Kolose 2

1Mapɛ si mlete kiliɛ gi mizɛɛŋwlɛ mlɔ litukpo o. Mlɔ ni banama gi balɛ ní Laodikea a, kɔpɔni banama petee gi bámɔ mɛ aŋu mɛ ni aŋu mɛ ʋidi i. 2Mɛ kupɛpɛɔ kunu si tɔ bakpɛ ɔna ní ba lipo, tɔ bakpɛ ba likpɔ ní kunɔlɔ mɛ ani tɔ bamɔ exo ala petee gi anukwarɛ kuboesenu yo kuzɛɛmanɔ ɛ, tɔ biate Aya yɛ Liboe kpòkpò le gi linu Kristo ɔtutɔ lɔ ɛ. 3Yɛ onu ɔniliɛ gi izɛɛdra Aya yɛ kuboeteo ni kuboesenu yo kɔ bikesinɔdɔ kpòkpò ʋe petee su u.

4Mɛɛsi mlɔ lɛ ya tɔ mlakíki si ɔnɔnɔ ɔkɔ yɛ onugu me gyigyi no omeni mlo o, xe yɛ eboe la ɛɛŋwi ŋwisi anukwarɛɛ enu fɛ ɛ. 5Lɛ ese linu si xe máma ní mlɔ su ní kisugyaɛ mɛ fɛ ɛ, malɛ ní mlɔ su ní Ɔfuɛfuɛ nɔ mɛ, lɛ isami izeeku me e, xe mamɔ kiliɛ gi mlɔ batrɔtrɔ ʋa balɛ ɛ, ni mlɔ Kristo aʋa kuziŋaa kɔ kigaglaɛ liɛ mɛ gi mlalɛ ɛ.

Ɔnɔ gbagbe yɛ ligbã nɛ lɛ Kunanaa kulɛ ní Kristo me

6Abla ɛ, kiliɛ gi mlɛzi Kristo Yesu ŋwisi Ɔkaɛ kinɛ ɛ, niteme ke lilɛ si mlaga ní likpɔkpɛkpɛ mɛ ni yɛ, 7tɔ mledzi banɔ gi ba igu ne idɔ ní yɛ mɛ ɛ, tɔ mlawa mlɔ ligbã́ nɛ atrɔ ní yɛ aʋa, atɔ mleze gagla ní kuziŋa mɛ, kiliɛ gi bɛbasɛ mlɔ ɛ, tɔ mleyi agbigba ni ɖase kudodo.

8Mledi lɛ aʋa tɔ ɔnɔnɔ ɔkimeni mlo evu gani kelea mɛ kuboeteo ni kemeno pluplu gi kuʋíbu libi itɔtɔ mɛ ɛ, lɛ ese linu si kuboete uliɔ kunu ikɔ̀ gi banima bizɛɛbasɛ ɛ, ani kelea mɛ bidɔbasɛbasɛ gi bídɔ ní Kristo me e. 9Lɛ ese linu si Aya yɛ kizeze me petee kikpasi ní Kristo me ŋwisi ɔnɔ kinɛ ɛ, 10lɛ Aya aki si mlɛna ní kidɔ kakaa mɛ ɛ, xe mlɛkpɛ likpɔ ní Kristo o, gi yɛ ɛɛŋa kigagla kakaa ni kukaŋaŋa kakaa aʋa ɛ.

