Axwɛ 22

1“Mɛ baka ba ni mɛ benemi ba, mlata mɛ kutu tɔ mlaki tɔ mibu isu unu!” 2Gi benu gi ɛɛpani ki ba ni ba tutɔ ba siya sɛ mɛ ɛ, ba petee bɛdɔ zii sanɔ, lɛ Paulo atrɛ ní lɛ aʋa si,

3“Yuda ɔnɛ menu gi bɛpɔ ní Tarso ní Kilikia kesea mɛ ɛ, pɔ̀ bɛgani mɛ ní Yerusalem gi meze ɔdɔkpasibi ní Gamaliɛl ese e. Behe me ní blɔ baka ba isã nɛ mɛ mɔmɔmɔ lɛ meze kpikpi aki Aya ŋwisi kiliɛ gi mlɔ petee mlalɛ omono e. 4Meti banama gi beze Kristo yɛ baʋaziŋa ba kude e, lɛ maki si beye ba a. Mevu ba, badzɛ ni benyime akpɛ ligba. 5Kusɔliɔ ɔka ʋidi ye ni banɔtsitsia ba gi bizɛtsa ɛ, balɛ gi biasi mlɔ si anukwarɛ mɛɛpani i. Mazi kuplekpa adɔ ni baklɔ kí blɔ akɔanɛ ma ní Damasko, lɛ niklɔ mɛɛtrɛ si mizeevu banɔ ba ya tɔ mikpɛ ba bibɔ ʋɛ manɔ ní Yerusalem tɔ behe kutu aki ba.”

Paulo Apani ní yɛ Ɔna mɛ Kukyikyi su

6“Gi meze kudeo aʋa ŋwisi kemize inyɔ liɔfɔ ni tiʋa ɔza a, xe meeti ipɔni Damasko e, kyɔŋ koe kuklekle gagla atɔ kwidɔ lifunu ne kle klani mɛ. 7Megleʋe adɔ kesea lɛ menu ole ɔtɔ gi eʋi me si, ‘Saulo, Saulo! Ege lɛ loso woeti me e?’ 8Meʋi si, ‘Wɔ wonu nyaŋwɛ ɛ, Ɔkaɛ?’

“Ebu le onu si, ‘Mɛ menu Yesu Nazaret ɔnɛɛ gi woeti i.’ 9Banama gi mɛ ni ba kwizɛga ɛ, bɛmɔ kuklekleo pɔ̀ bénu eboa la gi ole lo ɛɛsi mɛ ɛ ese.

10“Meʋi si, ‘Ege wɔsi mibitɛ ɛ, Ɔkaɛ?’

“Ɔkaɛ asi mɛ si, ‘Yɔ tɔ trɛ ní Damasko ɔma nɔ mɛ, biasi wɔ kidɔ kakaa liɛ gi Aya atrɔ aplɛ si wɔabitɛ ɛ.’ 11Gi kuklekle gaglaa kwini mɛ bimbi ʋe loso e, banama gi blɔ ni ba kwizɛga ɛ, bevu mɛ ɔwla lɔ ɛgbani mɛ tsinɔ ní Damasko ɔma nɔ mɛ.

12“Lɛ onyime ɔtɔ gi eze ní ɔma lɔ klɔ mɛ ɛ, gi bizɛxwa si Anania a, eze ɔnɔ gi izesumu Aya ní kudeo onu u, xe izɛbitɛ ní blɔ isã nɛ aʋa a, lɛ Yudanɛ a ma petee gi beze ní ɔma nɔ mɛ ɛ, bizɛkpɛ kubùbù ní yɛ su kpaŋu. 13Yɛ ɔba lɛ ní mɛ su lɛ asi mɛ si, ‘Onemi Saulo dra wɔ bimbi ʋe.’ Lipoe lɛ klɔ ʋa mekpese kumɔ lɛ mamɔ yɛ gi ɔlɛ ní mɛ su i.

14“Apani dzɛ si, ‘Blɔ baka koko ba Aya yɛ akya wɔ si wɔate yɛ kupɛpɛɔ, tɔ mɔ yɛ ɔxwɛdzɛɛ gi yɛ bede ʋa bɛgyɔ ɛ, ani tɔ nu gi ɛɛpani ni yɛ ɔtutɔ yɛ ole lo o. 15Lɛ ese linu si wɔ wɔtraze yɛ Katsalia, lɛ wɔapani kí ɔnɔ kakaa kidiliɛ gi wɔmɔ ɔ, xe wonu i.’ 16Lɛ abla ɛ, ege wɔepe e? ‘Yɔ, ki tɔ bakpɛ kuni aki wɔ, tɔ plo wɔ eboe zimizi na gani Aya kuxwaxwa mɛ.’

