2 Korinto 5

1Abla kwite si kusaa akpandɔ liɛ mɛ gi kukpasi i, gi onu blɔ kesea aʋa ya kisugyaɛ ɛ; xegi ezizi i, ligba lilɛ ní blɔ awla dɔni Aya klɔ. Ligba gi liaze ní blɔ awla ní lifunu ne e, gi aní ɔnɔ awla bɛkɔ ɛwa lɛ ɛ. 2Pɔ̀ abla ɛ, kwigù hũu u, gi kwipɛ si kwiaze ní blɔ lifunu ne kisugyaɛ mɛ ɛ. 3lɛ ese linu si xegi kwikpɛ lifunu ne kisugyaɛ ɛ, bátramɔ blɔ si kwibu liya a. 4Lɛ ese linu si gi kukpasi ní kelea mɛ kusa akpandɔ liɛ ya mɛ ɛ, kwiitàni ní isu ya mɛ, lɛ lidɔtu ʋidi litini ní blɔ aʋa a, lɛ ese linu si kúpɛ si bebu blo liya a, pɔ̀ kwipɛ si kuze ní blɔ lifunu ne kisugyaɛ mɛ atɔ kidiliɛ gi kinu kidɔ tsetse e, biakyi ke tɔ kiadzi ligbã́. 5Abla ɛ, Aya yɛ abitɛ blɔ akí liboe lɛ ya, xe aki blɔ Ɔfuɛfuɛ nɔ ŋwisi bidɔ gi bɛtsa ɛplɛ ɛ, gi kiitrɔ likla a ní kidiliɛ gi kitraba ba ɛ, aʋa.

6Lɛ loso e, ɔna ɔlɛ ní blɔ awla lipoe kakaa, lɛ kwite si gi kuli kepe ní kisugyaɛ mɛ ɛ, kuli ní ɔdzage ní blɔ Ɔkaɛ su. 7Kuli ligbã́ nɛ ní kuziŋa mɛ aní ní kidiliɛ gi kwimɔ onu u. 8Ɔna ɔlɛ ní blɔ lipo lɛ mɛɛpani, lɛ kwiapɛ si kwiayurɔ blɔ kisugyaɛ tɔ kwiaze kepea ni Ɔkaɛ. 9Lɛ loso e, kwitrɔ lɛ si kwiabitɛ kidɔ kakaa tɔ kwiaku yɛ aŋu, xegi kulí kepe ní kisugyaɛ mɛ ni ya a, loo ní ɔdzage ni kɛ su. 10Lɛ ese linu si lilɛ si blɔ petee kwialɛɛ ní Kristo yɛ litsixwagbo le ɔtɔ nɔ, tɔ ɔnɔ kakaa aazi kidiliɛ gi kinu si ɔzɛ ɛ, kɔkpɛ kidɔ kakaa gi abitɛ ɛ, lipoe lɛ gi eze ni kisugyaɛ mɛ ɛ, xegi kinu kigbã loo kinyaninyani i.

Mlaki Aya Ɔkpɛ Blɔ nì Yɛ Likpɔ

11Abla gi kwite kidiliɛ ɛ, gi linu tɔ sé Ɔkaɛ ɛ, lɛ loso kwikeni idi tɔ kuliɔ̀ʋi banima tɔ benu blɔ ese e. Aya ete kidiliɛ gi kunu i, lɛ medi kudeonu si lɛ mɛ lidra ɛki mlɔ ina nɛ fɛ ɛ. 12Kuʋí keni idi dzɛ si kukpɔ̀ isu iiki mlɔ ɔ; pɔ̀ kwikenidi tɔ kwiaki mlɔ kudeonu tɔ mladɔ isu ní blɔ aʋa a, atɔ mlatani lɛ onu kubu kí banama gi bizeefeke isu ya a, ní kidiliɛ gi banima bizɛɛmɔ aʋa a sani kidiliɛ gi kilɛ ní ɔna nɔ mɛ ɛ aʋa. 13Xegi kwiiwle e, Aya loso kwiiwle, pɔ̀ xegi kulɛ mumɔ ɛ, kulɛ mumɔ kɔkpɛ mlɔ loso. 14Lɛ ese linu si Kristo yɛ kunɔlɔɔ kɔ kwiŋa blɔ aʋa lɛ ese linu si lɛ mɛ lidra ɛki blɔ si ɔnɔ tole etse aki ɔnɔ kakaa lɛ loso e, ɔnɔ kakaa etse. 15Etse akí banima petee, tɔ banama gi bali ligbã́ nɛ ɛ, batráze ligbã́ nɛ ɛki isu ya tɔ ɔ, pɔ̀ biaze ligbã́ kí ɔniliɛ klɔ gi yɛ etse aki ba ɛ, xe bedzini yɛ yɔnɔ ɛ.

16Lɛ loso dɔni abla ɛ, kuʋímɔ ɔnɔnɔ dɔni kelea mɛ bede ʋa onu tɔ ɔ. Nya lipoe tɔ zanɔ ɛ, nite kwizɛmɔ Kristo pɔ̀ kuʋímɔ yɛ nite tɔ ɔ. 17Lɛ loso xe ɔnutɔ akpɛ likpɔ ni Kristo e, edzì ɔnɔ vuvu; bidɔ koko ʋe biza; bidɔ vuvu ʋɛ biba. 18La petee ɛdɔ Aya klɔ lɛ gani Kristo me e, akpɛ blɔ ni Yɛ likpɔ lɛ akpɛ lixwɛ ní blɔ awla si tɔ kukpɛ Yɛ ni banɔdzedze ba kyɛ likpɔ. 19Aya ɛɛkpɛ kelea mɛ ni Yɛ isu ya likpɔ gani Kristo aʋa; lɛ Aya ɔʋíbla banima ba eboe zimizi na ɛki ba a. Lɛ akɔ likpɔkpɛkpɛ lɛ odu lo akpɛ ní blɔ awla aki banima.

20Lɛ loso kulɛɛ ní Kristo linyi ne me ŋwisi Aya eeʋi gani blɔ aʋa kinɛ ɛ, kwiki mlɔ litukpo ní Kristo yɛ linyi ne me si: Mlaki tɔ bakpɛ mlɔ ni Aya likpɔ. 21Aya aki si Kristo gi eboe zimizi áma ní yɛ su i, odzi eboe zimizi kí blɔ tɔ gani yɛ aʋa ɛ, blɔ eboe aagyɔ ní Aya aŋu mɛ ɛ.

Currently Selected:

2 Korinto 5: avn

Highlight

Compare

Copy