11Gi mlɛkpɛ likpɔ ni Kristo e, bɛtsa ɔyaʋi ki mlɔ gi mlɛyurɔ mlɔ ligbã́ zimizi ne e, aní gani ɔyaʋi gi bɛtsa ni awla mɛ ɛ, pɔ̀ gani Kristo yɛ ɔyaʋi tsatsa lɔ mɛ ɛ. 12Lɛ bevive mlo ni yɛ ɛ gani kunikpɛkpɛɔ mɛ, bɛyɔni mlɔ ni Kristo gani mlɔ kuziŋaa ní Aya yɛ kigaglaɛ gi akɔ ayɔni yɛ adɔ ni bekpo ʋa mɛ ɛ mɛ. 13Gi mletse ní mlɔ eboe zimizi na mɛ ɛ, xe mlámɔ ɔwla dɔni eboe zimizi na kigaglaɛ ese e, gi lɛ ese linu si bátsa ɔyaʋi aki mlɔ ɛ, Aya aki si mledzi ligbã́ ni Kristo. Akɔ blɔ eboe zimizi na petee akyɛ blɔ, 14gi akyì ode e akpɛ ní ɔsã nɔ gi bɛŋwlimi i mɛ, nì lɔ kudetsítsi yo ni kedu alia gi biyɔ ni blɔ su mɛ ɛ; akɔ ʋɛ asɛ ní blɔ su lɛ eku ʋe ni osetsase lo su u. 15Lɛ gi Kristo azɛ kigagla ni kukaŋaŋa ní ifuɛfuɛ nɛ baka ʋa ni baʋaŋa ba awla ɛ, akpɛ ʋɛ kuye ní ɔha kusi gi aŋa bɛ aʋa gani osetsase lo me e.

16Lɛ loso mlakíki tɔ ɔnɔnɔ obu mlɔ lipɔ ní mlɔ kiŋaŋa loo biŋwɛŋwɛ, loo ní liwe ŋaŋa loo ɔdzidzi vuvu yɛ loo Lizemɔniwe le su. 17La ya elue enu gyesi gi Aya aki yɛ banima a ní Kristo kubaba su; pɔ́ liboe le ɔtutɔ lɔ linu Kristo o. 18Mlakíki tɔ ɔnɔ gi izɛɛplɛ imɔ ɔ, si yɛ ebu banɔ loo yɛ eesumu Aya yɛ ɔxwɛdzɛ ɔki tɔ mlɔ liʋɛ nɛ lidɔ mlɔ ɛza. Banɔ ba ya elu i, bizɛpani ní kidiliɛ gi bɛmɔ su u, lɛ ba kelea mɛ begyodi ʋa bizɛki si bizeefeke isu ya nì eboe fiteete la a. 19Oʋívu kudɔbasɛ yɔ ní Kristo gi yɛ onu litukpo le awla a, lɛ kiliɛ gi litukpo le lizɛɛbasɛ onɔse lo kudeo e, nite Kristo izɛɛbasɛ yɛ banima petee tɔ beze likpɔ ŋwisi kiliɛ gi axwa la ni ika lɛ izeevu kisugyaɛ kapɛ kakaa ɛkpɛ likpɔ kinɛ ɛ, xe izeetsi ŋwisi kiliɛ gi Aya apɛ si otsi kinɛ ɛ.

Kutse ni ligbã́ ní Kristo me

20Gi mletse ni Kristo ɛki kelea mɛ isã nɛ ɛ, xe mláma ní lɛ kigaglaɛ ese tɔ ɛ, ege loso mlɛki si bakpɛ ɔsã aki mlɔ ŋwisi kele me ligbã́ mlalɛ dzɛ ɛ? 21“Mlakívu kidiliɛ ɛ! mlakímini kiŋaŋaɛ liɛ edi i! mlakígbɔnɔ kidiliɛ klɔ ɔ!”? 22La ya petee ɛtrádu xegi bɛwa la su axwɛ pɔ́ ɛ; lɛ ese linu si ɛdɔ ní banima isã kpɛkpɛ ni bidɔbasɛbasɛ mɛ. 23Isãɛ lɛ ya elu izɛɛŋwi ŋwisi kuboete kɔkpɛ lɛ kusumu uliɔ gi izɛki si besumu i, tɔ liŋwi si beesumu Aya, ni lɛ imɔ nɛ mɛ kunɔbu yo, ni kiliɛ gi izebu kinie ɛki kisugyaɛ ɛ, pɔ̀ isãɛ nɛ íʋikɔ si ɔnɔnɔ ɔŋa yɛ kisugyaɛ kɛ kulekuku yo aʋa a.

Currently Selected:

Kolose 2: avn

Highlight

Compare

Copy