Filipi 2

Mlakpasi Kristo yɛ kusububɔɔ

1Xe mlɔ ligbã́ nɛ ní Kristo me e, lizɛki mlɔ kigagla a, xe yɛ kulɔlɔɔ kuzɛɛyɔ mlɔ ina nɛ ɛ. Xe mlalɛ likpɔkpɛkpɛ mɛ ni Aya yɛ Ɔfuɛfuɛ nɔ ɔ, lɛ xe mlezedi mlɔ ahanuglɔ ba asigaga a, loo mlɛzɛplɛ litɔ kese ɛki ba, xe mlezenu kuyeʋiyeʋi ki ba ɛ, 2kɔlɔ mlaki tɔ mɛ isami nɛ ina gani mlɔ kuzeze ŋwisi ɔnɔ tole gi yɛ begyodi ʋa benu tule e, xe yɛ kulɔlɔɔ kunu tule e, xe yɛ esobo la ni yɛ batrɔtrɔ ʋa kyɛ binu tule e. 3Mlakíbitɛ kididɔ ŋwisi mlɔ ko mlɛsate loo ní kusufeke mɛ boŋu i, mlepleni isu aki mlɔ ahanuglɔ ba, lɛ mlakɔ lɛ lipoe kakaa si banɔ dzedze ba bɛpɛ ɛ sani mlɔ ɔ. 4Mleze ni aŋu ní mlɔ ahanuglɔ ba bapɛ́pɛ ʋa su, aní mlɔ banɛ ma tete e.

5Lilɛ si mlɔ kiboebitɛɛ kize ŋwisi Kristo Yesu kiniɛ.

6Aya kilɛlɛɛ mɛ kize yɛ awla lipoe kakaa

pɔ̀ ɔ́kɔ lɛ si lilɛ si yɛ ni Aya basɔ̀ ɔ,

7Boŋu ní yɛ ɔtutɔ yɛ kupɛpɛ onu i, epleni isu ya

gi akɔ ɔnɔsumu kilɛlɛɛ mɛ ɛ, gi bɛpɔ yɛ ɛ,

xe bɛmɔ ɔnɔgbagbe kizeze me ní yɛ su i.

8Epleni isu ya,

lɛ enu kutu kɔtsini kutseo me,

kɔzɛna ni osetsase lo su kutseo me ke.

9Lɛ loso Aya emuni ye atsini ɔgyɔgyɔ klɔ ke,

lɛ akɔ linyii nɛ gi likeme sani linyi kakaa ɛ, aki yɛ,

10atɔ xe bɛxwa yɛ linyi ne e, banima biadu aklamasi kese aki yɛ.

banama gi bali ní lifunu ne ni banama gi bali ní kesea aʋa a, ani banama gi bákpasi ní kesea ese e,

11atɔ ɔnɔ kakaa aadra lɛ mɛ si, Yesu Kristo yɛ onu Ɔkaɛ,

ki Ɔka Aya yɛ kusudraa.

Mlekle ŋwisi badzidziebi ní kelea mɛ

12Lɛ loso mɛ baʋia dimɛnɔ ba, kiliɛ gi mlezenu kutu lipoe kakaa a, aní lipoe lɛ gi meze ní mlɔ su tètè e, pɔ̀ abla gi máma ni mlɔ su kyɛ ɛ, liziã si mlatrɛ ní lɛ aʋa ki mlɔ kubúbú yo ni lifu ni kusugu. 13Lɛ ese linu si Aya yɛ onu ɔniliɛ gi yɛ ɛɛwa axwɛ na ní mlɔ mɛ ɛ, si tɔ mlapɛ̀ ani tɔ mlabitɛ kidiliɛ gi apɛ si mlabitɛ ɛ.

