Tito 3
3
Ɔsɔlisɔli yɛ yɛ ligbã́zeze ne
1Plɛ aŋu ki wɔ benete ba tɔ bepleni isu aki baʋaŋa ba ni banama awla gi izèkɔ ilɛ ɛ, tɔ benu ba igbè, atɔ babla aplɛ aki axwɛ gbã kuwawa ní kude kakaa onu. 2Si ba tɔ bakípani eboe nyani nyani ní ɔnɔnɔ su u, pɔ̀ tɔ bezè ní kusuyɔ ni sinemi me lipoe kakaa, tɔ bakɔ abasɛ kusububɔ kizeze me tsini ɔnɔ kakaa su.
3Lɛ ese linu si lipoetɔ lɛ ɛ, blɔ fɛ kwidɔ kuga, kúbu banɔ ɔ, lɛ bemeni blo edi i. Kwize banɔdzidzi ki kusuŋwasi ni ligbã́ŋaŋa kakaa elu. Kwizizi blɔ ligbã́ nɛ ni eboe zimizi kubitɛ, ni kaŋuza, gi banɔatɔ bɛtrɔ blɔ ahwafi i, lɛ blɔ fɛ kwitrɔ ba ahwafi i. 4Pɔ̀ gi Aya blɔ Obúbú ye ebú yɛ kunɔlɔɔ, ni yɛ kunɔdimɛnɔɔ abasɛ ɛ, 5ebú blo, aní kɔgani blɔ tutɔ eboe gyɔgyɔ ɔ, gi kwibitɛ mɛ ɛ, pɔ̀ gani yɛ ɔtutɔ yɛ asigagadidi me ebu blo, gani Ɔfuɛfuɛ Dradra lɔ mɛ, gi edzini blo apɔ ɔ, xe eewlo ni blo ni ligbã vuvu u. 6Aya aki blɔ yɛ Ɔfuɛfuɛ Dradra lɔ faã gani Yesu Kristo blɔ Obúbú ye me e. 7Lɛ gani yɛ lipomepɛpɛ nɛ mɛ ɛ, bialulɔ blɔ ɔki Aya tɔ kwiamɔ ɔŋakɔ ní ligbã́ moblo le gi lɛ kwidi kudeonu ikɔ ɛ mɛ. 8Lɛ ya linu anukwarɛ gi bizɛpani i.
Mapɛ si mlakpɛ eboa la ya lixaŋu, tɔ banama gi bɛzi Aya aʋa ɛɛŋa ɛ, biakɔ lɛ trɔ isu aʋa tɔ biabitɛ eboe gbã gi ɛpɛ ɛ, eboe ala la ya ɛpɛ lɛ aabu libi ki ɔnɔ kakaa a.
9Pɔ̀ mlayurɔ eboe fiteete kuŋwlɛŋwlɛ, siŋanɛ kusrɔsrɔ, eboe hehe ani akpafu kutata ní Mose ɔsã nɔ su u. Lɛ ese linu si libiitɔtɔ líma ní la mɛ ɛ, lɛ ápɛ aki kididɔ ɔ. 10Mlagba banama gi bizɛɛmani kulɛlɛ tule e, lɛ kede e, mlagba ba kuʋla, lɛ ya kede e, mlayurɔ ba. 11Lilɛ si lize kutète me kí mlɔ si ɔnɔ liɛ ya elu i, onu ɔnɔ gi ekyi kede akpɛ anukwarɛ ni ɔnɔ zimizi i, lɛ yɛ kiboebitɛɛ kibasɛ si ata kese e.
Kunɔpanɔɔ nì batrɔtrɔ gɔgɔ ʋa
12Xegi makpɛ Artema loo Tixiko ní wɔklɔ ɛ, kenidi tɔ ba mɔklɔ ní Nikopoli; lɛ ese linu si matrɔ lɛ si maaze niklɔ ní kublɔ lipoe le me. 13Kenidi tɔ pɔni Zena otsixwa yɛ ni Apolo mɔmɔɔmɔ gi bɛbla ɛki ba kudegaga a, atɔ di le aʋa si kididɔ kikízia ba a. 14Blɔ banima fɛ ɛ, lilɛ si bakpasi si biawa ba lipoe le su axwɛ ki eboe gbã kubitɛ tɔ bamɔ batutɔ ba bidɔziazia ʋɛ aki isu, tɔ bakíze ligbã́ gi lítrabu libi i.
15Banama petee gi balɛ ní mɛ su i, bɛpani mlɔ. Mlapani banama petee gi bɛlɔ blɔ ní kuziŋa mɛ ɛ.
Aya yɛ lipomepɛpɛ nɛ lizè ni mlɔ petee.
Currently Selected:
Tito 3: avn
Highlight
Share
Compare
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
