Galatia 3

Kristo aʋa Kuziŋa loo Mose Ɔsã nɔ aʋa kubitɛ

1Mlɔ Galatia banɛ kunukpaʋi! Nyaŋwɛ akpɛ mlɔ kudamadamaa liɔ ɔ? Ní mlɔ ɔtutɔ mlɔ aŋu mɛ ɛ, bɛsrɔ mlɔ Yesu Kristo yɛ kutseo ní osetsase lo su! 2Mlasi mɛ liboe tilee lɛ ya; kizi mlɛzi Aya yɛ Ɔfuɛfuɛ nɔ gani Mose Ɔsã nɔ aʋa kubitɛ mɛ loo gani liboe le gi mlenu u, xe mlɛzi lɛ aʋa ɛɛŋa me na a? 3Lɛ kitɛ mlɛdɔ kunukpaa ŋwisi baga ʋa nite e! Agi mlekpese mlɔ ligbã́ nɛ ni Aya yɛ Ɔfuɛfuɛ nɔ ɛ; kipɛ́ mlɛpɛ si mleebloni le ní mlɔ ɔtutɔ mlɔ kigagla mɛ na a? 4Kɔ eboe gleglea la mɛ gi mlɛga ɛ, enu kididɔ kura aki mlɔ na a? 5Kikɔ́ Aya akɔ yɛ Ɔfuɛfuɛ nɔ akí mlɔ ɔ, xe abitɛ enugutseboe ala a, gi abitɛ ɛ ní mlɔ kusi kɔkpɛ gi mlɛbitɛ ní Mose Ɔsã nɔ lɔ kupɛ́pɛɔ aʋa a, loo kɔkpɛ gi mlenu Liboe Gbã nɛ ɛ, xe mlezi lɛ aʋa ɛɛŋa na a?

6Mlegyo eboa la mɛ gi Abraham aga edi i; “Azɛ Aya aʋa aŋa, lɛ kɔkpɛ yɛ kuziŋaa loso e, Aya azɛ yɛ si onu ɔnɔ gi yɛ bede ʋa bɛgyɔ ɔ.” 7Linu si mlete si banama awla gi kuziŋa kulɛ ɛ, bá benu Abraham yɛ bebi ba. 8Aya yɛ Liboe le lipani plɛ si Aya atráki si banama gi bénu Yudanɛ ma ɛ, ba bede ʋa biagyɔ gani kuziŋa mɛ. Lɛ loso, Aya yɛ Liboe le lidra Liboe Gbã nɛ mɛ ɛki Abraham si, “Gani wɔ aʋa ɛ, Aya aakrira kelea amade na petee.” 9Lɛ loso ɔnɔ kakaa gi aziŋa ɛ, Aya aakrira yɛ ni Abraham. Abraham yɛ onu kuziŋaa ɔkaɛ.

10Banama gi bɛkɔ ba begyodi ʋa etrɔ ní Mose Ɔsã nɔ aʋa ɛ, balɛ ní ifixoxo ese. Lɛ Aya yɛ liboe le lipani si, “Ɔniliɛ gi ɔ́zɛ kidɔ kakaa gi bɛŋwlimi kpɛ ní Mose Ɔsã nɔ keplekpaa mɛ ɛ, xe ɔʋíbitɛ ni lɔ aʋa ɛ, ɔkpasi ní Aya yɛ ifixoxo ese!” 11Abla ɛ, lɛmɛ lidra si ɔnɔnɔ linɛ litrágyɔ nì Aya yɛ aŋu mɛ ɛ, gani Ɔsã nɔ aʋa kubitɛ mɛ. Lɛ ese linu si Aya yɛ liboe le lipani si i, “Ɔniliɛ gi yɛ bede ʋa bɛgyɔ gani kuziŋa mɛ ɛ, yɛ ko aaze ligbã.” 12Pɔ̀ Mose Ɔsã nɔ ɛga lidze ní kuziŋaa su u. Boŋu i, kiliɛ gi Aya yɛ liboe le lipani si, “Ɔniliɛ gi aabitɛ ɛ, kidiliɛ gi Ɔsã nɔ eʋi i, aaze ligbã ní lɛ onu u.”

13Pɔ̀ gi Kristo edzì ifixoxo ní blɔ onu i, Kristo ebú blo adɔ ni Ɔsã nɔ lɔ ifixoxo le ese; lɛ Aya yɛ liboe le lipani si i, “Ɔnɔ kakaa gi bɛkú ní ose su i, ɔlɛ ní Aya yɛ ifixoxo ese.” 14Kristo abitɛ lɛ si tɔ kukrira liɔ klɔ gi Aya aka aplɛ akí Abraham si i, biaki banama gi bénu Yudanɛ fɛ gani Kristo Yesu me e, atɔ gani kuziŋa mɛ ɛ, kwiazi Aya yɛ Ɔfuɛfuɛ nɔ gi aka aplɛ ɛ.

