File 1

1Keplekpaa lia kɛdɔ ní mɛ Paulo gi makpasi ligba a, kɔkpɛ lixwɛ nɛ gi mɛɛwa ɛki Kristo Yesu loso o, ni blɔ onemi Timoteo klɔ, ki blɔ ɔʋia veve ni blɔ ɔhanuglɔ ɔxwɛwa yɛ Filimon. 2Ani kí baʋaziŋa ba gi bizɛɛtsa ní wɔ kepea mɛ ɛ, ni blɔ onemidzɛ Appia kɔpɔni Arkipus gi izɛɛlɛɛ gagla ní Ɔkaɛ axwɛ na mɛ ŋwisi ɔguta kinɛ ɛ.

3Meʋi si Aya blɔ Ɔka ani Ɔkaɛ Yesu Kristo bapɛ lipo me aki mlɔ tɔ baki mlɔ kusuyɔ.

Paulo axwa Aya lɛ edo yɛ ɖase ní Filemon yɛ kunɔlɔɔ ni yɛ kuziŋaa litukpo

4Onemi Filemon, lipoe kakaa xe mɛɛxwa Aya ɛ, mizɛɛplɛ aŋu ní wɔ aʋa lɛ mizeedo Aya ɖase e. 5Lɛ ese linu si mizeenu wɔ kunɔlɔɔ ki Aya yɛ banima petee ni wɔ kuziŋaa ní Ɔkaɛ Yesu me onu. 6Mɛ kupɛ́pɛɔ kunu si blɔ likpɔkpɛkpɛ lɛ ni mlɔ ŋwisi baʋaziŋa kinɛ ɛ, kwiamani eboe ese kununu dzudzu ni kukrira kakaa gi kuli blɔ awla a ní ligbã nɛ mɛ gani likpɔkpɛkpɛ mɛ ní Kristo me. 7Wɔ kunɔlɔɔ kwiku mɛ isami glegle lɛ kwikpɛ mɛ kigagla a! Wɔkpɛ Aya yɛ banima petee ba ina nɛ isami.

Paulo eʋi kukɔkyɛ akí Onesimo

8Kɔkpɛ lɛ ya loso e, nya maatani aŋu mɛ gagla kukɔ ŋwisi wonemi ní Kristo me kinɛ ɛ, gi maakpɛ ɔsã aki wɔ ní kidiliɛ gi lilɛ si wɔabitɛ su u. 9Pɔ̀ kɔkpɛ mɛ kulɔlɔ kí wɔ onu i, meeʋi ɛdɔni wɔ iwla mɛ boŋu. Mabitɛ lɛ nite gi menu Paulo ɔnɔ tsitsi i ni Kristo Yesu yɛ ɔxwɛdzɛ, xe malɛ ligba abla kɔkpɛ yɛ loso kyɛ ɛ. 10Lɛ loso mɛɛki wɔ litukpo kɔkpɛ Onesimo, gi edzì mɛ ɔtutɔ mobi ní Kristo me e; gi malɛ ní ligba kyɛ ɛ, medzi yɛka ní Ɔfuɛfuɛ nɔ mɛ. 11Kɔkí lipoetɔ ɛ, óze ɔnɔ gi ebu libiitɔtɔ aki wɔ ɔ, pɔ̀ abla ɛ, edzì ɔnɔ gi eebu libi iki wɔ ni mɛ ɛ.

12Meedzini Onesimo gi malɔ ɔ ni mɛ ɔna petee tsisi wɔ abla a. 13Nya mapɛ si oze ní mɛ su ní ya, gi malɛ ligba lɛ kɔkpɛ liboe gbã nɛ loso e, tɔ aazɔki mɛ kupɔnɔ ní wɔ onu. 14Pɔ̀, mátrapɛ si mími wɔ aʋa si pɔni mɛ ɛ; Boŋu i, mapɛ si bitɛ lɛ ní wɔtutɔ wɔ kupɛ́pɛ onu. Lɛ loso mátrabitɛ kididɔ ɔ, xe wɔ́dimɛ ní kɛ aʋa a.

15Liaze si kidiliɛ loso gi Onesimo asɛ ní wɔ su lipoe kpekpemi itɔ ko linu si tɔ wɔadzini ye kuzɛ lipoe kakaa. 16Lɛ abla ɛ, ónu ɔnɔdzidzi tɔ ɔ, pɔ̀ asani ɔnɔdzidzi; onu onemi gi azɛ kedzi ní Kristo me e. Onu ɔnɔ gi azɛ kedzi aki mɛ! Lɛ aaze ɔnɔ gi azɛ kedzi aki wɔ ŋwisi ɔnɔdzidzi ani onemi ní Ɔkaɛ mɛ ɛ!

17Lɛ loso, xe wɔkɔ mɛ ŋwisi wɔ ɔha nɛ ɔxwɛwa kinɛ ɛ, kɔlɔ dzini ye zɛ kiliɛ gi wɔazɛ mɛ ɛ. 18Xegi ata wɔ ese loo adɔ liʋɛɛtɔ ní wɔ su i, bú le mɛ ní liʋɛ nɛ mɛ. 19Ni ya ɛ, mɛɛŋwlimi liboe lɛ ya nì mɛ ɔtutɔ mɛ awla la si: mɛ Paulo maatsa liʋɛɛ nɛ klɔ ki wɔ. Líziã si miplɛ aŋu kí wɔ xe e, plɛ aŋu si wɔ kyɛ wɔdɔ liʋɛ ni mɛ su kí wɔ ligbã́ nɛ ŋwisi ɔʋaziŋa kinɛ ɛ. 20Lɛ loso mɛ onemi ye, maki wɔ litukpo tɔ mikpɛ wɔ kunugu taʋɛ kɔkpɛ Ɔkaɛ loso; ŋwisi onemi ní Kristo me kinɛ ɛ, ki tɔ mimɔ isami!

21Maka lɛ aʋa si, gi mɛɛŋwlimi lɛ ya ɛ, wɔabitɛ kidiliɛ gi meʋi i, lɛ mete si wɔabitɛ sanɔ kiliɛ gi meʋi i. 22Kɔpɔnɔ ɛ, lulɔ kugbake kutɔ gi maaze plɛ ki mɛ ɛ, lɛ ese linu si meedi kudeonu si Aya aadra kudeonu kí yɛ kuxwaxwa gi mlɔ petee mlɛxwa ɛ, tɔ aki tɔ maadzi ba mlɔ klɔ.

Baʋaziŋa dzedze ba kunɔpanɔɔ

23Epafra, gi ɔlɛ ligba nì mɛ kɔkpɛ Kristo Yesu i, atsisi wɔ yɛ kunɔpanɔɔ, 24nite ke mɛ ahanuglɔ baxwɛwa ba, Marko, Aristarxo, Demas ani Luka kyɛ bɛpani wɔ.

25Tɔ lipomepɛpɛ nɛ gi lidɔ blɔ Ɔkaɛ Yesu Kristo klɔ ɛ, lize ni mlɔ petee.

Currently Selected:

File 1: avn

Highlight

Compare

Copy