Efeso 4

Baʋaziŋa ba Likpɔkpɛkpɛ ní Yesu me

1Lɛ loso mɛ gi makpasi ligba lɛ ɛ, kɔkpɛ gi meesumu Ɔkaɛ ɛ; mɛɛkpɛ lɛ mlɔ mɛ si mleze ligbã́ gi lisrɔnɔ lɛ klɔ gi Aya atrɔ aplɛ ɛ, xe axwa mlɔ ɛ. 2Mlepleni isu ya lipoe kakaa, mlayɔ ni ɔna mɛ, tɔ mlaplɛ litɔ kese. Mlabasɛ mlɔ kulɔlɔɔ, lɛ mlakíyeʋi isu u, xegi banɔdzedze ba bɛta kese e. 3Mlekeni edi tɔ likpɔkpɛkpɛ lɛ lize ní mlɔ kusi kiliɛ gi Aya yɛ Ɔfuɛfuɛ nɔ ɛki kusuyɔ liɔ ɔ, gi kwinya mlɔ ɛkpɛ likpɔ ɛ. 4Kisugya tile ni Ɔfuɛfuɛ tole bilɛ, ŋwisi kiliɛ gi kudeonudidi tule e, gi kɔ Aya axwa mlɔ akɔ kulɛ ɛ. 5Ɔkaɛ tole ɔlɛ, kuziŋa tule, kunikpɛkpɛ tule; 6Aya tole gi onu Ɔka ki blɔ petee yɛ ɔlɛ ɛ, lɛ yɛ onu Ɔkaɛ, gi ɛɛwa axwɛ na gani blɔ petee me e, xe ɔlɛ ní blɔ mɛ ɛ.

7Pɔ̀ ki blɔ mɛ ɔkakaa ɛ, bɛki blɔ lipomepɛpɛ ŋwisi kiliɛ gi Kristo alɛ bɛ ɛ. 8Kiliɛ gi bɛŋwlimi kpɛ Aya yɛ liboe le me si,

“Agi atrɛ ní lifunu ne kaʋa ke e,

atsini banɔ vuvu ba kpaŋu kɔpɔni isu ya,

lɛ aki banima bidɔ kɔkɔ ʋɛ ɛ.”

9Abla ɛ “emu atrɛ kaʋaa,” lɛ ese linu si kitɛ ɛ? Lɛ ese linu si kutɔpu yɔ ɛ, eple atrɛ ní kesea odzudzu klɔ ké. 10Lɛ loso e, ɔniliɛ klɔ gi yɛ eple aba ɛ, yɛ ke emu atrɛ ní ayɛɛ mɛ lɛ adɔ lifunu ne aza a, tɔ yɛ kaʋaŋaa kana ní lifunu ne, ni kesea aʋa ani kesea ese e. 11Yɛ aki banima bidɔkɔkɔ ʋɛ, yɛ edu banɔatɔ tɔ beze banɔkpɛkpɛ, batɔ tɔ beze beboedoplɛ, batɔ tɔ beze banama gi bizɛɛpani liboe gbã nɛ ɛklanɔ ɔ, batɔ tɔ bedi baʋaziŋa ba ni Liboe Gbã nɛ badɔbasɛ ba aʋa. 12Abitɛ lɛ nite tɔ yikɔ ɛlulɔ Aya yɛ banima ɛki Aya kusumu yo, tɔ Kristo yɛ baʋaziŋa ba gi benu Kristo yɛ kisugyaɛ biatsi tɔ biamɔ kigagla a. 13Kɔzɛna ni lipoe lɛ gi blɔ ɔ pɔ́ kwiadzi kidɔ tile ní blɔ kuziŋaa ni blɔ kuboeteo ní Aya Yebi ye me e; lɛ kwiatsi gi kwiazɛ Kristo yɛ kizezee me petee e. 14Lɛ loso e, kutraze banuvɔ tɔ ɔ. Kútraze ŋwisi keniaʋa ohu u, gi kuni yo akpɔ la loo asia na kudɔbasɛ liwɔ gagla lɛ, liazefu klanɔ ɔ, lɛ banama gi bizɛbasɛ asia na ɛ batrátani blɔ kumeno o, xe kwiazi asia na aʋa ŋa tɔ ɔ. 15Boŋu i, gani anukwarɛɛ kupaniɔ mɛ ɛ, ní kulɔlɔ Ɔfuɛfuɛ nɔ mɛ ɛ, lilɛ si kwiatsi ní kapɛ kakaa mɛ kí Kristo o, gi yɛ onu litukpo le e. 16Dɔni yɛ kɔ ɛ, isu ya kapɛ kakaa kɛkpɛ likpɔ, lɛ ika lɛ ivu kapɛ kakaa ɛkpɛ likpɔ ní ka itsaklɔ. Loso xe kapɛ kakaa kɛwa ka axwɛ na a, kiliɛ gi liziã ɛ, ɔnɔse lo izɛmɔ kigaglaɛ gani kulɔlɔ mɛ ɛ.

