Roma 11
11
Aya yɛ asigaga la kí Israɛl
1Kɔlɔ meeʋi si: kiyurɔ Aya ayurɔ yɛ ɔtutɔ yɛ banima na a? Lima nite kura! Mɛ ɔtutɔ fɛ Yuda ɔnɛ me nu, Abraham yɛ osobi gi madɔ ní Benyamin okú no me e. 2Aya ɔ́yurɔ yɛ banima, gi akya kpɛ ɔtɔ ɔ. Mlete kidiliɛ gi bɛŋwlimi kpɛ ní Aya yɛ liboe le keplekpaa mɛ ɛ, lipoe lɛ klɔ gi Eliya aki Aya litukpo ní Israel su u, gi asi Aya si i; 3“Ɔkaɛ beye wɔ beboedoplɛ ba, lɛ bɛyaʋi wɔ idɔpɔʋisuʋɔ lɛ ɛ; Mɛ tètè ko magɔ, lɛ bɛɛpɛ si beeye mɛ fɛ ɛ.” 4Kitɛ Aya ebu le onu aki yɛ ɛ? “Mabla aki isu ya benyime akpe tiegloele gi bédu aklamasi kese aki Baal ɔbu yɛ edi i.”
5Nite ke lilɛ abla: banɔ kisrɛsrɛ sisami itɔ kìgɔ ní banama gi Aya akya aki isu ya kusi i, kɔkpɛ yɛ lipomepɛpɛ nɛ loso. 6Kɔkpɛ yɛ lipomepɛpɛ nɛ loso akya ba, aní ní kidiliɛ gi bɛbitɛ loso o. Lɛ xe Aya kukyakyaa kwidɔ ní banima kiboebitɛɛ mɛ ɛ, kɔlɔ yɛ lipomepɛpɛ nɛ lítráze lipomepɛpɛ tɔ ɔ.
7Kɔ kitɛ ɛ? Israel bebi ba bamɔ kidiliɛ gi bɛɛpɛ ni kimbi kyikyi i. Likpɔkpɛkpɛ sisami lɛ klɔ gi Aya akya ɛ, lɛ ko limɔ bɛ; banɔ gɔgɔ ba ɛ, ba atukpa la mɛ etsí ní Aya kuxwaxwaa su u. 8Kiliɛ gi bɛŋwlimi kpɛ ní Aya yɛ liboe le me si i,
“Aya abitɛ lɛ si ba begyodi ʋa ni ba ina nɛ biʋíwa axwɛ ɛ,
loso kɔna ni omono e, báʋimɔ ɔ, lɛ baʋínu eboe ese e.”
9Lɛ Dawid apani si,
“Atɔ ba eweŋaŋa na edzì kupe aki ba;
atɔ Aya ɔki tɔ betu bikliʋi tɔ ohe kutu ɔki ba!
10Atɔ Aya oni ba bimbi ʋe tɔ bakímɔ ɔ;
tɔ ba kiboebitɛ zimizi ye kidzi lidɔtu gi biaxa ní lɛ ese lipoe kakaa a.”
11Meeʋi dzɛ si: Agi Yudanɛ ma bɛmlima ɛ, begleʋe gi batráyɔ tɔɔ na a? Líma nite e! Pɔ̀ kɔkpɛ ba eboe zimizi na loso e, kubúbú kwiba ɛki banama gi bénu Yudanɛ ɛ, tɔ Yudanɛ ma kimbi kizã a. 12Yudanɛ ma kuzimizi yo kwimani kukrira zikedzi iiki kelea mɛ, lɛ ba Ɔfuɛfuɛ nɔ mɛ lipi le liki banama a, gi bénu Yudanɛ ma ɛ, kukrira ʋidi. Kɔlɔ kitɛ gbɛgbɛ kukriraa kwiazɛ ɛ, xegi bɛkɔ Yudanɛ ma kiklaklaɛ mɛ petee pɔnɔ ɔ!
Banama gi bénu Yudanɛ ɛ, biamɔ kubúbú
13Mɛɛpani ki mlɔ banama gi mlénu Yudanɛ ɛ; agi manya enu ɔnɔkpɛkpɛ ki banama a, gi bénu Yudanɛ ko e, maamɔ isami ní mɛ axwɛ la su. 14Nyafɛ maatani kúkɔ si, banima ní mɛ ɔtutɔ mɛ benete ba kusi i, ba kimbi kiazã atɔ Aya aabu bamɛ batɔ. 15Lɛ ese linu si gi bɛyurɔ ba ɛ, Aya alulɔ yɛ ni kelea banɔ dzedze ba petee kusi. Kitɛ liaze, xe Aya edzini ba kuzɛ ɛ? Liaze ŋwisi ligbã́ ki bekpo ʋa a!
