Axwɛ 21

Paulo Atrɛ ní Yerusalem

1Gi kwikla ba pɔ́ ɛ, kwimu iku ní ohu lo me lɛ kwikpaʋi i, xe kwidu aŋu na ni Kos i, lɛ gi kelea kɛti i, kwiba Rodo, lɛ dɔni niklɔ ʋa ɛ, kwiba Patara, 2niklɔ kwimɔ ohu ɔtɔ gi ɛɛtsa axu la ɛtrɛ ní Foinike e, lɛ kwiku lo e. 3Gi kwimɔ Kipro e, kwibu ye kpɛ kabaa mɛ lɛ kwitsa ɛza ɛtrɛ ní Siria ɛ, lɛ kwizɛtɔ ní Tiro e, lɛ ese linu si niklɔ ohu lo ɛtrábu adɔtu la. 4Kwimɔ baʋaziŋaatɔ niklɔ lɛ loso e, kwize ní ba su ewe tegloele. Gani Aya yɛ Ɔfuɛfuɛ nɔ mɛ ɛ, bɛmɔ eboa la gi ɛtrába yɛ aʋa a, lɛ loso bɛsi Paulo si i, ɔkitrɛ ní Yerusalem. 5Gi blɔ ewe la ɛna si kusɛ ɛ, kwitrɛ ní blɔ kude gaga aʋa, lɛ baʋaziŋa ba pɔ́, ni ba bedze ba kɔpɔni banuvɔ ba bɛgbani blɔ edono ní ɔma nɔ mɛ ɛ, lɛ gi kwina axuta la ɛ, blɔ pɔ́ kwidɔ blɔ aklamasi na aʋa xe kwixwa Aya ɛ, 6gi kwikra blɔ ahanuglɔ ba pɔ́ ɛ, kwiku ohu lo lɛ ba kɔ ɛ bedzitrɛ ní ba kupeo me e.

7Lɛ gi kwisɛ ní Tiro e, kwiba eku Ptolemai, lɛ kwipani benemi ba niklɔ ɛ, lɛ kwize ní basu liwe tile e. 8Gi kelea kɛti i, kwisɛ ɛba Kaisarea, lɛ kwitrɛ ní liboe gbã nɛ ɔpani pani yɛ ye Filipo kepea mɛ ɛ, yɛ eze banɔ tiegloele ba gi bɛkya ní Yerusalem si bapɔni baʋaziŋa ba ɛ, ba mɛ tole. 9Idisami tine gi ídi ni benyime e, xe izeedo eboe plɛ ɛ, ize ní yɛ awla.

10Gi kwize ní níklɔ ewe atɔ ɛ, oboedoplɛ ɔtɔ, gi yɛ linyi linu si Agabo gi ádɔ Yudea ɛ aba. 11Lɛ gi aba blɔ klɔ ɛ, eble Paulo yɛ kasɛa mɛ ɔnyagbe no akɔ anya yɛ tutɔ yɛ ikli lɛ ni iwla lɛ, lɛ apani si, “Nite Aya Ɔfuɛfuɛ nɔ ɛɛpani si, ‘Nite Yudanɛ ma bianya onyime kasɛa mɛ ɔnyagbeɔ nɔ ya onetee, ní Yerusalem, lɛ biakɔ yɛ ɔkpɛ awla kí banama gi bénu Yadanɛ ma ɛ.’ ”

12Agi kwinu liboe lɛ ya ɛ, blɔ ni banama gi bali níklɔ ɛ, kwiki Paulo litukpo si ɔkitrɛ ní Yerusalem. 13Pɔ̀ Paulo ebu le onu lɛ apani si, ege kiliɛ ya gi mlɛɛbitɛ ɛ, xe mleebemi i, xe mleebu ɔna ní mɛ lipo te e? Lɛ ese linu si mɔkɔ ɛ, mabla isu ya aplɛ, aní si banya mɛ tete e, pɔ̀ tɔ mitse ní Yerusalem kɔkpɛ Ɔkaɛ Yesu yɛ linyi ne loso.

