Filipi 3

Mlakítrɔ mlɔ aŋu na ní kisugyaɛ aʋa

1Tɔ migù mɛ liboe le e, mɛ benemi ba, mlamɔ isami ní Ɔkaɛ mɛ! Mɛ kɔ ɛ, lími mɛ aʋa si, midzini eboa la ya kee kuŋwlimi ki mlɔ ɔ; lɛ linu kupɔnɔ ɛki mlɔ.

2Mledi mumɔ ní banama gi bizɛbitɛ eboe zimizi na a, gi balɛ ŋwisi kuŋwafudroʋi yo o, banama gi bizeedi lɛ aʋa si bɛkpɛ kisugyaɛ ebì la su u, 3Lɛ ese linu si blɔ banama gi kuzeesumu Aya ní yɛ Ɔfuɛfuɛ nɔ mɛ ɛ, blɔ kwimɔ ɔyaʋi tsatsa gbã nɔ, lɛ kuzɛɛmɔ kudradra ní Kristo Yesu me e, lɛ kuʋítrɔ blɔ aŋu ní kisugyaɛ aʋa a.

4Nya maaplɛ aŋu ní kisugyaɛ aʋa xe e, lɛ xe ɔnutɔ aabu si yɛ atani aŋu kuplɛ ní kisugyaɛ aʋa ɛ, mɛ kɔ masani yɛ. 5Bɛtsa ɔyaʋi ki mɛ ní liwe ɔgɔtɔʋa yɛ aʋa, menu Israel ɔnɛ dɔni Benyamin likpɔ lɛ mɛ, mɛ bakatsi ba benu Hebrianɛ nɛ, lɛ ní Mose ɔsã nɔ mɛ ɛ, menu Farisi ɔnɛ; 6kɔkpɛ kifu iliɛ gi kize ní mɛ mɛ̀ onu i, mayɔ kedu ní baʋaziŋa ba su. Lɛ xe ɔnɔ gbagbe liboe liagyɔ ní ɔsã nɔ axwɛwawa la onu i, meze ɔnɔ gi lipɔŋaŋa ɛtɔtɔ líze ní mɛ su u. 7Pɔ̀ kudɔkpaa liɔ klɔ ɔ, gi kɔ nya kwiabu libi ki mɛ ɛ, mebù kɔ abla si kúbu libiitɔtɔ ɛki mɛ kɔkpɛ Kristo loso o. 8Lilɛ gi lisanɔ ɛ, makɔ kidɔ kakaa si kilila kɔkpɛ kidiliɛ gi kimu isanɔ loso o, Kristo Yesu gi onu mɛ Ɔkaɛ yɛ kutèteo o, lɛ kɔkpɛ yɛ loso e, mayurɔ awla ni kidɔ kakaa su, lɛ makɔ bɛ si binu sivu atɔ mamɔ kudeonu tɔ maaze Kristo yɛ ɔŋanɛ ɛ, 9tɔ mize likpɔ ni yɛ, lɛ loso aní ɔsã nɔ ɛki si mɛ linɛ ligyɔ ɔ, boŋu i, mɛ linɛ ligyɔ gani mɛ kuziŋaa ní Kristo me aʋa; ɔnɔ yɛ kude gyɔgyɔ kwidɔ ní Aya kɔ, ni kuziŋa mɛ. 10Kidiliɛ gi mapɛ ɛ, kɛ kinu si mite Kristo ani tɔ mite yɛ kuyɔyɔɔ kigaglaɛ, ni tɔ mikpɛ ɔha ni yɛ ní yɛ ɔzia mɔmɔ nɔ mɛ ɛ, atɔ midzi ŋwisi yɛ kiniɛ ní yɛ kutseo me, 11ni kugyodi si biayɔni mɛ kyɛ dɔni bekpo ʋa mɛ mani ligbã́ nɛ mɛ.

Mlekeni edi tɔ mlaazɛ kaʋaŋaa liʋɛ nɛ

12Maʋípani si maŋa aʋa kooko loo si mana kooko, pɔ̀ meekeni edi si mizɛ liʋɛɛ nɛ gi lɛ loso Kristo ehe me apɔni yɛ isu ya ɛ. 13Mɛ benemi ba, mɛ ɔtutɔ mákɔ lɛ si, mɛ ɔwla lɔ ɛna kidiliɛ gi kɛ mɛɛpɛ ɛ. Pɔ̀ kidɔ tile ko o, gi mizɛɛbitɛ kɛ kinu si i; kidiliɛ gi mabitɛ azanɔ ɛ, medze ke; lɛ bidɔ bɛklɔ gi bilɛ ní mɛ ɔtɔ nɔ ɛ, bɛ mizɛɛkpɛ ikù nɛ si mizɛ ɛ. 14Lɛ loso meese si mina ɔnakɔ lɔ klɔ gi maatsa ogbe no o, xe maazɛ liʋɛ nɛ ɛ. Liʋɛ nɛ linu Aya yɛ kuxwaxwa liɔ gi axwa mɛ ɛ, gani Yesu Kristo aʋa, gi linu ligbã́ nɛ ní lifunu ne e, kɔkpɛ kidiliɛ gi Kristo abitɛ aki mɛ ɛ.

15Lɛ loso e, blɔ banama petee gi kwitsi ni Ɔfuɛfuɛ nɔ mɛ ɛ, lilɛ si kugyodi tule uliɔ ya kuze ní blɔ awla. Pɔ̀ xe kugyodi dzedze utɔ kulɛ ni mlɔ mɛ ɔtɔ awla ɛ, Aya aabu lɛ mɛ ɔki mlɔ. 16Pɔ̀ kitɛkitɛ lilɛ kyɛ ɛ, mlaki tɔ kutrɛ lɛ aʋa tɔ kuga ní isãɛ nɛ aʋa gi kwiga koko e.

17Benemi ba, mlakpasi mɛ kibitɛɛ, Mlevu aŋu ní banama gi balɛ ni bede gbã ma a, gi kwibasɛ mlɔ ɛ su. 18Masi mlɔ liboe lɛ ya lipoe glegle, lɛ meedzini lɛ ɛpani ni kube dzɛ si, banɔ glegle balɛ ní mlɔ kusi, gi ba ligbã́zeze ne e, liki si bɛyɔ kedu ní kidiliɛ gi kɛ loso Kristo etse ní osetsase lo su i su. 19Banɔaklɔ ba oblo kɔ onu kifu moni ye me, banɔaklɔ ba epò la alɛ ŋwisi babu gi beesumu kinɛ ɛ, lɛ ba kukpɔ̀kpɔ̀ɔ kunu eyeyeboe e, banɔaklɔ ba ɛ, kesea aʋa bidɔ mɛ su ko ba begyodi ʋa balɛ. 20Blɔ pɔ̀ blɔ kepea kenu lifunu ne, lɛ blɔ kimbi kizã a, gi kwipe blɔ obúbú ye e, gi onu blɔ Ɔkaɛ Yesu Kristo e, 21Kigagla kilɛ ní yɛ awla gi kɛ akɔ akpɛ kidɔ kakaa ní yɛ isu ya ese e, lɛ ni kigaglaɛ liɛ klɔ aʋa ɛ, Yɛ atsrɛ blɔ kesea aʋa kizeze me e, atɔ kiadzi ŋwisi yɛ kizeze dradraɛ mɛ ɛ.

Currently Selected:

Filipi 3: avn

Highlight

Compare

Copy