1 Tesalo 1

Kunɔpanɔ

1Keplekpa lia ya kɛ́dɔ ní Paulo, Silvano ani Timoteo klɔ ɛki banama gi balɛ ní Tesalonika ɔsɔli ha lɔ mɛ ɛ, gi bɛzi Ɔka Aya ani Ɔkaɛ Yesu Kristo ba aʋa kuŋa ɛ: Atɔ lipomepɛpɛ ni kusuyɔ kuze ni mlo.

Kwido Aya ɖase ní mlɔ Ligbãzeze ne ni Kuziŋa ní Yesu Kristo me Litukpo

2Kuzedo Aya ɖase lipoe kakaa ní mlɔ petee litukpo lɛ kuzɛɛplɛ aŋu ní mlɔ aʋa ní Aya kuxwaxwa mɛ ɛ. 3Lɛ kuzɛɛplɛ aŋu ní mlɔ aʋa ní Aya blɔ Ɔka yɛ aŋu mɛ kiliɛ gi mlɛɛwa mlɔ kuziŋaa su axwɛ ɛ, kiliɛ gi mlɔ kunɔlɔɔ ɔ, kwiki si mlɛɛwa axwɛ gagla la a, ani kiliɛ gi mlɔ kudeonudidi ní blɔ Ɔkaɛ Yesu Kristo me kwize gagla ɛ. 4Benemi ba, kwite si Aya alɔ mlɔ lɛ ebú mlo tɔ mleze yɛ banɛ ɛ. 5Lɛ kúmani mlɔ Liboe Gbã nɛ ɛ, ni eboe tètè ko, pɔ̀ kɔpɔni kigagla ni Ɔfuɛfuɛ Dradra lɔ ɔ, ani likla trɔtrɔ ní lɛ anukwarɛɛ aʋa. Mlete kiliɛ gi kwize ní mlɔ kusi i, tɔ lipɛ kí mlɔ kokoko. 6Mlɛkpasi blɔ ni Kristo; lɛ gi mlɛga kini mɔmɔ mɛ fɛ ɛ, mlɛzi liboe le ni isami gi idɔ ní Ɔfuɛfuɛ Dradra lɔ mɛ ɛ. 7Lɛ mledzi liŋwitsɛ ɛki banama pɔ́ gi bɛziŋa ní Makedonia ani Axaya ɛ. 8Lɛ Liboe Gbã nɛ lídɔ mlɔ klɔ ɛtrɛ ní Makedonia ni Axaya tete e, pɔ̀ Liboe le ni mlɔ kuziŋa ni Aya aʋa ɛ, lidzɛ ɔkɔ kakaa. Lɛ loso liboeboe líma gi kwiapani tɔ ɔ. 9Banɔ baklɔ ba pɔ́ bɛpani ní kiliɛ gi mlɛzi blɔ gi kwiba mlɔ klɔ ɛ su, ani kiliɛ gi mlɛyurɔ mlɔ kubúbitɛɔ, xe mlɛba Aya klɔ ɛ, tɔ mlesumu Aya liɛ gi yɛ onu anukwarɛɛ onetee e, xe ɔlɛ ligba nɛ ɛ, 10atɔ mlepe Yebi ye gi aadɔ lifunu ne kuba a, gi yɛ ayɔni adɔ ni bekpo ʋa mɛ ɛ. Yesu gi yɛ ebu blo o, dɔni Aya yɛ kutuheheo gi kwitraba mɛ ɛ.

Currently Selected:

1 Tesalo 1: avn

Highlight

Compare

Copy