2 Korinto 4

Kunu Exo ní Sise Kufukpo me

1Lɛ loso gi gani Aya yɛ asigagadidi la mɛ ɛ, xe aki blɔ axwɛ ana ya si kuwa ɛ, blɔ ɔna ɔ́tragbɔ̀ ɔ. 2Boŋu i, kwibu eyekuboe la ni eboe kpokpo la ɛzanɔ, kuʋímeni banɔ ɔ, lɛ kuʋíkyi Aya yɛ liboe le kyɛ ɛ. Boŋu i, gi kwiibu anukwarɛɛ basɛ wee e, kwiikpɔ isu ya ɛki ɔnɔ kakaa si biate blo ní ba ina nɛ mɛ ní Aya yɛ aŋu mɛ. 3Lɛ xe liboe gbã nɛ gi kwiipani i, xe lɛ mɛ lídra kyɛ ɛ, banama gi bɛɛkyrɔ ɛ, ba ko lɛ mɛ lídra ɛkɔ ɔ. 4Ozimizi ye, kesea ʋa ya ka aya yɛ akpɛ banama gi báziŋa ɛ, ba begyodi ʋa ní litumu me. Lɛ loso baʋímɔ Liboe gbã nɛ ɛ, lɛ kusudraa kɔ kuklekleo ní Kristo su gi yɛ onu Aya yɛ kizeze me e. 5Lɛ ese linu si aní blɔ ɔtutɔ isu ya kwisɔli i; kwisɔli Yesu Kristo si onu Ɔka, lɛ blɔ ɔtutɔ lɔ kɔ ɛ, kunu mlɔ banɔsumu kɔkpɛ Yesu loso. 6Lɛ ese linu si Aya gi yɛ apani si i, “Kuklekle kudo dɔni litumu ne me e,” yɛ aki si yɛ kuklekleo kukle ní blɔ ina nɛ mɛ. Atɔ kuki si kute Aya yɛ kusudraa kɔ kuklekleo ní Kristo yɛ aŋu na mɛ ɛ.

7Pɔ̀ exo ala alɛ ní blɔ awla ní sise kufukpo me e, tɔ libasɛ si kigagla ʋidi liɛ kidɔ ní Aya kɔ lɛ aní blɔ kɔ ɔ. 8Baxixa ʋa bali ní blɔ su ní kapɛ kakaa mɛ, pɔ̀ baʋíŋa blɔ aʋa a, lɛ kuzɛɛpisa pɔ̀ kyɛ ɛ, blɔ ɔna ɔʋígbɔ̀ ɔ. 9Banima bizɛyɔ kedu ní blɔ su pɔ̀ Aya ɔ́yurɔ blɔ ɔ; bizɛpɛ si beye blo pɔ̀ kuʋítse e. 10Yesu yɛ kutseo kuli ní blɔ kisugyaɛ mɛ lipoe kakaa tɔ yɛ ligbã́ nɛ liaŋwi ní blɔ kisugyaɛ mɛ. 11Pɔ̀ blɔ gi kulɛ ligbã́ nɛ ɛ, kulɛ ní kuxixa mɛ lipoe kakaa kɔkpɛ Yesu loso, atɔ biamɔ yɛ ligbã́ nɛ ní blɔ kisugyaɛ liɛ gi kizetse e, me. 12Libasɛ si kutseo kwiiwa axwɛ na ní blɔ mɛ, pɔ̀ ligbã́ nɛ liiwa axwɛ na ní mlɔ mɛ ɛ.

13Bɛŋwlimi kpɛ ní kuŋwlimi dradraa mɛ si, “Mazi lɛ aʋa aŋa lɛ loso Mapani.” Ni kuziŋa Ɔfuɛfuɛ tole ɔlɔ klɔ ʋa ɛ, blɔ fɛ kwiziŋa lɛ loso kwiipani; 14lɛ ese linu si kwite si Aya, gi yɛ ayɔni Yesu Kristo adɔ ni bekpo ʋa mɛ ɛ, aayɔ ni blɔ fɛ kɔpɔni Yesu lɛ aakɔ̀ blɔ pɔni mlɔ, manɔ ní yɛ aŋu mɛ. 15Eboa la petee gi ɛɛba blɔ aʋa ɛ, alɛ aki mlɔ libibubu; lɛ loso Aya yɛ lipomepɛpɛ nɛ gi liina banima ní kisrɛsrɛ mɛ ɛ, liaki ɖasedodo gi aagbigba ki Aya yɛ kusudraa a.

16Lɛ loso e, ɔna oʋído ní blɔ lipo o. Linya ɛli ní lɛ mɛ si blɔ inɔse le iiblo, pɔ̀ ní Ɔfuɛfuɛ nɔ mɛ ɛ, beedzini blo kigagla ɛkpɛ liwe kakaa. 17Lɛ ese linu si blɔ baxixa sisami ʋa ya gi kwimɔ abla ɛ, bɛtráze lipoe kpekpemi itɔ ko, lɛ bɛɛki si kwiimɔ kusudra gi kɔ onu kutraza liwewe e, gi kwipɛ sani baxixa ya ʋa petee e. 18Lɛ loso kúkɔ blɔ aŋu na atrɔ ní kudɔkpaa liɔ klɔ gi kuzɛɛmɔ aʋa a, pɔ̀ kwikɔ la ɛtrɔ ní kudɔkpaa liɔ klɔ gi kuʋímɔ ɛ aʋa. Lɛ ese linu si kidiliɛ gi bizɛɛmɔ ɛ, kizeeze lipoe kpekpemi itɔ ko, pɔ̀ kidiliɛ klɔ gi baʋímɔ ɛ, kɛ kizeeze kɔtsini kanɔmɛ anɔmɛ.

Currently Selected:

2 Korinto 4: avn

Highlight

Compare

Copy