Ligbã́zeze ŋwisi Aya yɛ bebi kinɛ ɛ

17Lɛ loso mɛɛsi mlɔ ní Aya linyi ne me e, lɛ mɛɛtrɔ likla lɛ aʋa ɛki mlɔ si, mledi mumɔ tɔ mlakítrɛ ní lɛ aʋa eze ligbã́ ŋwisi banama gi béte Aya a, xe ba begyodi ʋa bénu kididɔ ɔ, 18lɛ ba kuboesenu yo kwidɔ litumu u. Ɔŋakɔ ɔma kí ba ní ligbã́ɛ nɛ gi Aya izɛɛkɔ mɛ ɛ, lɛ ese linu si, ba pɔ́ béte liboe, lɛ ba batu ʋa mɛ bali gagla a. 19Béte kuye tɔ ɔ; lɛ bɛyurɔ isu ya ɛki eboe zimizi ni anyaniboe kakaa ni kupɛpɛ si bɛɛbitɛ sani nite e.

20Aní lɛ mlɛkpasi ní Kristo su u! 21Agi mlenu yɛ onu tututu u, xe mlekuni yɛ kude e, bɛbasɛ mlɔ anukwarɛɛ liɛ gi ɔlɛ ní Yesu me e. 22Lɛ loso e, bɛbasɛ mlɔ si mlayurɔ mlɔ ligbã́ koko le gi liki si mleeze kiliɛ ɛ, gi mlɛpɛ ɛ, ligbã́ koko le gi lɛ liizizi kɔkpɛ lɛ kupɛpɛ zimizi yo o, gi kwimeni mlo o, xe kwiki si mlɛlila ɛ. 23Mlaki tɔ mlɔ ina nɛ ni mlɔ begyodi ʋa bidzi bidɔ vuvũ, 24atɔ mlakɔ isu vuvũ akpɛ ŋwisi liwu kinɛ ɛ, gi lɛ bɛbitɛ ní Aya yɛ kilɛlɛɛ mɛ ɛ, xe libu isu ya ɛbasɛ ní anukwarɛɛ ligbã́ nɛ mɛ ɛ, gi ligyɔ ɔ xe lidra ɛ.

25Mlakísɛ asia tɔ ɔ! Ɔnɔ kakaa odo anukwarɛɛ ki yɛ ɔhanuglɔ ɛ, lɛ ese linu si blɔ petee kunu kupɛ kí kisugya tile e. 26Xe mlɛmɔ kusuyeʋi i, mlakíki tɔ kugbani mlɔ kpɛ eboe zimizi me e, lɛ mlakíki tɔ liwo le liku ní mlɔ kusuyeʋio aʋa a. 27Lɛ mlakíki ozimizi ye kudeonu u. 28Banama gi bizezuru i, bamɔni kuzuru tɔ bawa axwɛ tɔ beze ligbã́ gbã aki isu, tɔ batani bazianete ba kupɔnɔ ɔ.

29Mlakíki eboe zimizi atɔtɔ edo ní mlɔ onu, pɔ̀ eboe gbã ko, la klɔ gi aaki kupɔnɔ ɛ, tɔ eboa la gi mlaapani i, aabitɛ eboe gbã aki banama gi bɛɛta mlɔ kutu i. 30Lɛ mlakíkpɛ Aya yɛ Ɔfuɛfuɛ nɔ ní asigaga mɛ ɛ; gi lɔ Aya ɔkɔ akpɛ mlɔ gyesi ye ki liwe lɛ gi aabu mlo e. 31Mlebú kuyeʋiyeʋi kakaa, kusuyeʋi gagla, avitɛ, banɔ su kuzizizizi ani liboe zimizi kakaa azanɔ. 32Boŋu i mlapɛ lipo me tɔ mledi mlɔ ahanuglɔ ba asigaga, tɔ mlakɔ eboe akyɛ mlɔ ahanuglɔ ba kiliɛ gi Aya akɔ akyɛ mlɔ ní Kristo me e.

Currently Selected:

Efeso 4: avn

Highlight

Compare

Copy