Filipi 4

Paulo aki ba Kugbagba gɔgɔɔ

1Lɛ loso e, mɛ benemi ba gi malɔ ɔ, xe mizeegyo mlo edi i, mlɔ mlenu mɛ isami nɛ, gi mizeefeke isu ɔkpɛ mlɔ loso o, nite lilɛ si mlalɛɛ gagla ní Ɔkaɛ mɛ, mɛ benemi balɔlɔ nɛ ba!

2Mɛɛgba Ewodia ni Sintixe, tɔ benu ba ahanuglɔ ba ese ní Ɔkaɛ mɛ. 3Lɛ maki wɔ litukpo, mɛ ɔxwɛwa hanuglɔ vevee si, tɔ pɔni badzɛa ya ba, lɛ ese linu si bɛwa axwɛ gagla ni mɛ gi kwipani Liboe Gbã nɛ ɛ. Ba ni Klemens ani mɛ baxwɛwa hanuglɔ gɔgɔ ba, banama enyi na gi bɛŋwlimi kpɛ ní Aya yɛ ligbã́ nɛ keplekpaa mɛ ɛ.

4Isami iku mlo ní Ɔkaɛ mɛ lipoe kakaa; meedzini pani si: Isami iku mlo! 5Mlaki tɔ banima pɔ́ bete mlɔ ɔnayɔyɔ lɔ! Ɔkaɛ yɛ kibabaɛ kina pɔ́. 6Mlakíkɔ lɛ mɛ akí kididɔ ɔ, pɔ̀ ní kidɔ kakaa mɛ ɛ, gani Aya kuxwaxwa ni bidɔ kuʋiʋi me e, mlakɔ mlɔ baziazia ʋa aki yɛ, lɛ xegi mleeʋi ye e, tɔ mlazeedo ye ɖase ni ɔna ní bɛ litukpo. 7Atɔ Aya yɛ kusuyɔɔ gi kwimu isani ɔnɔ kesenunu kakaa ɛ, kwiapé mlɔ ina nɛ ni mlɔ begyodi ʋa su, ni Kristo Yesu me e.

8Mɛ benemi ba ní lɛ ɔgù kɔ ɛ, kidiliɛ gi ki nu anukwarɛ ɛ, kidiliɛ su gi kuzɛɛkpɛ kubùbù u, kidiliɛ gi kigyɔ ɔ, kidiliɛ su gi kidra ɛ, kidiliɛ gi kizɛkpɛ isami i, kidiliɛ su gi bizɛɛpani eboe gbã a, xe kiditɔ kigyeno o, lɛ xe kukpɔ̀kpɔ̀ kutɔ kulɛ ɛ, mlegyo la ya elue edi i! 9Kidiliɛ gi mlɛkpasi i, loo kidiliɛ gi mlɛzɛ ɛ, loo mlenu idɔni mɔ klɔ, loo mlɛmɔ ní mɛ mɛ̀ ɛ, mlakɔ bɛ akpɛ axwɛwawa mɛ. Atɔ Aya gi izɛɛki kusuyɔ ɔ, aaze nì mlo.

Paulo edo Filipianɛ ma ɖase

10Pɔ̀ mamɔ isami glegle ní Ɔkaɛ mɛ abla si mlɛkɔ ní lɛ mɛ ɛki mɛ dzɛ ɛ, lilɛ lɛ mɛ si mlekeni idi, pɔ̀ kudeonu kúze ɛki kidiliɛ ɛ, gi mlegyo edi si mlɛbitɛ ɛ. 11Maʋípani te kɔkpɛ mɛ baziazia ʋa loso o; lɛ ese linu si mɛkɔ ɛ, makpasi lɛ si, kizeze kakaa mɛ gi malɛ ɛ, lilɛ si kiku mɛ aŋu. 12Mete kidiliɛ gi linu si tɔ ɔnutɔ oze ɔzianete e, lɛ mete kidiliɛ gi linu si tɔ ɔnutɔ oze oxonete e. Makpasi liboe kpòkpò lɛ ya si kizeze kakaa mɛ gi malɛ ɛ, lilɛ si kikè me, xe kuʋɛ kwiku me o, kike meke o, bidɔ bisrɛ ní mɛ awla o, kididɔ kíma ní mɛ awla o. 13Mizɛɛtani kidɔ kakaa kubitɛ gani Kristo, ɔniliɛ klɔ gi izɛɛkpɛ mɛ kigaglaɛ mɛ ɛ.

14Pɔ̀ mlɛbitɛ lɛ mumɔ si, mlɛzɛɛki mɛ kupɔnɔ ní mɛ baxixa ʋa mɛ ɛ. 15Lɛ mlɔ Filipianɛ ma mlete si, lipoe lɛ gi mazɛɛpani Liboe Gbã nɛ aki mlɔ ɔ, gi masɛ ní Makedonia ɛ, mlɔ ko mleze baʋaziŋa ba ɔha lɔ gi ɛpɔni mɛ ni bidɔkɔkɔ ɔ. 16Lɛ gi meze ní Tesalonika kyɛ ɛ, mlɛtsisi mɛ bidɔziazia ʋɛ sani tule gi kuziazia kwiba ɛ. 17Aní si mɛɛpɛ kididɔ ɔ, pɔ̀ mapɛ si mlabitɛ eboe gbã sanɔ tɔ biakɔ ʋɛ pɔni mlɔ eboe Gbã na ní lifunu ne. 18Lɛ loso mazi kidɔ kakaa gi mlɛtsisi mɛ ɛ, lɛ bisani kiliɛ gi mazia kyɛ ɛ, gi Epafrodito amani mɛ kudɔkpaa liɔ ɔ, gi mlɛtsisi mɛ ɛ, kidɔ kakaaɛ iliɛ gi kizia mɛ ɛ, kilɛ ní mɛ awla. Mlɛki Aya bisumudɔ gi bilɛ flafla ɛ, gi Aya azɛ ɛ, lɛ biku Yɛ aŋu u. 19Lɛ mɛ Aya aaki mlɔ mlɔ bidɔziazia ʋɛ petee dɔni yɛ exo glegle la mɛ kɔkpɛ Yesu Kristo loso.

20Mlaki tɔ kukpɔ̀ blɔ Ɔka Aya dɔni abla kɔtsini kanɔmɛ anɔmɛ! Tɔ liba lɛ mɛ.

Paulo yɛ kunɔpanɔ gɔgɔɔ

21Mlapani Aya yɛ banima petee aki mɛ ní Kristo Yesu me! Benemi ba gi balɛ ní mɛ su kyɛ ɛ, bɛpani mlɔ. 22Aya yɛ banima petee bɛtsisi mlɔ ba kunɔpaniɔ, liveve le kí banama gi benu baxwɛwa ni Kaisaro kepea mɛ ɛ ní Filipi.

23Blɔ Ɔkaɛ Yesu Kristo yɛ lipomepɛpɛ nɛ lize ni mlɔ ifuɛfuɛ nɛ! Tɔ liba lɛ mɛ.

Currently Selected:

Filipi 4: avn

Highlight

Compare

Copy