16Xegi bɛkɔ lìklã nɛ kapɛ tɔpu ya ɛki Aya ɛ, kɔ lìklã zizi nɛ kyɛ linu yɛ linɛ ɛ; lɛ xegi isegu nɛ su idra ɛ, kɔ aya la su fɛ ɛdra ɛ.
17Bɛyasi ayaatɔ ní ose gi bɛkpɛ su u, lɛ bɛkɔ liŋwafu nɛ mɛ ose lo aya la ɛtsa ní lɔ onu i. Mlalɛ ko ŋwisi liŋwafu mɛ ise le lɛ aya a, lɛ abla ɛ, mlɛŋwɛ kuni dɔni ose lo igu ne me e. 18Kɔlɔ mlakídi banama gi bɛyasi zanɔ ŋwisi aya la kinɛ ɛ, ba aŋu mɛ. Kitɛ mlaadɔ̀ isu i? lise ya ko mlenu; mlaʋíki igu ne kiŋaŋa a, igu ne lɛ iitu mlo.
19Pɔ̀ wɔapani si i, “Ee, pɔ̀ bɛyasi aya la tɔ mimɔ oti oku kɔ ɔ.” 20Linu anukwarɛ, si bɛyasi aya la, lɛ ese linu si báziŋa a, pɔ̀ mlɔ kɔ mlɛdzi enu ose lo kapɛ katɔ, lɛ ese linu si mlɛɛzi ŋa. Pɔ̀ mlakídɔ isu ya ní lɛ su u; boŋu i, lifu liku mlo. 21Lɛ xe Aya ódi Yudanɛ ma asigaga a, gi balɛ ko ŋwisi eseya la ɔtutɔ ɔ; kigyo mlegyo le edi si aadi mlɔ kɔ asigaga na a?
22Ní ya kwiamɔ kiliɛ gi Aya izeedi asigaga ni kiliɛ gi yɛ eboe la alɛ gagla a. Ódi banama gi bɛbitɛ eboe zimizi na asigaga a, pɔ̀ apɛ lipo me aki mlɔ ɔ, xegi mlɛɛtrɛ lɛ aʋa ní yɛ asigagadidi la mɛ ɛ. Pɔ̀ xe mlegbe e, biayasi mlɔ fɛ zanɔ ní ose lo su. 23Lɛ xegi Yudanɛ ma bɛyurɔ ba kumɔziŋa ɛ, biadzini ba kutsa ní ose lo su; lɛ ese linu si Aya aatani lɛ kubitɛ ɛ. 24Mlɔ banama gi mlénu Yudanɛ ɛ, mlalɛ ko ŋwisi liya ní liŋwafu nɛ mɛ ose lo su, gi bɛyasi i, xe bedzini tsa ní ose kpɛkpɛ lɔ su u; gi nya ní eboe la onu i, litráze nite xe e. Yudanɛ ma balɛ ŋwisi ose kpɛkpɛɔ lɔ aya kinɛ ɛ, lɛ lilɛ plɔplɔ kí Aya si odzini ayaa la gi eboli i, kutsala ni ose lo dzɛ.
Aya aadi ɔnɔ kakaa asigaga
25Mɛ benemi ba, anukwarɛ kpokpo ɔtɔ gi béte tsa ɛ, ɔlɛ gi mapɛ si mlete e, lɛ ese linu si aaki si mlatrámɔ isu ya si mlete liboe. Lɛ linu si Israel bebi ba kutumonu yo kutráze etsinɔ ɔ, pɔ̀ kwitraze kɔzɛna ni lipoe lɛ klɔ gi banama gi bénu Yudanɛ ɛ, ba kiklaklaɛ mɛ kiana, xe biaba Aya klɔ ɔ. 26Lɛ kude uliɔ ya aʋa Israel petee aamɔ kubúbú. Ŋwisi kiliɛ gi bɛŋwlimi kpɛ Aya yɛ liboe le keplekpaa mɛ si i,
“Ɔnɔbu ye aadɔ ní Zion
lɛ aabu litukpomegagla lɛ ní Yakob besoebi ba mɛ ɛ.
27Maabitɛ kunyanya liɔ ya ni ba xe mebu ba eboe zimizi na azanɔ ɛ.”
