Kolose 4

1Mlɔ baka ba, mlabitɛ kidiliɛ gi kipɛ ɛ, xe kisrɔnɔ nɔ ɛki mlɔ banɔdzidzi ba, agi mlete si Ɔka ɔlɛ ní mlɔ fɛ mlɔ awla ní lifunu ne loso.

Paulo abitɛ batrɔtrɔ apɔnɔ aki ba

2Mleze ní Aya kuxwaxwa aʋa lipoe kakaa, lɛ mleze ni aŋu tɔ mlazeedo yɛ ɖase e. 3Lɛ mlaxwa Aya ní blɔ fɛ litukpo o, tɔ Aya ɔdra liboe le kudeo ɔki blɔ, tɔ kupani Kristo yɛ Liboe kpokpo le, gi lɛ loso bɛkpɛ mɛ ligba lɛ ɛ, 4mlaxwa Aya tɔ midra lɛ su mumɔ kiliɛ gi lilɛ si mibitɛ ɛ. 5Mlakɔ kuboete agbani banama gi bénu baʋaziŋa ba ɛ, atɔ mlawa kude kakaa onu gi mlemɔ ɛ, su axwɛ, tɔ mlakɔ apani aki banama gi bénu baʋaziŋa ɛ. 6Mlaki tɔ lipomepɛpɛ ligbani mlɔ sìka kakaa se, tɔ mlɔ siya sɛ sidɔ ade lipoe kakaa, atɔ mlate kiliɛ gi ligyeno si, mlaabu eboe la onu ki ɔnɔ kakaa ɛ.

Paulo atsisi yɛ kunɔpanɔ

7Tixiko aasi mlɔ eboa la petee gi ɛba mɛ aʋa ɛ, onu onemi ɔlɔlɔ nɛ ni ɔnɔsumu anukwarɛɛ onete ni blɔ ɔhanɛ ɔxwɛwa ní Ɔkaɛ mɛ ɛ. 8Mɛɛkpɛ yɛ ɛtsisi mlɔ si tɔ aaki mlate kidiliɛ nì eboa la gi alɛ ní ya ɛ, ani tɔ aakpɛ mlɔ ina nɛ kigagla a, 9lɛ maki si Onesimo okuni yɛ kude e. Onesimo onu blɔ onemi gi kwilɔ xe odzi onu anukwarɛɛ onete e, gi onu mlɔ mɛ tole e, ba biaki si mlaate kidiliɛ gi kilɛ ní blɔ ní ya a.

10Aristarxo gi bɛkpɛ ligba ɛpɔni mɛ ɛ, yɛ kyɛ apani mlɔ nite ke, Marko gi yɛ ni Barnaba benu bakaʋia bebi kyɛ ɛ, apani mlɔ. Mlɛzi batrɔtrɔ ni yɛ su edi lɛ loso xe aba mlɔ klɔ ɛ, tɔ mlazi yɛ. 11Yesu gi bizɛɛxwa si Yusto e, yɛ fɛ apani mlɔ. Ba ko benu Yudanɛ ní mɛ ahanuglɔ baxwɛwa ba kusi ki Aya yɛ kaʋaŋaa, lɛ benu ɔnadɔdɔ akí mɛ ɛ. 12Epafra, gi ádɔ ní mlɔ mɛ ɛ, xe onu Kristo Yesu yɛ ɔnɔsumu i, yɛ fɛ apani mlɔ, yɛ izɛɛŋwlɛ mlɔ litukpo ní Aya kuxwaxwa mɛ lipoe kakaa, si tɔ mlalɛɛ mumɔ ŋwisi banɔ gi betsi i, xe mlɛka ní isu aʋa a.

13Lɛ maŋa katsalia aki yɛ si ɛɛwa axwɛ gagla ní mlɔ ni banama gi balɛ ní Laodikea ni Hierapoli i litukpo. 14Blɔ ɔʋia ɔlɔlɔ nɛ ɛ Luka, ɔwabitɛɛ, ni Dema bɛpani mlɔ.

15Kwipani benemi ba ní Laodikea, kɔpɔni ɔdzɛɛ gi bizɛɛxwa si Nimfa a, ani baʋaziŋa ba gi bizɛɛtsa ní yɛ kepea mɛ ɛ.

16Lɛ xegi mlɛkla keplekpaa lia pɔ́ ɛ, mledi le aʋa si bɛkla ka ɛki Laodikeanɛ ma baʋaziŋa ba fɛ, atɔ mlɔ fɛ mlakla keplekpaa lia gi maŋwlimi aki Laodikeanɛ ma ɛ.

17Atɔ mlasi Arxipo si, “di le aʋa si wɔgù wɔ axwɛ ana gi wɔzɛ dɔni Ɔkaɛ klɔ ɛ.”

18Mɛ Paulo makɔ mɛ awla la xe maŋwlimi kunɔ pani uliɔ ya ʋa. Mlakídze si bɛkpɛ mɛ bibɔ ɔ.#4:18 Bibɔ ʋɛ biki si Paulo yɛ iwla lɛ ítramɔ kudeo onu gi aaŋwlimi bidɔ mɛ mumɔ ɔ. Aya yɛ lipomepɛpɛ nɛ lize nì mlɔ.

Currently Selected:

Kolose 4: avn

Highlight

Compare

Copy