2 Korinto 9
9
Kupɔnɔ Kí Benemi Basɔlisɔli ba
1Nya líziã si miŋwlimi ki mlɔ ní bidɔkɔkɔɛ ʋɛ gi mlɛtsisi banɔ dradra ba su u. 2Lɛ ese linu si mete si mlɛpɛ veve si mlɛɛpɔnɔ, lɛ makɔ mlɔ adɔ isu akí Makedonia banɛ ma. Lɛ masi ba si, “Benemi ba ní Axaya ɛ, bɛbla si biaki kupɔnɔ dɔni galigɔ lɛ ke.” Mlɔ kupɛ́pɛɔ kwihwa ni bamɛ beglegle si ba kyɛ babitɛ kiditɔ. 3Abla ɛ, mɛɛtsisi benemi ba, tɔ blɔ kusufekeo ní eboa la ya mɛ ɛ, kukíze kupluplu u. Pɔ̀, tɔ mlaaze ní kublabla mɛ ni mlɔ kupɔnɔɔ kiliɛ gi mapani si mlaapɔnɔ ɛ. 4Lɛ ese linu si xegi mɛ ni banama a, gi bɛdɔ Makedonia kwiaba a, xe biamɔ si mlamá ní kublabla mɛ ɛ, kwiaŋa kuye gi nya kwika ní mlɔ aʋa gbɛgbɛ te e. Xegi kútrapani ní mlɔ kuyeo su i. 5Lɛ loso e, megyo le edi si liziã si mikpɛ benemi ba kigagla tɔ betù ɔtɔ aki mɛ tɔ biaakpɛ mlɔ bidɔkɔkɔ ʋɛ likpɔ ɔ. Ɔna mɛ faã bidɔkɔkɔɛ ʋɛ gi mleka ɛplɛ si mlaakɔ ɛ. Lɛ biakpɛ ʋɛ likpɔ xe maaba a, lɛ biabasɛ si kipɛ́ mlɛpɛ si mlɛɛki bɛ ɛ, lɛ bínu bidɔ gi bemi ní mlɔ aʋa si mlakɔ ɔ.
Mlakpɛ bidɔ ni ɔna faã
6Mlaplɛ aŋu si ɔniliɛ gi akpɛ bidɔ sisami i, yɛ aamɔ bidɔ sisami; lɛ ɔniliɛ gi akpɛ bidɔ glegle e, yɛ aamɔ bidɔ glegle. 7Mlɔmɛ ɔnɔ kakaa ɔkɔ kidiliɛ gi atrɔ ní yɛ ɔna nɔ mɛ si yɛ akɔ ɛ, aní ni aŋu mɛ nyasi nyasi loo ŋwisi kimi bemi ní yɛ aʋa kinɛ ɛ; lɛ ese linu si Aya izɛɛlɔ ɔniliɛ gi izɛɛki bidɔ ni isami i. 8Lɛ Aya aatani mlɔ yɛ lipomepɛpɛ kakaa kukɔ niteme si ní kidɔ kakaa mɛ ni lipoe kakaa mɛ ɛ, mlamɔ mlɔ baziazia ba petee lɛ mlɔ eboe gbã na aasrɛ. 9Kiliɛ gi Aya yɛ liboe le lipani si i,
“Izeehle yɛ bidɔkɔkɔ ʋɛ ɛki bazianete ba ni ɔna faã;
lɛ yɛ kude gyɔgyɔɔ kulɛ kɔtsinɔ kanɔmɛ anɔmɛ.”
10Lɛ Aya gi yɛ izɛɛki esebi la ɛki ɔnyrɔmɛdzɛɛ ni àklã na ki kidɔŋaŋa ɛ, yɛ kee aaki mlamɔ eboe gyɔgyɔ la gi aasrɛ. Lɛ aaki si kidiliɛ gi kilɛ ni mlɔ awla ɛ, kiasrɛ. 11Aaki si mlaaze bexonete ní kude kakaa onu gi mlɔ fɛ mlaaki bidɔ ni ɔna faã lipoe kakaa a, lɛ gani blɔ aʋa ɛ, mlɔ bidɔkɔkɔ ʋɛ biaki si banima biado Aya ɖase.
12Lixwɛ nɛ gi mlɛwa ɛ, liʋíki Aya yɛ banima ba bidɔ ziazia ʋɛ tètè ko, boŋu i, lɛ liiki si banɔ glegle bedo Aya ɖase. 13Lɛ kɔkpɛ kidiliɛ gi mlɔ axwɛwawa la ebu ibasɛ ɛ, banima bíakɔ kukpɔ̀kpɔ̀ ki Aya kɔkpɛ mlɔ isu ya kukɔkpɛ ní Kristo yɛ Liboe Gbã nɛ mɛ ɛ, gi mleenu kutu loso o. Lɛ ya lipɔni mlɔ bidɔkɔkɔ ni ɔna faã gi mlɛlɛ ʋɛ ni ba ni ɔnɔ kakaa fɛ ɛ. 14Lɛ loso, ní ba Aya kuxwaxwa ní mlɔ litukpo me e, ba ina nɛ iigyo mlo edi kɔkpɛ Aya yɛ lipomepɛpɛ ʋidi lɛ gi aki mlɔ loso o. 15Mlaki tɔ kudo Aya ɖase ki yɛ bidɔkɔkɔɛ ʋɛ gi ɔnɔnɔ ɔ́tratani kusrɔ loso o.
Currently Selected:
2 Korinto 9: avn
Highlight
Share
Compare
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