28Agi bazɛ Liboe Gbã nɛ ɛ, lɛ Yudanɛ ma bedzi Aya yɛ ahwafianɛ ma ɛ, kɔkpɛ mlɔ banama gi mlénu Yudanɛ ma loso o. Pɔ̀ kɔkpɛ gi Aya akya ba loso e, bedzi yɛ baʋia kɔkpɛ ba baka ba loso. 29Lɛ Aya ɔʋítsrɛ yɛ begyodi ʋa ní ɔniliɛ klɔ gi aakya a, xe akrira su u. 30Mlɔ banama gi mlénu Yudanɛ kɔ ɛ, mlénu kutu aki Aya ba zanɔ ɔ; pɔ̀ abla ɛ, mlɛɛzi Aya yɛ asigagadidi la, lɛ ese linu si Yudanɛ ma ɛ, bénu kutu u. 31Niteme ke, kɔkpɛ asigaga ala gi mlɛzɛ abla ɛ, Yudanɛ ma bénu kutu aki Aya abla a, atɔ bafɛ ɛ, biaazɛ Aya yɛ asigagadidi la. 32Lɛ ese linu si Aya abitɛ banima petee ligbã bezeze ki kutumonumonu, tɔ aadi ba petee asigaga.
Mla ki tɔ kukpɔ̀ Aya
33Aya yɛ exo la ekeme lo! Aya yɛ kuboeteo ni yɛ kuboesenu yo kwidzu! Nyaŋwɛ aatani wɔ batrɔtrɔ ba ese kubu u? Lɛ nyaŋwɛ aatani wɔ bede ʋa ese kunu u? 34Kiliɛ gi bɛŋwlimi kpɛ ní Aya yɛ liboe le keplekpaa mɛ si,
“Nyaŋwɛ ete Ɔkaɛ yɛ begyodi ʋa a?
Nyaŋwɛ aatani kiɖaŋu kukpɛ ɔki yɛ ɛ?”
35“Nyaŋwɛ aki Aya kiditɔ edi i,
gi kizia si odzini kɛ kutsa ɔki yɛ ɛ?”
36Lɛ yɛ ebu kidɔ kakaa a, lɛ kidɔ kakaa kilɛ gani yɛ aʋa a, lɛ binu yɛ binɛ ɛ, Mlaki tɔ kukpɔ̀ Aya kɔtsinɔ kanɔmɛ anɔmɛ! Atɔ liba lɛ mɛ.
Currently Selected:
Roma 11: avn
Highlight
Share
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
Roma 11
11
Aya yɛ asigaga la kí Israɛl
1Kɔlɔ meeʋi si: kiyurɔ Aya ayurɔ yɛ ɔtutɔ yɛ banima na a? Lima nite kura! Mɛ ɔtutɔ fɛ Yuda ɔnɛ me nu, Abraham yɛ osobi gi madɔ ní Benyamin okú no me e. 2Aya ɔ́yurɔ yɛ banima, gi akya kpɛ ɔtɔ ɔ. Mlete kidiliɛ gi bɛŋwlimi kpɛ ní Aya yɛ liboe le keplekpaa mɛ ɛ, lipoe lɛ klɔ gi Eliya aki Aya litukpo ní Israel su u, gi asi Aya si i; 3“Ɔkaɛ beye wɔ beboedoplɛ ba, lɛ bɛyaʋi wɔ idɔpɔʋisuʋɔ lɛ ɛ; Mɛ tètè ko magɔ, lɛ bɛɛpɛ si beeye mɛ fɛ ɛ.” 4Kitɛ Aya ebu le onu aki yɛ ɛ? “Mabla aki isu ya benyime akpe tiegloele gi bédu aklamasi kese aki Baal ɔbu yɛ edi i.”
5Nite ke lilɛ abla: banɔ kisrɛsrɛ sisami itɔ kìgɔ ní banama gi Aya akya aki isu ya kusi i, kɔkpɛ yɛ lipomepɛpɛ nɛ loso. 6Kɔkpɛ yɛ lipomepɛpɛ nɛ loso akya ba, aní ní kidiliɛ gi bɛbitɛ loso o. Lɛ xe Aya kukyakyaa kwidɔ ní banima kiboebitɛɛ mɛ ɛ, kɔlɔ yɛ lipomepɛpɛ nɛ lítráze lipomepɛpɛ tɔ ɔ.
7Kɔ kitɛ ɛ? Israel bebi ba bamɔ kidiliɛ gi bɛɛpɛ ni kimbi kyikyi i. Likpɔkpɛkpɛ sisami lɛ klɔ gi Aya akya ɛ, lɛ ko limɔ bɛ; banɔ gɔgɔ ba ɛ, ba atukpa la mɛ etsí ní Aya kuxwaxwaa su u. 8Kiliɛ gi bɛŋwlimi kpɛ ní Aya yɛ liboe le me si i,
“Aya abitɛ lɛ si ba begyodi ʋa ni ba ina nɛ biʋíwa axwɛ ɛ,
loso kɔna ni omono e, báʋimɔ ɔ, lɛ baʋínu eboe ese e.”