14Lɛ gi kwimɔ si ɔ́trakyi yɛ batrɔtrɔ ba ɛ, kwigɔ tsriɖi lɛ kwipani si, Ɔkaɛ yɛ kupɛpɛɔ kuba kɔ mɛ ɛ.

15Lɛ ní ewe ala ya kede e, kwibla lɛ kwitrɛ ní Yerusalem i. 16Lɛ baʋaziŋaatɔ fɛ gi bɛdɔ Kaisarea ɛ, bekuni blɔ kude trɛ, lɛ bɛgbani blɔ ɛtsinɔ ní Mnason kepea mɛ ɛ, tɔ kwiaya ní yɛ klɔ. Mnason eze ɔdɔkpasi kokoo gi ádɔ Kipro e.

Paulo Adzɛ Yakobo klɔ

17Gi kwiku Yerusalem i, baʋaziŋa ba bɛzi blɔ ni isami. 18Gi kelea kɛti i, kwizeni Paulo kude trɛ ní Yakobo kepea mɛ, lɛ baʋaziŋa ba ba ɔnu bezeze ba petee bɛba niklɔ ɔ. 19Agi apani ba ɛ, akla kidɔ kakaa gi Aya abitɛ ní banama gi bénu Yudanɛ ɛ, kusi i gani yɛ axwɛwawa la mɛ aki ba tile tile. 20Lɛ gi benu le e, bɛkpɔ̀ Aya, lɛ bɛsi Paulo si, “Onemi, dani wɔɛmɔ ɛ, banɔ akpe akpe ba bɛziŋa ní Yudanɛ ma kusi i, lɛ ba petee bevu Mose Ɔsã nɔ mɛ gaglaa. 21Pɔ̀ benu ní wɔ su si, wɔbasɛ Yudanɛ ba klɔ petee gi balɛ ní babubitɛ ba kusi i, si badɔedzi ni Mose ɔsã nɔ kude lɛ wɔ pani si, bakítsa ɔyaʋi akí ba bebi ba lɛ bakíga ní blɔ ikɔ lɛ onu u. 22Abla ɛ kitɛ kwiabitɛ ɛ? Kitɛkitɛ fɛ ɛ, ɔnɔha lɔ aakpɛ likpɔ tsã, lɛ ese linu si bianu godoo si wɔba. 23Lɛ loso e, bitɛ kidiliɛ gi kwiasi wɔ ɛ. Benyime tiene bali ní ya gi bɛbitɛ kakaplɛ kí Aya a. 24Gbani banɔ ba ya ʋa, tɔ plo isu ya ni ba, atɔ tsa kidiliɛ gi bizɛkɔ ɛ, ní ba litukpo o, tɔ batani ba etukpo la kuxwa, kɔlɔ ɛ banima petee biate si, eboa la gi benu ní wɔ su i, áma ní la mɛ ɛ, lɛ wɔ tutɔ ɛ, wuzɛɛga mumɔ, lɛ wovu Mose ɔsã nɔ ní awla a. 25Pɔ̀ banama gi bénu Yudanɛ ɛ, pɔ̀ xe bɛziŋa ɛ, ba kwiŋwlimi kɔ, xe kwipani si tɔ, bekyri bidɔ gi bɛki babu ʋa, ni ika ani baga gi bɛwɔ ika mɛ ɛ, kɔpɔni kihasi.”

26Lɛ loso gi kelea kɛti i, Paulo ebu benyime ba klɔ apɔni yɛ isu ya, lɛ gi beplo isu ya pɔ́ ɛ, atrɛ ní Lisɔligba lɛ mɛ lɛ azaapani ní liwe lɛ gi kusuploo ewe la aablo su u, ni lipoe lɛ gi biaki bidɔ mɛ ɛ, xe biapɔʋi ní ba mɛ ɔkakaa litukpo e.

