Roma 14

Mlakíxwa litsi ni mlɔ ahanuglɔ ba

1Mlazi banama gi ba kuziŋa kúma gagla ɛ, lɛ mlakíhe eboe ni ba ní ba begyodi ʋa su u. 2Banɔ batɔ ba kuziŋaa kwiki ba kudeonu si baŋa kidɔ kakaa elu, pɔ̀ ɔniliɛ gi yɛ kuziŋaa kúma gagla ɛ, izɛŋa siga tètè ko. 3Ɔniliɛ gi aaŋa kidɔ kakaa elu i, ɔkikpɛ ɔniliɛ gi ɔ́ʋiŋa kidɔ kakaa elu i, kakpaa; lɛ ɔniliɛ gi izɛɛŋa siga tètè fɛ ɛ, ɔkibu ɔniliɛ gi ɛɛŋa kidɔ kakaa elu i lipɔ; lɛ ese linu si Aya azɛ ɔniliɛ klɔ. 4Nyaŋwɛ wònu si xwa litsi ni ɔnɔ dzedze yɛ ɔnɔsumu ye e? Yɛ ɔtutɔ lɔ yɛ ɔkaɛ ko aatsa lɛ mɛ xegi abitɛ mumɔ loo ɔ́bitɛ mumɔ ɔ. Lɛ aaŋa aʋa lɛ ese linu si Ɔkaɛ aatani kubitɛ si tɔ ɔŋa aʋa a.

5Ɔnutɔ izeegyoedi si liwetɔ liziã ɛsani ewe gɔgɔ la, lɛ ɔnutɔ fɛ izegyoedi si ewe la pɔ́ ɛɛsɔ ɔ. Blɔ mɛ ɔnɔ kakaa ɔtrɔ likla ní yɛ begyodi ʋa aʋa. 6Ɔniliɛ gi izɛkpɛ kubùbù ní liwe tile litɔ su i, izɛbitɛ nite si yikɔ ɛkpɛ kubùbù ní Aya su; ɔniliɛ gi izɛɛŋa kidɔ kakaa ɛ, abitɛ lɛ tɔ yikɔ ɛkpɛ kubùbù ní Ɔkaɛ su, lɛ ese linu si izeedo Aya ɖase ní kiŋaŋaɛ litukpo. Ɔniliɛ klɔ gi ɔ́pɛ si yiŋa kiditɔ ɛ, abitɛ lɛ nite tɔ yikɔ ɛkpɛ kubùbù ní Ɔkaɛ su, lɛ izedo Aya ɖase e. 7Blɔmɛ ɔ́tɔtɔ ɔ́ma ligbã́ ɛki isu tètè e, nite ke blɔmɛ ɔ́tɔtɔ oʋítse kí isu ya tètè e. 8Xegi kulɛ ligbã́ ɛ, Ɔkaɛ loso kulɛ ligbã́ nɛ, lɛ xegi kwitse kyɛ ɛ, Ɔkaɛ loso kwitse e, lɛ loso xegi kwitse loo kulɛ ligbã́ nɛ ɛ, Ɔkaɛ yɛ banɛ kunu.

9Liboe lɛ ya loso Kristo etse, xe ayɔ ɔ, xe edzì ligbã́ a, tɔ aadzi Ɔka ɔki banama gi balɛ ligbã́ a, ni banama gi betse e. 10Lɛ mlɔ banama gi siga sɛ ko mlɛzɛŋa ɛ, ege lɛ loso mlɛzɛɛxwa litsi ni mlɔ benemi ba a? Lɛ mlɔ banama gi mlɛzɛŋa kidɔ kakaa ɛ, ege lɛ loso mlɛzɛɛkpɛ mlɔ benemi ba kakpaa ɛ? Mlaplɛ aŋu si blɔ petee kwitralɛɛ ní Aya aŋu mɛ gi aaxwa litsi ni blo o. 11Lɛ Aya yɛ liboe le lipani si i,

“Ɔkaɛ apani si, ‘Gi menu Aya a, gi ɔlɛ ligbã́ nɛ ɛ,’

‘ɔnɔ kakaa aaze ní yɛ aklamasi na aʋa ní mɛ aŋu mɛ,

lɛ ɔnɔ kakaa aadra lɛ mɛ si mɛ menu Aya a.’ ”

12Lɛ loso e, lilɛ si blɔ mɛ ɔnɔ kakaa a, aaki akɔnta ní yɛ isu ya su ki Aya.

