛ si miba tɔ mimɔ mlɔ ɛ, 24meedi kudeonu si miba abla, maapɛ si mimɔ mlɔ xe mɛɛtrɛ ní Spania a, tɔ mlaapɔni mɛ ní mɛ niklɔ kutrɛtrɛ mɛ xegi meze ní mlɔ su taʋɛ ɛ. 25Pɔ̀ ablahate e, mɛɛtrɛ ní Yerusalem tɔ miwa lixwɛtɔ ɛki Aya yɛ banima gi balɛ ní níklɔ ɛ. 26Lɛ ese linu si isɔli ha lɛ ní Makedonia ni Axaya bɛkɔ ɔna faã si biaagyɔ bidɔ tɔ biaakɔ pɔni bazianete ba ní baʋaziŋa ba kusi ní Yerusalem. 27Kibitɛɛ liɛ klɔ kidɔ batutɔ ba kɔ; pɔ̀ ni anukwarɛɛ mɛ ɛ, línu ba lixwɛ si bapɔni ba. Gi Yudanɛ ma bɛlɛ ba Ɔfuɛfuɛ nɔ mɛ kukriraa nì banama gi bénu Yudanɛ ɛ, lilɛ si banama gi bénu Yudanɛ kyɛ bakɔ ba kelea mɛ bidɔmɔmɔ ʋɛ kukriraa tɔ bakɔ apɔni Yudanɛ ma. 28Xegi meblo ni lixwɛ ɛnɛ ya ɛ, xe makɔ bibɔɛ ʋɛ petee gi bɛgyɔ ɛki ba tsini ba ɛ, maasɛ trɛ ní Spania lɛ maabadi mlo ní mɛ kudeo aʋa xe mɛɛtrɛ ɛ. 29Xegi maaba mlɔ klɔ ɛ, mete si maaba ni Kristo yɛ kukriraa petee ki mlɔ.

30Mɛ benemi ba mɛɛkpɛ mlɔ kigagla si, gani blɔ Ɔkaɛ Yesu Kristo ni kunɔlɔɔ gi Ɔfuɛfuɛ nɔ izɛɛkɔ mɛ ɛ; mlaapɔni mɛ ní mɛ kuŋwlɛwlɛɔ mɛ gani Aya kuxwaxwa mɛ lipoe kakaa ní mɛ litukpo. 31Mlaxwa Aya tɔ obu me ní banama gi bázɛ Aya aʋa ŋa ní Yudea ɛ, iwla mɛ, atɔ mɛ axwɛwawa la ní Yerusalem i, eku Aya yɛ banima aŋu ní niklɔ. 32Lɛ loso e, maaba mlɔ klɔ ni isami glegle xe linu Aya yɛ kupɛpɛ ɛ, tɔ mɛ mlɔ kɔ kubabaa kwiakpɛ blɔ pɔ́ isami i, xe maba ku i. 33Atɔ Aya, blɔ kusuyɔɔ ɔdɔklɔ, oze ni mlɔ petee. Atɔ liba lɛ mɛ.

Currently Selected:

Roma 15: avn

Highlight

Copy