Bevu Paulo ní Lisɔligba lɛ mɛ

27Gi ewe tegloele la eblo pɔ ɛ, Yudanɛ a ma gi bɛdɔ Asia kesea mɛ ɛ, bɛmɔ Paulo ní lisɔligba lɛ mɛ, bɛkpɛ ozi kpɛ ní ɔnɔha lɔ petee me, lɛ bevu ye e. 28Bɛkpɛ ozi lo si, “Israelbanɛ ma, mlazi kí blɔ loo! Ɔniliɛ ya yɛ onu ɔniliɛ gi izɛbasɛ banima petee ní ɔkɔ kakaa bidɔ gi biyɔ kedu ní blɔakɔanɛ ma ni ɔsã nɔ ani lisɔligba ɛ lɛ ya su u. Lɛ sani lɛ ya ɛ, agbani Helanɛ loo Grikbanɛ atɔ fɛ amani lisɔligba lɛ mɛ, gi akɔ elulu ɔkɔ dradra kɔ lɔ ya ʋa su u.” 29Lɛ ese linu si bɛmɔ yɛ ni Trofimo, Efesoɔnɛɛ ní ɔma nɔ mɛ, lɛ begyo edi si Paulo agbani yɛ amani lisɔligba lɛ mɛ ɛ.

30Lɛ ozi eku ní ɔma zizi nɔ mɛ ɛ, lɛ banima bese ba lisɔligba lɛ mɛ, lɛ bevu Paulo o, xe behe ye dono ní lisɔligba lɛ mɛ ɛ, lɛ bɛda ipupo le kyɔŋ ɔ. 31Gi bɛzɛpɛ si, beeye ye e, liboe le lizɛna baguta ba ɔka ʋidi ye ní iklɔ si, Yerusalem ɔma zizi nɔ ɛpisa. 32Ní ɔnyɔsasaa lɔ klɔ ɖii aʋa ɛ, agbani baguta ba ni baguta ba baka ba apɔni isu ya, lɛ bese eku ní ba kusi i, pɔ̀ gi banama gi bɛkpɛ ozi lo bɛmɔ baguta ba ɔka ʋidi ye ni yɛ baguta ba ɛ, bɛmɔni Paulo kukusi.

33Baguta ba ɔka ʋidi ye, eti apɔni ba, lɛ evu ye e, lɛ akpɛ ɔsã si, banya yɛ ni akanya taʋa, lɛ eʋi ɔniliɛ elu gi onu u ani kidiliɛ gi abitɛ ɛ. 34Lɛ linɔkpi le mɛ banɔatɔ bɛkpɛ ozi lo si nite, lɛ batɔ fɛ si nite, kɔ gi ɔ́tani anukwarɛ kunu kɔkpɛ ozi gagla lɔ loso e, akpɛ ɔsã si, bagbani yɛ atsini baguta ba kepea mɛ ɛ. 35Lɛ gi bɛna atrakpui ʋa aʋa ɛ, liba lɛ mɛ si, baguta ba befeke ye ní linɔkpi le agaglaboe la loso. 36Lɛ ese linu si linɔkpi le likuni yɛ kude nì ozi si, “Mlaki tɔ kuye ye.”

Paulo Ebu Isu ya onu

37Lipoe lɛ gi baguta ba si bɛkpɛ Paulo ní ligba lɛ mɛ ɛ, asi baguta ba ɔka ʋidi ye si, “Kimɛ kudeonu tɔ misi wɔ liboetɔ.” Lɛ baguta ba ɔka ʋidi ye eʋi ye si, “Wonu si Hela sɛ na a?” 38“Kɔlɔ aní wɔ wonu Egipte ɔnɛ liɛ klɔ gi aki ozi eku ní ewe a la gi ɛza mɛ ɛ, xe agbani banɔye akpe tiene atsini ɔyaya klɔ na a?”

39Lɛ Paulo apani si, Mɔkɔ ɛ, Yudanɛ menu, dɔni Tarso ní Kilikia, ɔma gi ɛzi linyi, lɔ mɛ ɔnɛ menu pɔ̀ maki wɔ litukpo si kimɛ kudeonu tɔ mipani ki banima a.

40Gi bɛki yɛ kudeo onu i. Paulo alɛɛ ní atrakpui ʋa aʋa, lɛ emuni yɛ awla la ní linɔkpi le aʋa, lɛ gi bɛgɔ tsriɖi i, asi ba ní Yudanɛ ma siya sɛ mɛ si,

Currently Selected:

Axwɛ 21: avn

Highlight

Copy