Bɛxwa Paulo Si Ɔpani Liboe Gbã nɛ ki Banama Gi Bénu Yudanɛ ɛ

17“Gi medzi atrɛ ní Yerusalem i, xe mazɛɛxwa Aya ní Lisɔligba lɛ mɛ ɛ, mamɔ kububasɛ 18ní kɔ mɛ ɛ, mamɔ Ɔkaɛ lɛ asi mɛ si ‘Kɔsi tɔ sɛ ní Yerusalem kyikya lɛ ese linu si banima niya ɛ, bátrazɛ wɔ liboe le ní mɛ su u.’

19“Mebu le onu si ‘Ɔkaɛ bete le si madzɛ Yudanɛ ma itsaklɔ lɛ mevu lɛ maki si bekusi banama gi bɛzi wɔ aʋa ɛɛŋa ɛ. 20Lɛ lipoe lɛ gi bezeye wɔ katsalia Stefano e, mɛ ɔtutɔ malɛ niklɔ gi mazakpɛ banama gi beeye ye e, kigagla xe mazeedi banɔye ba ewu la aʋa a.’

21“Pɔ̀ Ɔkaɛ asi mɛ si ‘Trɛ lɛ ese linu si matrakpɛ wɔ ɛtsisi ɔgblamadza kɔ ní banama gi bénu Yudanɛ ma kɔ ɔ.’ ”

22Banima bɛzɛta Paulo kutu kɔna ni lipoe lɛ gi apani liboe gɔgɔɛ lɛ ya ɛ; lɛ bekpese ozi lo kukpɛ tatata si “Mlasɛ ni yɛ niklɔ! Mleye ye! Ógyeno si oze ligbã!”

23Gi bɛzɛkpɛ ozi lo o, xe bɛzefu ba ewu la a, xe bɛzɛhali ovugbo lo etu ikpɛ liwɔ lɛ mɛ ɛ, 24Roma banɛ baguta ba ɔkaɛ aki si bedzini Paulo akpɛ ligba lɛ mɛ. Lɛ aki kyɛ si bafiaʋi yɛ litam nɛ tɔ beʋi ye kidiliɛ loso gi Yudanɛ ma bɛyɔ kedu ya ní yɛ su gbɛgbɛ te e. 25Pɔ̀ gi bɛnya yɛ sì bekpese yɛ bidɔ mɛ kufiaʋi i, Paulo eʋi baguta ba ɔka ɔtɔ gi alɛ ní klɔ si “Ɔsã nɔ ɛki kude si bafiaʋi Roma ɔnɛ gi bebu ye lipɔ si abitɛ liboe zimizi i, bidɔ na a?”

26Gi ɔkaɛ enu liboe le e, asɛ atrɛ ní ba ɔka ʋidi ye klɔ lɛ eʋi si “Ege mlɛbitɛ ɛ? onyime liɛ klɔ ʋa ɛ, onu Roma ɔnɛ.”

27Lɛ loso ɔka ʋidi ye atrɛ ní Paulo klɔ lɛ eʋi ye si, “Si mɛ anukwarɛɛ, Roma ɔnɛ wonu na a?”

Ebu le onu si, “Ee Roma ɔnɛ menu.”

28Ɔka ʋidi ye apani si, “Liʋɛ ʋidi matsa xe ableke medzi Roma ɔnɛ.” Paulo ebu le onu si, “Bɛpɔ mɛ Roma ɔnɛ.” 29Banama gi nya bɛtráʋi Paulo beʋiʋi ʋa ɛ, bedzi trɛ kede yɛ su kyɔŋ. Lɛ baguta ba ɔka ʋidi ye elulu lipoe lɛ gi amɔ egyesi si Paulo onu Roma ɔnɛ ɛ, gi yɛ yɛ akpɛ bibɔ ʋɛ mɛ ɛ.

Bɛmani Saulo ní Otsixwaklɔ

30Baguta ba ɔka ʋidi ye apɛ si yi nu lɛ mɛ tututu kidiliɛ gi kɛ loso Yudanɛ ma bɛyɔ kedu ní Paulo su i. Lɛ loso ní keletitia mɛ ɛ, aki bebu Paulo bibɔ ʋɛ mɛ lɛ aki si Kusumu yo baka ba ni Yudanɛ ma betsixwa ba petee bɛtsa a, lɛ bɛgbani Paulo e tsinɔ xe ɔzɛ ɔlɛɛ ni ba aŋu mɛ ɛ.

Currently Selected:

Axwɛ 22: avn

Highlight

Copy