Efeso 3

Paulo edo Liboe gbã nɛ aki banama gi bénu Yudanɛ

1Kɔkpɛ lɛ ya loso e, mɛ Paulo, bɛkpɛ mɛ ligba ki Kristo Yesu ní mlɔ banama gi mlénu Yudanɛ ma loso o, 2mazi aŋa si mlenu si Aya ní yɛ lipomepɛpɛ nɛ mɛ ɛ, akɔ lixwɛ ɛ nɛ ya aki mɛ si miwa akí mlɔ kupɛ̀pɛ. 3Aya ebu yɛ batrɔtrɔ kpokpo ʋa abasɛ mɛ. Kiliɛ gi maŋwlimi aki mlɔ taʋɛ azanɔ ɛ, 4lɛ xe mlaakla kidiliɛ gi maŋwlimi i, mlaamɔ kiliɛ gi menu Kristo yɛ eboe kpokpo la ese e. 5Tsã́ ɛ, bébu eboe kpokpo la ya elue abasɛ ɔnɔ gbagbe ɔtɔtɔ ɔ, pɔ̀ Aya ebu la abasɛ abla gani yɛ Ɔfuɛfuɛ nɔ mɛ aki yɛ banɔkpɛkpɛ dradra ba ni yɛ beboedoplɛ ba. 6Liboe kpokpo le linu si gani Liboe Gbã nɛ mɛ ɛ, banama gi bénu Yudanɛ fɛ ɛ, bɛmɔ ɔŋakɔ pɔni Yudanɛ ma ní Aya yɛ kukriraa mɛ, lɛ bedzi banɔ likpɔkpɛkpɛ tile ni kisugya tile, lɛ bɛmɔ ɔŋakɔ ní kakaplɛa lia gi Aya akɔ gani Kristo Yesu me e.

7Aya abitɛ mɛ ɔnɔsumu ye ki Liboe Gbã nɛ gani yɛ bidɔkɔkɔɛ ʋɛ gi aki mɛ aʋa a, kɔgani yɛ kigaglaɛ axwɛwawa la mɛ ɛ. 8Mɛ menu ɔgɔgɔɛ ní Aya yɛ banɔ gɔgɔ ba petee kusi; pɔ̀ Aya gani yɛ lipomepɛpɛ nɛ mɛ ɛ, aki mɛ kudeonu si mikɔ Liboe Gbã nɛ ni eboe gbã na gi kwiamɔ dɔni Kristo klɔ ɔ, gi ekeme e sani kiliɛ gi banima bianu la ese e, kɔ tsini banama gi bénu Yudanɛ ɛ, 9tɔ miki banima petee bamɔ kiliɛ gi Aya yɛ kikpokpo me batrɔtrɔ ʋa a biawa axwɛ na. Aya gi yɛ abitɛ kidɔ kakaa ní kelea mɛ ɛ, ekpo yɛ batrɔtrɔ ʋa dɔni okpese klɔ kɔna ni abla a, 10atɔ ní lipoe lɛ ya mɛ ɛ, ɔnɔ kakaa gani baʋaziŋa ba aʋa ɛ, baʋaŋa ba ni, bekusi ba nì bigagla ʋɛ ní lifunu ne kelea mɛ ɛ, biakpasi yɛ kuboeteo ní kɔ edeke la ni kukyikyi kakaa mɛ. 11Aya yɛ abitɛ lɛ kɔkpɛ yɛ batrɔtrɔ moblo ba gi aki liba lɛ mɛ gani Kristo Yesu blɔ Ɔkaɛ aʋa a. 12Ní likpɔkpɛkpɛ mɛ ni Kristo ani gani blɔ kuziŋa ní yɛ mɛ ɛ, Aya klɔ kudeo kwidra gi kwiatani Aya aŋu mɛ kutrɛ lifumose e. 13Maki mlɔ litukpo si, mlɔ ɔna ɔkigbɔ̀ kɔkpɛ ɔzia nɔ gi mɛɛmɔ ní mlɔ onu loso o; lɛ petee liiba lɛ mɛ ɛki mlɔ kupɛpɛ.

Yesu alɔ blɔ

14Kɔkpɛ lɛ ya loso e, medu mɛ aklamasi na kesea lɛ maxwa blɔ Ɔka Aya, 15gi yɛ kɔ okú kakaa ní lifunu ne nì kesea ʋa izɛɛzi lɔ linyi ne ɔtutɔ lɔ ɔ. 16Meʋi Aya si dɔni yɛ kukrira glegleo me e, ɔki mlɔ kigagla gani yɛ Ɔfuɛfuɛ nɔ mɛ tɔ mlɔ begyodi ʋa beze gagla a, 17lɛ meʋi Aya si Kristo aaze ní mlɔ ina nɛ mɛ gani kuziŋa mɛ ɛ. Meʋi Aya si tɔ mlalɔ mlɔ ahanuglɔ ba, tɔ xe mlɛbitɛ nite e, mlɔ igu ne ni ɔxɔ lɔ iaze ní kunɔlɔɔ mɛ. 18tɔ mlakpɛ likpɔ ni Aya yɛ banima pɔ́, tɔ mlate blɔ Ɔkaɛ Yesu Kristo yɛ kunɔlɔɔ kɔ kinenee me ni kɔ kidzedzee me, kɔ kimumu ye me ani kɔ kidzudzu ye me, 19tɔ mlaate yɛ kulɔlɔ ɔ, gi kwimu i sani kuboete kakaa tɔ mlaayi ni Aya yɛ kizezee me.

20Ki ɔniliɛ gi gani yɛ kigaglaɛ ɛ, gi kiwa axwɛ ní blɔ mɛ ɛ, aatani kubitɛ ki blɔ sani kiliɛ gi kwiatani kuʋi i, loo kwiatani kugyodi i, 21Aya kunɛ kunu kusudraa ní ɔsɔli ha lɔ mɛ ni Kristo Yesu me lipoe kakaa, kɔtsinɔ kanɔmɛ anɔmɛ! Amen.

Currently Selected:

Efeso 3: avn

Highlight

Compare

Copy