Hebr 2

Aya yɛ aabitɛ lɛ si banima biamɔ kubúbú

1Lɛ ya loso lilɛ ɛki blɔ si kuvù anukwarɛɛ liɛ gi kwinu ní awla gaglaa sanɔ ɔ, atɔ kukílila ní kudeo aʋa a. 2Lɛ ese linu si, xegi eboa la a, gi Aya yɛ baxwɛdzɛ ba bɛpani i, ki blɔ baka koko ɛnya ɔnɔ kakaa ɛ, xe banama a, gi bábitɛ ní la aʋa loo nu kutu ki la a, bɛɛzi kutuhehe uliɔ gi kwigyeno e, 3kitɛ kwiabitɛ xe kwiase ní lɛ onu u, xe kwiyurɔ kubúbú ʋidi uliɔ ya a? Ɔkaɛ ɔtutɔ lɔ aklá ní kubúbú uliɔ ya su lɛ banama gi benu yɛ liboe le e, bɛtrɔ likla ní lɛ aʋa ɛki blɔ si linu anukwarɛ 4gi liitrɛ lɛ aʋa ɛ, Aya ɔtutɔ fɛ atrɔ ba liboe le aʋa a, gi abitɛ enugutseboe ni eboe mamɔ edi i, gi aki banima Ɔfuɛfuɛ Dradra lɔ mɛ bidɔ glegle ní yɛ ɔtutɔ yɛ kupɛpɛ onu u.

Ɔniliɛ gi aaki blɔ Kubúbú i

5Aya ɔ́kɔ kelea lia gi kɛtraba ɛ ɔ́kɔ ka akpɛ ní yɛ baxwɛdzɛ ba awla si baŋa ka aʋa a, kelea lia gi ka su kwipani i. 6Pɔ̀ ɔnutɔ aŋa katsalia ní ɔkutɔ si i,

“Ege ɔnɔ gbagbe onu xe wuzɛɛplɛ aŋu ní yɛ aʋa a,

kelea lia mɛ obi, xe wɔkɔ litɔ ní lɛ mɛ ɔki yɛ ɛ?

7Wɔki si yɛ ozeklɔ eple taʋɛ sani wɔ baxwɛdzɛ ba ɔni nɔ ɔ,

wɔki yɛ kusudra ni kubùbù lɛ wɔkɔ yɛ odu wɔ ɔwla lɔ onu axwɛwawa la petee onu i,

8wɔki si ɔŋa kidɔ kakaa aʋa a.”

Gi Aya abitɛ yɛ si ɔŋa kidɔ kakaa aʋa ɛ, kididɔ kígɔ gi Aya ɔ́kɔkpɛ ni yɛ ese e. Pɔ̀ kuʋímɔ si yɛ ɛɛŋa kidɔ kakaa aʋa abla a. 9Pɔ̀ kwimɔ Yesu, ɔniliɛ gi yɛ ozekɔ bepleno esani Aya yɛ baxwɛdzɛ ba, atɔ gani Aya yɛ lipomepɛpɛ nɛ mɛ ɛ, otse ní ɔnɔ kakaa litukpo. Abla ɛ, kwimɔ yɛ si bɛki yɛ kusudra ni kubùbù kɔkpɛ yɛ kutseo mɛ gi aga ɛ.

10Lipɛ si Aya gi yɛ abitɛ kidɔ kakaa ɛ, xe yɛ aki si kidɔ kakaa kize kiliɛ ɛ, gi kilɛ ɛ, ɔki tɔ ɔniliɛ gi yɛ onu ba kubúbú yo kɔ ɔxɔ lɔ ɛ, ɔna gani ɔziã mɛ atɔ yɛ ɔgbani bebi glegle manɔ ní yɛ kusudraa mɛ. Lɛ ese linu si Yesu yɛ onu ɔniliɛ gi yɛ aagbani ba tsinɔ ní kubúbú yo me e.

11Lɛ ese linu si ɔniliɛ gi izɛɛdra banima su i, kɔpɔni banama su gi bɛdra ɛ, ba petee bɛdɔ lipo tile me, lɛ loso e, kuye kúʋiku Yesu si ɔxwa ba si yɛ benemi i, 12Apani kyɛ si,

“maadra wɔ linyi ne su ki mɛ benemi ba;

lɛ ní baʋaziŋa ba ɔha lɔ kusi i, maakpɔ wɔ gani idzi zàzà mɛ.”

13Lɛ apani dzɛ si,

“Maaka ní yɛ su aʋa”

Lɛ edzì apani si,

“Imɔ mɛ, ni bebi ba ya gi Aya aki mɛ ɛ.”

14Lɛ gi bebi ba benu kisugya ni ika mɛ banɔ ɛ, Yesu ɔtutɔ kyɛ edzì ŋwisi ba kiniɛ lɛ eze ligbã́ ni kisugyaɛ mɛ ba kiniɛ. Abitɛ lɛ nite tɔ gani yɛ kutseo me e, aazizi ɔniliɛ gi yɛ awla kutseo kigaglaɛ kilɛ ɛ, gi yɛ onu ozimizi ye e. 15Lɛ gani yɛ kutseo me e, aabu banama petee gi ní ba ligbã́ nɛ mɛ ɛ, beze ŋwisi banɔdzidzi ki ozimizi ye ɔkpɛ gi bezeese se kutseo loso o. 16Lɛ mɛ lidra si, aní Aya yɛ baxwɛdzɛ ba apɔnɔ ɔ, pɔ̀ Abraham yɛ besoebi ba apɔnɔ ɔ. 17Ɔkpɛ lɛ ya loso e, lilɛ si Aya ɔbitɛ yɛ ŋwisi yɛ benemi ba ní kude kakaa onu, tɔ aadzi Aya yɛ kusumu yo ɔka ʋidi ye, gi aadi banima asigaga a, anukwarɛ onete ní kiliɛ gi izeesumu Aya mɛ ɛ, gi aakɔ̀ isu ya kukyɛ ní banima litukpo si biakɔ ba eboe zimizi na kɔ kyɛ ba. 18Lɛ abla ɛ, aatani banama gi beekeni idi i, kupɔnɔ lɛ ese linu si yɛ ɔtutɔ lɔ fɛ bekeni ye edi lɛ amɔ ɔziã a.

Currently Selected:

Hebr 2: avn

Highlight

Compare

Copy