Hebr 1
1
Aya apani aki blɔ gani Yebi ye aʋa
1Ni kana mɛ ɛ, Aya egu kunugu yo epoe glegle nì gani bede glegle aʋa aki blɔ baka tsitsi ba gani yɛ beboedoplɛ ba aʋa. 2Pɔ̀ ní ewe gɔgɔa la ya mɛ ɛ, egu kunugu aki blɔ gani Yebi ye aʋa a. Yɛ Aya akya si ɔŋa kidɔ kakaa aʋa, lɛ yɛ onu ɔniliɛ gi yɛ aʋa Aya aga a, xe abitɛ kelea a. 3Aya Yebi ye yɛ onu Aya yɛ kusudraa gì kwidɔ ní Aya yɛ kuklekleo me e, lɛ yɛ kee onu Aya yɛ kizezee me tutu gi yɛ aki kelea kalɛ gani yɛ liboe le kigaglaɛ mɛ ɛ. Lɛ gi akɔ isu ya akɔ aki Aya a, ŋwisi bidɔ pɔʋi pɔʋi kinɛ ɛ, xe eplo eboe zimizi na azanɔ pɔ́ ɛ, odi ni Aya yɛ kigaglaɛ petee kɛ kaŋawla mɛ ní lifunu ne.
Aya Yebi ye emu asani Aya yɛ baxwɛdzɛ ba
4Lɛ loso Aya abitɛ yɛ si emu asani Aya yɛ baxwɛdzɛ ba petee ŋwisi kiliɛ gi linyii nɛ ɛ, gi aki yɛ ɛ, liŋa kedzi sani ba enyi na petee. 5Lɛ ese linu si
Aya yɛ baxwɛdzɛ ba mɛ owoli bɛsi edi si,
“Mobi wonu,
omono liwe le medzi wɔ Ɔka a”?
Xe asi yɛ dzɛ si i,
“Mɛ maadzi Ɔka ki yɛ,
lɛ yɛ fɛ ɛ, aadzi mɛ obinyime e”?
6Lɛ xegi Aya edzini yebinyime e gi ɔlɛ ɛ, xe ableke bebu kidɔ kakaa, amani kelea mɛ ɛ, Aya apani si,
“Lilɛ si Aya yɛ baxwɛdzɛ ba petee
bakpɛ litukpo kese aki yɛ.”
7Lɛ Aya apani ní yɛ baxwɛdzɛ ba su si,
“Aya abitɛ yɛ baxwɛdzɛ ba ŋwisi liwɔ lɛ kinɛ ɛ,
lɛ abitɛ yɛ banɔsumu ba ŋwisi kifu binemi kinɛ ɛ,”
8lɛ apani ní Yebi ye su si,
“Aya wɔ kaʋaŋaa kiaze tsinɔ kanɔmɛ anɔmɛ.
wɔaŋa wɔakɔanɛ ma aʋa ní
kude gyɔgyɔ aʋa.
9Wɔdimɛ ni eboa la gi ɛgyɔ; lɛ wɔ́dimɛ ni eboe nyani nyani i.
Lɛ loso Aya wɔ Aya, akya wɔ
xe aki wɔ ozekɔ gi emu isani
izekɔɛ lɛ klɔ gi aki wɔ
ahanuglɔ ba, lɛ wɔmɔ̀ isami gi Aya asra kumu yɔ aki wɔ ɛ.”
10Apani kyɛ si,
“Oo Ɔkaɛ, wɔ wɔbitɛ kesea dɔni okpese klɔ,
lɛ lifunu ne linu wɔ iwla onu axwɛwawa.
11Bidɔ bɛ ya petee bɛ onu biaza, pɔ̀ wɔkɔ ɛ, wɔaze tsinɔ;
lɛ bɛpɔ́ biahá ŋwisi kusa kinɛ ɛ,
12Wɔaklɔʋi bɛ ŋwisi kiliɛ gi bizɛklɔʋi liwu kinɛ ɛ; lɛ wɔatsrɛ ʋɛ ŋwisi kiliɛ gi bizɛɛtsrɛ basa koko kinɛ ɛ.
pɔ̀ wɔkɔ ɛ, nite ko wɔlɛ,
lɛ wɔ agɔ la onu atráza a.”
13Aya yɛ ɔxwɛdzɛ woli Aya asɛ edi si,
“Ze ní mɛ kaŋaa mɛ,
kɔzɛna ni lipoe lɛ gi maakɔ wɔ ahwafianɛ ma kpɛ ní wɔ kuklise o?”
14Lɛ ege Aya yɛ baxwɛdzɛ ba benu u? Ba petee aní ifuɛfuɛ gi izesumu Aya a, xe izɛɛkpɛ lɛ si izɛɛpɔni banama gi biamɔ kubúbú na a?
Currently Selected:
Hebr 1: avn
Highlight
Share
Compare
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
