Kolose 3

Isã ki Ligbã́ dradra Kuzeze gi liku Aya aŋu i

1Abla gi Aya ayɔni mlɔ nì Kristo adɔ ni bekpo ʋa mɛ ɛ, mlapɛ́ kidiliɛ gi kilɛ ní lifunu ne e, niklɔ gi Kristo odi ní Aya yɛ kaŋawla mɛ ɛ. 2Mlatrɔ mlɔ begyodi ʋa ní lifunu ne bidɔ mɛ aʋa asani kesea aʋa bidɔ mɛ. 3Lɛ ese linu si mletse lɛ abla ɛ, mlɔ ligbã́ nɛ bekpo le ni Kristo ní Aya mɛ. 4Tɔ xe Kristo o, gi yɛ onu mlɔ ligbã́ nɛ aado e, tɔ mlɔ fɛ mlaado ni yɛ ní kusudraa mɛ.

Ligbã́ koko le ni ligbã́ vuvu nɛ

5Loso mleye mlɔ isu ya bidɔɛ mɛ, gi binu kesea aʋa kusuŋwasi i: gi binu kihasi i, kumɔdramɔdra, kulekuku, ani bapɛ́pɛ zimizi gi bizɛɛgbani banɔ ɛtsini kuzimizi me, kuŋazi gi binu kubusumu; 6kɔkpɛ bɛya elu loso Aya yɛ kusuyeʋio kwitraba batumonu ba aʋa, 7mlɛga bede ba ya elu izanɔ kɔkpɛ ligbã́ɛ nɛ gi mleze e loso.

8Pɔ̀ abla ɛ, lilɛ si mlebu bidɔ bɛ ya elue azanɔ gi binu u: Kusuyeʋi, kusuyeʋi gagla, banɔ su kuzizi, ebusioboe, eyeyeboe akí do edɔni mlɔ onu u. 9Mlakímeni mlɔ ahanuglɔ ba, gi mlebu mlɔ ligbã́ koko le ni lɛ kiboebitɛɛ ɛzanɔ ní mlɔ mɛ ɛ. 10Gi mledzi banɔvuvu u, gi Aya eedzini abitɛ ní kuboete ní yɛ kilɛlɛɛ mɛ onu u, tɔ yidzini mlo emanɔ tɔ mlaate ye mɔmɔmɔ.

11Lɛ loso lidzegaga líma ní Hela ɔnɛ ni Yuda ɔnɛ, ɔyaʋi tsatsa ni ɔyaʋi mɔtsamɔtsa kusi. Nite ke lidzegaga líma ní bababa ni Sikianɛ gi ba aŋu ádra, ɔnɔdzidzi ye ni ɔnɔ gi ɔlɛ ni isuwla mɛ kusi i, pɔ̀ Kristo yɛ onu kidɔ kakaa lɛ yɛ ɔkpasi ní kidɔ kakaa mɛ ɛ.

12Lɛ loso agi mlenu Aya yɛ banɔ gi akya ni banɔ dradra ba ni banɔ gi alɔ ɛ, mlɔ ligbãzeze ne libasɛ asigaga didi, lipome pɛpɛ, litɔplɛplɛkese, kusububɔ ni ɔnayɔyɔ, 13Atɔ mlaplɛ litɔ kese aki mlɔ ahanuglɔ ba, lɛ mlakɔ eboe akya mlɔ ahanuglɔ ba, xe liboetɔ lilɛ ní ɔnutɔ awla ní yɛ ɔhanuglɔ su i, kiliɛ gi Ɔkaɛ fɛ akɔ akyɛ mlɔ ɛ, mlɔ fɛ mlakɔ akyɛ mlɔ ahanuglɔ ba. 14Lɛ kɔpɔni eboe gbã na ya ɛ, mlabasɛ kunɔlɔ, lɛ ese linu si kɔ kuzɛɛnya ʋɛ petee kpɛ likpɔ.

15Mlaki tɔ Kristo yɛ kusuyɔɔ kuŋa aʋa ní mlɔ ina nɛ mɛ, lɛ ese linu si ŋwisi kisugya tile me banɔ kinɛ ɛ, Aya ɛxwa mlɔ ɛki kusuyɔ. Lɛ loso mlazeedo Aya ɖase e. 16Mlaki tɔ Kristo yɛ liboe le lize ní mlɔ mɛ sanɔ, lɛ mlakɔ kuboete kakaa kɔ basɛ mlɔ ahanuglɔ ba bidɔ, tɔ mlagba mlɔ ahanuglɔ ba nì idzi nɛ gi bɛŋwlimi ikpɛ ní Aya yɛ keplekpaa mɛ ɛ, nì baʋaziŋa ba idzi nɛ ani idzi gi ipani ní Aya Ɔfuɛfuɛ nɔ su u, tɔ mlaza idzi nɛ nì ɖase kudodo ki Aya ní mlɔ ina nɛ mɛ. 17Lɛ kidɔ kakaa gi mlaabitɛ gani kunugu loo axwɛwawa mɛ ɛ, mlabitɛ bɛ petee ní Ɔkaɛ Yesu linyi ne me, atɔ mlazeedo Ɔka Aya ɖase gani yɛ aʋa.

Paulo akpɛ isã akí basɔlisɔli ba kupeo

18Mlɔ benyimedze ba, mlepleni isu ya akpɛ ní mlɔ benye ba ese, kiliɛ gi lilɛ si mlabitɛ lɛ ŋwisi banɔ gi bali ni Ɔkaɛ kude kinɛ ɛ.

19Mlɔ badzɛnye ba, mlalɔ mlɔ bedze ba, mlakí zɛɛtɛni ba.

20Mlɔ banuvɔ ba, mlenu mlɔ bapɔnɛ ba ìgbe ní kidɔ kakaa mɛ, lɛ ese linu si bɛ bizeeku Ɔkaɛ aŋu.

21Mlɔ bebika ba, mlakíkpɛ mlɔ bɛbi ba kusuyeʋi i, xe aní te e, ba ina nɛ iagbɔ̀ ní kidɔ kakaa mɛ.

22Mlɔ banɔdzidzi ba, mlenu mlɔ kesea aʋa baka ba ìgbe ní kidɔ kakaa mɛ; lɛ mlabitɛ lɛ aní xegi ba aŋu na alɛ ní mlɔ su ko o, aloo tɔ mlɛɛzi kukɔkɔ ɛdɔni ba kɔ ɔ, pɔ̀ ní kidɔ kakaa mɛ ɛ, mlabitɛ lɛ ni ɔna mɛ dradra kɔkpɛ kubùbù kí Ɔkaɛ loso. 23Lɛ ni kidɔ kakaa gi mlaabitɛ mɛ ɛ, mlabitɛ kɛ dɔni mlɔ ɔna mɛ, ŋwisi Ɔkaɛ mlɛɛbitɛ lɛ ɛkɔ kinɛ ɛ, lɛ aní ki banɔ ɔ. 24Agi mlete si, mlɛtramɔ ɔŋakɔ ɛdɔni Ɔkaɛ klɔ ɔ, ŋwisi liʋɛ tsatsa kinɛ ɛ, kɔ Ɔkaɛ Kristo yɛ mleesumu i. 25Lɛ ɔnɔ kakaa gi izɛɛbitɛ eboe zimizi i, xegi Aya axwa litsi le e, aatsa lɛ liʋɛ nɛ ɔki yɛ gi aŋu mɛ didi atráze lɛ mɛ ɛ.

Currently Selected:

Kolose 3: avn

Highlight

Compare

Copy