9Lɛ Dawid apani si,
“Atɔ ba eweŋaŋa na edzì kupe aki ba;
atɔ Aya ɔki tɔ betu bikliʋi tɔ ohe kutu ɔki ba!
10Atɔ Aya oni ba bimbi ʋe tɔ bakímɔ ɔ;
tɔ ba kiboebitɛ zimizi ye kidzi lidɔtu gi biaxa ní lɛ ese lipoe kakaa a.”
11Meeʋi dzɛ si: Agi Yudanɛ ma bɛmlima ɛ, begleʋe gi batráyɔ tɔɔ na a? Líma nite e! Pɔ̀ kɔkpɛ ba eboe zimizi na loso e, kubúbú kwiba ɛki banama gi bénu Yudanɛ ɛ, tɔ Yudanɛ ma kimbi kizã a. 12Yudanɛ ma kuzimizi yo kwimani kukrira zikedzi iiki kelea mɛ, lɛ ba Ɔfuɛfuɛ nɔ mɛ lipi le liki banama a, gi bénu Yudanɛ ma ɛ, kukrira ʋidi. Kɔlɔ kitɛ gbɛgbɛ kukriraa kwiazɛ ɛ, xegi bɛkɔ Yudanɛ ma kiklaklaɛ mɛ petee pɔnɔ ɔ!
Banama gi bénu Yudanɛ ɛ, biamɔ kubúbú
13Mɛɛpani ki mlɔ banama gi mlénu Yudanɛ ɛ; agi manya enu ɔnɔkpɛkpɛ ki banama a, gi bénu Yudanɛ ko e, maamɔ isami ní mɛ axwɛ la su. 14Nyafɛ maatani kúkɔ si, banima ní mɛ ɔtutɔ mɛ benete ba kusi i, ba kimbi kiazã atɔ Aya aabu bamɛ batɔ. 15Lɛ ese linu si gi bɛyurɔ ba ɛ, Aya alulɔ yɛ ni kelea banɔ dzedze ba petee kusi. Kitɛ liaze, xe Aya edzini ba kuzɛ ɛ? Liaze ŋwisi ligbã́ ki bekpo ʋa a!
16Xegi bɛkɔ lìklã nɛ kapɛ tɔpu ya ɛki Aya ɛ, kɔ lìklã zizi nɛ kyɛ linu yɛ linɛ ɛ; lɛ xegi isegu nɛ su idra ɛ, kɔ aya la su fɛ ɛdra ɛ.
17Bɛyasi ayaatɔ ní ose gi bɛkpɛ su u, lɛ bɛkɔ liŋwafu nɛ mɛ ose lo aya la ɛtsa ní lɔ onu i. Mlalɛ ko ŋwisi liŋwafu mɛ ise le lɛ aya a, lɛ abla ɛ, mlɛŋwɛ kuni dɔni ose lo igu ne me e. 18Kɔlɔ mlakídi banama gi bɛyasi zanɔ ŋwisi aya la kinɛ ɛ, ba aŋu mɛ. Kitɛ mlaadɔ̀ isu i? lise ya ko mlenu; mlaʋíki igu ne kiŋaŋa a, igu ne lɛ iitu mlo.
19Pɔ̀ wɔapani si i, “Ee, pɔ̀ bɛyasi aya la tɔ mimɔ oti oku kɔ ɔ.” 20Linu anukwarɛ, si bɛyasi aya la, lɛ ese linu si báziŋa a, pɔ̀ mlɔ kɔ mlɛdzi enu ose lo kapɛ katɔ, lɛ ese linu si mlɛɛzi ŋa. Pɔ̀ mlakídɔ isu ya ní lɛ su u; boŋu i, lifu liku mlo. 21Lɛ xe Aya ódi Yudanɛ ma asigaga a, gi balɛ ko ŋwisi eseya la ɔtutɔ ɔ; kigyo mlegyo le edi si aadi mlɔ kɔ asigaga na a?