Lidzegaga nɛ ní Mose Ɔsã nɔ ni Aya yɛ Kakaplɛa kusi

15Mɛ benemi ba, matraki mlɔ liŋwitsɛ dɔni liwe kakaa ligbã́zeze me; kiliɛ gi ɔnɔnɔ ɔ́trata liboetɔ ɔ, gi bɛpani i, xe bɛnya nɛ ɛplɛ ese e, loo aakɔ̀ kididɔ pɔni lɛ tɔ ɛ, nite lilɛ ní kapɛa lia ya kyɛ mɛ ɛ. 16Abla ɛ, Aya abitɛ yɛ kakaplɛa akí Abraham ni yɛ osobi ye. Aya yɛ liboe le lípani si “ni wɔ besoebi ba,” gi libasɛ si banɔ srɛsrɛ ɛ, pɔ̀ lipani si, “ni wɔ osobi ye e,” gi libasɛ si ɔnɔ tole kpoo, gi yɛ onu Kristo ye e. 17Mɛɛpani si Aya abitɛ onugu nyanya ni Abraham, lɛ aka aplɛ si, yɛ abitɛ ní yɛ liboe le aʋa a. Ɔsã nɔ gi bɛkpɛ agɔ alafa tiene nì avitata kede e, ɔ́tratani yɛ onugu nyanya nɔ kuble e, xe aazizi yɛ kakaplɛa a, gi Aya aka aplɛ ɛ. 18Lɛ xe Aya bidɔkɔkɔ ʋɛ bika ni Ɔsã nɔ su i, kɔlɔ bíka ní yɛ kakaplɛa su tɔ ɔ. Pɔ̀ kɔkpɛ Aya yɛ lipomepɛpɛ nɛ loso e, akɔ bidɔkɔkɔɛ klɔ ʋa aki Abraham gani yɛ kakaplɛa mɛ.

19Kɔlɔ ege loso bɛkpɛ Ɔsã nɔ ɛ? Bɛkɔ lɔ ɛpɔnɔ, tɔ ɔbasɛ blɔ, tɔ kute kidiliɛ gi eboe zimizi na enu i, lɛ linu si ozè zɛkɔna ni Abraham yɛ osobi ye kibabaɛ, gi yɛ loso Aya aki kakaplɛa ɛ. Aya yɛ baxwɛdzɛ ba aʋa Ɔsã nɔ ɛga xe eba a, lɛ bɛkɔ lɔ ɛki ɔnɔ gbagbe ɔguvu u, gi ɔlɛ ni Aya yɛ baxɛdzɛ ba ni blɔ kusi i, xe ableke ɛna banɔ gbagbe ba a. 20Abla ɛ, ɔguvu ye ónu ɔnɔ tole ɔnɛ ɛ, lɛ Aya tole ko ɔlɛ ɛ.

Kidiliɛ gi kɛ loso Ɔsã nɔ ɛba ɛ.

21Kibasɛ libasɛ si Ɔsã nɔ ɛyɔ kedu ní Aya yɛ kakaplɛa su na a? Aníte koŋ! Lɛ xe ɔnɔ azɛ ɔsã nɔ klɔ gi aaki ligbã ɛ, kɔlɔ ɔnɔ kakaa kude kwiagyɔ gani lɔ aʋa kugaga mɛ ɛ. 22Pɔ̀ Aya yɛ liboe le lipani kí kelea mɛ petee si kakpasi ní kuzimizi yo kigaglaɛ ese; lɛ loso kakaplɛa bidɔkɔkɔ ʋɛ ní kuziŋa ní Yesu Kristo me e, bɛ bɛkɔ ɛki banama gi bɛziŋa a.

23Pɔ̀ xe able ke kuziŋaa kwiaba ɛ, Ɔsã nɔ evu blo enya ŋwisi ligba bezeze kinɛ, kɔzɛna ni lipoe lɛ klɔ gi biabu kuziŋaa basɛ ɛ. 24Lɛ loso e, Ɔsã nɔ ɛzɛɛgbani blɔ ɛtsinɔ ní Kristo klɔ atɔ Aya alulɔ blɔ ni yɛ kusi gani kuziŋa ní Kristo me aʋa a. 25Abla gi kuziŋaa lipoe le lina ɛ, Ɔsã nɔ ɔma ní blɔ onu tɔ ɔ.

26Gani kuziŋaa mɛ ɛ, mlɔ pɔ́ mledzi Aya ye bebi gani likpɔkpɛkpɛ mɛ nì Kristo Yesu u. 27Gi bɛkpɛ kuni kimlɔ ní likpɔkpɛkpɛ mɛ ni Kristo e, mlɛkpɛ Kristo ɔtutɔ yɛ ligbã́ nɛ ŋwisi awu kinɛ ɛ. 28Abla ɛ, lidzegaga ɛtɔtɔ líma ní Yuda ɔnɛ ni Hela ɔnɛ kusi, ɔnɔdzidzi ni isuwla mɛ ozeze kusi, benyime ni badzɛ kusi; mlɔ pɔ́ mledzi kidɔ tile ní likpɔkpɛkpɛ mɛ ni Kristo Yesu u. 29Xegi mlenu Kristo banɛ ɛ, kɔlɔ mlenu Abraham yɛ besoebi, lɛ mlaazɛ kidiliɛ gi kɛ Aya aka aplɛ ɛ.

Currently Selected:

Galatia 3: avn

Highlight

Compare

Copy