Roma 13

Mlabubɔ isu ya akpɛ ní Kesea ʋa baʋaŋa ba ese

1Ɔnɔ kakaa ɔkpɛ kubùbù ní kesea mɛ baʋaŋa ba su, lɛ ese linu si kaʋaŋaa tɔtɔ káma gi Aya ɔ́ki ka kudeonu u, lɛ abla kaʋaŋaa ɛ, Aya yɛ edu ka. 2Lɛ klɔ ʋa loso e, ɔniliɛ gi ayɔ kedu ní kaʋaŋaa lia gi kalɛ abla su i, ayɔ kedu ni Aya yɛ kutrɔtrɔ su u; lɛ ɔnɔ kakaa gi abitɛ nite e, aamani litsixwaxwa ní isu aʋa. 3Lɛ ese linu si banama gi bizɛɛbitɛ eboe gbã ɛ, baʋíse baʋaŋa ba, pɔ̀ banama gi bizɛɛbitɛ eboe zimizi na ɛ, ba bizese ba. Xegi mlápɛ si mleese banama gi benu baʋaŋa ba ɛ, kɔlɔ mlabitɛ kidiliɛ gi kipɛ ɛ, tɔ biakpɔ mlɔ, 4lɛ ese linu si benu Aya yɛ banɔsumu gi bɛɛwa axwɛ ɛki mlɔ kupɛ̀pɛ ɛ. Pɔ̀ xe mlɛbitɛ eboe zimizi i, kɔlɔ lilɛ si mlese ba lɛ ese linu si ba kigagla ɛ, si biahe kutu ki mlɔ ɛ, kilɛ ɛ. Benu Aya yɛ banɔsumu lɛ biakɔ Aya yɛ kutuheheo ɔki banama gi bizɛɛbitɛ eboe zimizi na ɛ. 5Kɔkpɛ lɛ ya loso e, lilɛ si mlenu kutu aki baʋaŋa ba; aní kɔkpɛ Aya yɛ kutuheheo tètè loso o, pɔ̀ ki liboe lɛ gi mlɔ ina nɛ iasi mlɔ kyɛ loso o.

6Lɛ loso mlazɛtsa mlɔ kagyɔa kyɛ ɛ, lɛ ese linu si baʋaŋa ba ɛ, bɛɛwa axwɛ na ɛki Aya xegi bɛɛŋa kesea aʋa ɛ. 7Lɛ loso mlatsa kidiliɛ gi lilɛ si mlatsa ɛ, mlatsa mlɔ kagyɔa ni kesea liʋɛ nɛ, lɛ mlakɔ kubùbù ni kukpɔ̀kpɔ̀ aki bamɛ ɔkakaa a.

Mlalɔ mlɔ ahanuglɔ ba

8Ɔnɔnɔ liʋɛ likíwɔ ní mlɔ su mɔtsamɔtsa, sani lɛ ya gi liʋíblo o gi lɛ linu si mlalɔ mlɔ ahanuglɔ ba a. Ɔniliɛ gi alɔ yɛ ɔhanuglɔ yɛ ɛ, abitɛ ní ɔsã nɔ aʋa. 9Ɔsã nɔ gi bɛkpɛ si i, “Wukíwa kihasi i,” “Wukíye ɔnɔ ɔ,” “Wukízuru u,” “Wukíkɔ kaŋuza ni kidiliɛ gi kinu ɔnɔ dzedze kinɛ su u,” la ya petee ni edzedze la gi ɛsrɔni la ɛ, ɛkpɛ likpɔ ní ɔsã toleɔ lɔ ya mɛ si, “Lɔ wɔ ɔhanuglɔɛ ŋwisi wɔ ɔtutɔ wɔ isu ya.” 10Kunɔlɔɔ kuʋíkɔ si babitɛ eboe zimizi amani ɔhanuglɔ su u; lɛ loso e, kunɔlɔɔ kunu ɔsã zizi nɔ aʋa kubitɛ ɔ.

11Linu si mlabitɛ lɛ nite, lɛ ese linu si mlete si lipoe le lina gi mlanyime dɔni mlɔ sra sɛ mɛ ɛ. Lɛ lipoɛ lɛ klɔ mɛ gi kwiamɔ kubúbú i, litipɔnɔ abla sani lipoe tɔpu inɛ gi kwizi ŋa ɛ. 12Elesi la iha za, kelea kɛti pɔ́. Mlaki tɔ kumɔni litumu ne kiboebitɛɛ kubitɛ ɛ, atɔ mlaki tɔ kukɔ kigũ yɛ bitadɔ mɛ, tɔ kuta kigũ yɛ ní kuklekleo onu, ŋwisi banɔ gi balɛ ni kuklekleo me kinɛ ɛ. 13Mlaki tɔ kuvù isu ya mumɔ, ŋwisi banama gi balɛ ní liwo le kuklekleo onu kinɛ ɛ; ahasiboe loo adaŋwɛmuboe, anyaniboe loo eyeyeboe, akpafu loo kaŋuza akíze ní blɔ mɛ ɛ. 14Pɔ̀ mlaki tɔ Ɔkaɛ Yesu Kristo oze ni mlɔ su ŋwisi liwu kinɛ ɛ, tɔ mlamɔni mlɔ isu ya mɛ kuzimizi yo kutu kuta a, tɔ mlamɔni kɔ bapɛ́pɛ ʋa aʋa kubitɛ ɛ.

Currently Selected:

Roma 13: avn

Highlight

Copy