14Mlabitɛ kidɔ kakaa tɔ kutɛ̀tɛ̀ ni eboe hehe akíze ní lɛ mɛ ɛ. 15Atɔ mlaadzi bebi dradra gi kutɛnɔ kútraze ní ba su u, Aya yɛ bebi ba, gi kesetata káma ní ba su u, gi balɛ ní kele nyani nyani ni banɔ zimizi kusi i, atɔ mlaaze banama gi bizeekle ŋwisi badzidziebi ní lifunu ne me kinɛ ɛ. 16Atɔ mlaki ba ligbã́ nɛ liboe le e, xegi mlɛtani la ya kubitɛ ɛ, maadɔ isu ya ní liwe lɛ gi Kristo aaba aʋa a, lɛ ese linu si liabasɛ si mése pluplu loo wa lixwɛ fiteete. 17Kɔ xe bɛbali mɛ ika lɛ ɛ, ŋwisi kuda gi bɛkɔ edo igbè, ni kidiliɛ gi mlɛɛki Aya a, kɔkpɛ gi mlɛzi yɛ aʋa ɛɛŋa loso e, isami iaku me lɛ mɛ ni mlɔ pɔ́ kwiamɔ isami i. 18Niteme ké lilɛ si isami iku mlo, lɛ mlaamɔ isami ni mɛ ɛ!

Timoteo ni Epafrodito

19Lɛ meedi kudeonu si i, xegi Ɔkaɛ Yesu apɛ́ ɛ, maakpɛ Timoteo tsisi mlɔ kpekpemii, tɔ mɛfɛ isami iaku me, xegi menu mlɔ onu i. 20Lɛ ese linu si ɔnɔnɔ ɔ́ma ní mɛ awla ŋwisi yɛ gi akɔ litɔ lɛ mɛ aki mlɔ kupɛpɛ ɛ; 21lɛ ese linu si banɔ dzedze ba petee, ba isu linɛ ko beebemi, lɛ ɔ́tɔtɔ ɔ́kɔ lɛ mɛ ɔki Yesu Kristo yɛ liboe le e. 22Lɛ mlɔ tutɔ mlete kiliɛ gi abasi isu ya ɛ, kiliɛ gi ŋwisi obi ni yɛka kinɛ ɛ, awa axwɛ na nì mɛ ɛki liboe gbã nɛ ɛ. 23Lɛ loso meedi kudeonu si maatsisi yɛ kyɔŋ xegi lɛ mɛ lidra ɛki mɛ ɛ, kiliɛ gi eboe la aaze ki mɛ ɛ. 24Mazi lɛ aʋa aŋa si mɛ ɔtutɔ maaba mlɔ klɔ kpekpe e.

25Lɛ megyo le edi si liziã si midzini Epafrodito tsisi mlɔ, onu mɛ onemi, ɔhanɛ ɔxwɛwa, ni ɔʋatrɔ ɔguta, ani mlɔ ɔnɔ kpɛkpɛ gi mlɛtsisi si ɔzeedi mɛ baziazia ʋa aʋa ɛ. 26Lɛ ese linu si linu yɛ kupɛ́pɛ si yimɔ mlɔ petee, lɛ liwa axwɛ ní yɛ aʋa si, mlenu si yɛ adɔ kunya a. 27Lɛ anya adɔ kunya a, gi etse kloe e; pɔ̀ Aya edi yɛ asigaga a, lɛ aní yɛ tete e, pɔ̀ edi mɛ fɛ asigaga a, tɔ mikínu kuyeʋiyeʋi i trɔ kuyeʋiyeʋi aʋa a. 28Lɛ loso matrɔ lɛ, si maatsisi yɛ kyɔŋ, tɔ xe mlɛmɔ yɛ ɛ, mlaamɔ isami dzɛ, atɔ mɛ fɛ mɛ kàŋuganɔa kiati ka aʋa a. 29Lɛ loso e, mlazi yɛ ní Ɔkaɛ linyi ne me ni isami, tɔ mlakpɛ kubùbù ní banɔ ba ya elu su. 30Lɛ ese linu si etse kloe, gi akɔ yɛ ligba nɛ aki Kristo yɛ axwɛwawa la a, gi azɛɛki mɛ kupɔnɔ uliɔ ɔ, gi mlɔ ɔtutɔ mlátani mɛ kukɔ ɛ.

Currently Selected:

Filipi 2: avn

Highlight

Compare

Copy