Mlakíki tɔ mlɔ benemi ba begleʋe

13Lɛ loso e, mlaki tɔ kumɔni etsi kuxwa ni blɔ ahanuglɔ ba. Boŋu i, mlatrɔ lɛ si mlatrábitɛ kididɔ gi kiaki si mlɔ benemi ba e, biamlima loo tɔ biawɔli ku kuzimizi me e. 14Mɛ likpɔkpɛkpɛ ni Ɔkaɛ Yesu i, liki si maka ní lɛ aʋa si kiŋaŋaɛ tɔtɔ kíma gi kɛsu kídra ní ɔkɔ lɔ onu u; pɔ̀ xe mlɛziŋa si kiŋaŋaɛ tɔ kɛsu kídra ɛ, kɔ kɛsu kítradra ɛki mlɔ ɔ. 15Xe kiditɔ gi wɔŋa a kikpɛ onemi nɛ kunugu i, kɔlɔ mlaʋíga ní kunɔlɔ mɛ o. Mlakíki si kiŋaŋaɛ liɛ gi mlɛɛŋa ɛ, kizizi ɔnɔ gi yɛ loso Kristo etse e! 16Mlakíki kidiliɛ gi mlɛkɔ lɛ si kipɛ ɛ, kizi linyi nyani nyani i. 17Lɛ ese linu si Aya yɛ Kaʋaŋaa ɛ, kénu kiŋaŋa loo bidɔŋwɛŋwɛ liboe e, pɔ̀ kenu kude dradra, kusuyɔ ni isami gi Aya yɛ Ɔfuɛfuɛ nɔ izɛɛkɔ ɛ. 18Lɛ loso xe banima beesumu Kristo ní kudeo liɔ ya aʋa ɛ, bizeeku Aya aŋu lɛ bizɛɛkɔ si banima biazɛ ba liboe le.

19Lɛ loso lipoe kakaa ɛ, lilɛ si kutí bidɔ bɛklɔ gi bizɛɛmani kusuyɔ ɔ, xe bizɛɛkpɛ blɔ ahanuglɔ ba kigagla ní kuziŋa mɛ. 20Mlakízizi kidiliɛ gi Aya abitɛ ɛ, kɔkpɛ kiŋaŋa loso o. Mlaatani kidɔ kakaa kuŋa, pɔ̀ lípɛ si mlaŋa kidiliɛ gi kiaki si ɔnutɔ aawɔli ku kuzimizi me e. 21Kidɔ gbã ɛliɛ klɔ gi mlaabitɛ ɛ, kɛ kinu si, mlakíta kigyɛ a, ŋwɛ kuda, loo bitɛ kidiliɛ gi kiaki si wɔ onemi nɛ ɔʋaziŋa awɔli i.

22Mlabla kidiliɛ aʋa gi mlɛziŋa a, ní liboe lɛ ya su ní mlɔ ni Aya kusi. Basami nɛ benu banama gi baʋibu isu ya lipɔ ɔ, xe bɛbitɛ kidiliɛ gi bɛmɔ si kipɛ ɛ! 23Pɔ̀ xegi ɔ́ka a, ní kidiliɛ gi ɛɛŋa aʋa ɛ, Aya aabu ye lipɔ xe aŋa kɛ ɛ, lɛ ese linu si yɛ kiboebitɛ ɛ, kíga kuziŋa mɛ ɛ. Lɛ kidɔ kakaaɛ liɛ gi kíga kuziŋa mɛ ɛ, kinu kuzimizi.

Currently Selected:

Roma 14: avn

Highlight

Copy