22Ní ya kwiamɔ kiliɛ gi Aya izeedi asigaga ni kiliɛ gi yɛ eboe la alɛ gagla a. Ódi banama gi bɛbitɛ eboe zimizi na asigaga a, pɔ̀ apɛ lipo me aki mlɔ ɔ, xegi mlɛɛtrɛ lɛ aʋa ní yɛ asigagadidi la mɛ ɛ. Pɔ̀ xe mlegbe e, biayasi mlɔ fɛ zanɔ ní ose lo su. 23Lɛ xegi Yudanɛ ma bɛyurɔ ba kumɔziŋa ɛ, biadzini ba kutsa ní ose lo su; lɛ ese linu si Aya aatani lɛ kubitɛ ɛ. 24Mlɔ banama gi mlénu Yudanɛ ɛ, mlalɛ ko ŋwisi liya ní liŋwafu nɛ mɛ ose lo su, gi bɛyasi i, xe bedzini tsa ní ose kpɛkpɛ lɔ su u; gi nya ní eboe la onu i, litráze nite xe e. Yudanɛ ma balɛ ŋwisi ose kpɛkpɛɔ lɔ aya kinɛ ɛ, lɛ lilɛ plɔplɔ kí Aya si odzini ayaa la gi eboli i, kutsala ni ose lo dzɛ.
Aya aadi ɔnɔ kakaa asigaga
25Mɛ benemi ba, anukwarɛ kpokpo ɔtɔ gi béte tsa ɛ, ɔlɛ gi mapɛ si mlete e, lɛ ese linu si aaki si mlatrámɔ isu ya si mlete liboe. Lɛ linu si Israel bebi ba kutumonu yo kutráze etsinɔ ɔ, pɔ̀ kwitraze kɔzɛna ni lipoe lɛ klɔ gi banama gi bénu Yudanɛ ɛ, ba kiklaklaɛ mɛ kiana, xe biaba Aya klɔ ɔ. 26Lɛ kude uliɔ ya aʋa Israel petee aamɔ kubúbú. Ŋwisi kiliɛ gi bɛŋwlimi kpɛ Aya yɛ liboe le keplekpaa mɛ si i,
“Ɔnɔbu ye aadɔ ní Zion
lɛ aabu litukpomegagla lɛ ní Yakob besoebi ba mɛ ɛ.
27Maabitɛ kunyanya liɔ ya ni ba xe mebu ba eboe zimizi na azanɔ ɛ.”
28Agi bazɛ Liboe Gbã nɛ ɛ, lɛ Yudanɛ ma bedzi Aya yɛ ahwafianɛ ma ɛ, kɔkpɛ mlɔ banama gi mlénu Yudanɛ ma loso o. Pɔ̀ kɔkpɛ gi Aya akya ba loso e, bedzi yɛ baʋia kɔkpɛ ba baka ba loso. 29Lɛ Aya ɔʋítsrɛ yɛ begyodi ʋa ní ɔniliɛ klɔ gi aakya a, xe akrira su u. 30Mlɔ banama gi mlénu Yudanɛ kɔ ɛ, mlénu kutu aki Aya ba zanɔ ɔ; pɔ̀ abla ɛ, mlɛɛzi Aya yɛ asigagadidi la, lɛ ese linu si Yudanɛ ma ɛ, bénu kutu u. 31Niteme ke, kɔkpɛ asigaga ala gi mlɛzɛ abla ɛ, Yudanɛ ma bénu kutu aki Aya abla a, atɔ bafɛ ɛ, biaazɛ Aya yɛ asigagadidi la. 32Lɛ ese linu si Aya abitɛ banima petee ligbã bezeze ki kutumonumonu, tɔ aadi ba petee asigaga.
Mla ki tɔ kukpɔ̀ Aya
33Aya yɛ exo la ekeme lo! Aya yɛ kuboeteo ni yɛ kuboesenu yo kwidzu! Nyaŋwɛ aatani wɔ batrɔtrɔ ba ese kubu u? Lɛ nyaŋwɛ aatani wɔ bede ʋa ese kunu u? 34Kiliɛ gi bɛŋwlimi kpɛ ní Aya yɛ liboe le keplekpaa mɛ si,
“Nyaŋwɛ ete Ɔkaɛ yɛ begyodi ʋa a?
Nyaŋwɛ aatani kiɖaŋu kukpɛ ɔki yɛ ɛ?”
35“Nyaŋwɛ aki Aya kiditɔ edi i,
gi kizia si odzini kɛ kutsa ɔki yɛ ɛ?”
36Lɛ yɛ ebu kidɔ kakaa a, lɛ kidɔ kakaa kilɛ gani yɛ aʋa a, lɛ binu yɛ binɛ ɛ, Mlaki tɔ kukpɔ̀ Aya kɔtsinɔ kanɔmɛ anɔmɛ! Atɔ liba lɛ mɛ.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc