2 Korinto 10
10
Paulo Aŋwlɛ Yɛ Axwɛwawa la litukpo
1Gani Kristo yɛ kusububɔ ni yɛ litɔplɛplɛkese kese me e, mɛ Paulo, gi mlɛzɛɛsɛ si menu ɔnɔ gi onu ofufluse e, xegi malɛ ní mlɔ kusi i, pɔ̀ xe maʋíse ɔnɔ aŋu mɛ ɛ, xegi malɛ ni ɔdzage e, meʋi dɔni mlɔ iwla mɛ si 2mɛɛki mlɔ litukpo si xegi maba mlɔ klɔ ɛ, litrázia si mizeehe eboe gagla a, ni banama gi begyo le edi si kelea lia mɛ bede ʋa onu kulɛ ligbã́ nɛ ɛ. 3Gi kulɛ ní kelea mɛ kyɛ ɛ, kuʋíta kigũ ŋwisi kelea mɛ kinɛ ɛ. 4Bigutadɔɛ mɛ su axwɛ gi kwiiwa ɛ, bínu kelea ya mɛ bigutadɔ pɔ̀ binu Aya yɛ bigutadɔ gi kigagla kiliɛ ní bɛ awla a, gi biazizi ahwafiɔnɛ yɛ izekɔ gagla lɛ ɛ. 5Kuzeezizi kuboehe kakaa; ni imɔkpɛkpɛ kakaa gi iyɔ kedu ya ní Aya kuteteo su u; kuzeevu kugyodi kakaa tɔ kuki si kukpɛ litukpo ní Kristo ese. 6Lɛ kuli ní kublabla mɛ si kwiahe kutu kí kutu monumonu kakaa xegi mlɛbasɛ si mlalɛ ní kutununu me petee ɛki Kristo e.
7Mleedi eboa la gi alɛ ní mlɔ aŋu na mɛ ɛ. Xegi mlɔmɛ onutɔ aka ní yɛ isu aʋa si yenu Kristo ɔnɛ ɛ, lilɛ si odzini le kutapo odi mumɔ si blɔ kyɛ ɛ, kunu Kristo banɛ ŋwisi yɛ ɔtutɔ lɔ kiniɛ na a. 8Lɛ ese linu si xegi maasa awla kakɔ ɔ, ní kigaglaɛ liɛ gi Ɔkaɛ aki blɔ si tɔ kukɔ gani mlɔ tɔ mletsi i sani si tɔ kuzizi mlo kyɛ ɛ, kuye kútraku me e. 9Mápɛ si miŋwi ŋwisi meekeni idi si míkpɛ mlɔ lifu ni mɛ kuplekpaa a, gi maŋwlimi aki mlɔ mɛ ɛ. 10Lɛ ese linu si banɔatɔ bɛɛpani si, “Paulo yɛ kuplekpaa gi aŋwlimi i, kɔmɛ eboe la alɛ nyipu lɛ alɛ gagla a, pɔ̀ xe yɛ ɔtutɔ ɔlɛ ní blɔ su i, ónu ɔnɔ gagla a, lɛ yɛ eboe la ɛ, enu kididɔ ɔ.” 11Linu si banɔ ba klɔ ba bamɔ egyesi si lidzegaga ɛtɔtɔ líma ní kidiliɛ gi kwiŋwlimi ní blɔ kuplekpaa mɛ ɛ, xe kúma ní mlɔ su i, ani kidiliɛ gi kwiabitɛ ɛ, xe kuli ní mlɔ kusi i me.
12Kútrakeni idi si kúkla isu ya kpɛ loo tɔ kúkɔ isu ya ɛsrɔni banama gi bizɛkpɔ̀ isu ya a. Gi beegyigye batutɔ ba isu ya a nì ba isu ya, xe bɛɛkɔ ba isu ya ɛsrɔni ni ba ahanuglɔ ba ɛ, bétè liboe. 13Blɔ kɔ ɛ, blɔ kusudɔɔ kútradɔ kudeo ɛza a; pɔ̀ blɔ kusudɔɔ kwiaze ní axwɛ ana gi Aya akpɛ ní blɔ awla ɛ aʋa, lɛ axwɛ ana klɔ ɛna mlɔ kyɛ ɛ. 14Lɛ kuʋísa kutrɛ ní blɔ kusudɔɔ mɛ ɛ, kiliɛ gi liaze e, xegi kúba mlɔ klɔ ni Liboe Gbã nɛ ní Kristo su u. Lɛ ese linu si kwitani mlɔ kuna ni Kristo yɛ Liboe Gbã nɛ. 15Lɛ kuʋídɔ kudeo ɛza si kwidɔ isu ní axwɛ gi banɔ dzedze bɛwa aʋa a. Blɔ kudeonudidi kunu si kiliɛ gi mlɔ kuziŋaa kwiitsi ipɔnɔ ɛ, blɔ axwɛ na kètu ya ni mlɔ kusi kiane sanɔ. 16Kɔlɔ kwiatani Liboe Gbã nɛ kupani ní kuse dzedzeo aʋa. Lɛ ese linu si kúpɛ si kwidɔ isu u ní axwɛ gi bɛwa kokoo ní ɔnɔ dzedze yɛ kètu ya mɛ ɛ aʋa.
17Pɔ̀ Aya yɛ liboe le lipani si i, “Ɔniliɛ gi apɛ si yidɔ isu ya ɛ, lilɛ si ɔdɔ isu ya ní kidiliɛ gi Ɔkaɛ abitɛ aʋa a.”#10:17 Yeremya 9:24 18Lɛ ese linu si aní ɔniliɛ gi ɛɛkpɔ isu ya ɛ, yɛ onu ɔnɔ gbã ɛ, pɔ̀ ɔniliɛ gi Ɔkaɛ akpɔ̀ ɛ.
Currently Selected:
2 Korinto 10: avn
Highlight
Share
Compare
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
